كورمەگە تۇقىمى بولەك, تۇرپاتى ەرەك 400-دەن استام يت قاتىستىرىلدى. ونىڭ ىشىندە 50 قازاقتىڭ قۇماي تازىسى كورەرمەن نازارىن ەرەكشە اۋداردى. ءبىتىمى سيداڭ, قۇلاعى دەلدەڭ, جانارى وتكىر, سيراقتارى شىمىر بىرىنەن-ءبىرى وتكەن تازىلار كەزەگىن كۇتىپ اسقان پاڭدىقپەن تىنىستاپ جاتتى.
يتتەر ارناۋلى الاڭدا ايرىقشا قاسيەتتەرىن كورسەتىپ, دايىندىقتا شىنىققاندىعىن انىق اڭعارتتى. يەسىنىڭ بۇيرىعىن بۇلجىتپاي ورىنداپ دەگدارلىعىن تانىتتى. قازىلار القاسى ءار قاتىسۋشىنىڭ ءجۇرىس-تۇرىسىنا, دەنە بىتىمىنە, ءجۇنىنىڭ كۇتىمىنە دەيىن باعالادى. اسىرەسە, تازىلارعا قويىلاتىن تالاپ جوعارى بولدى. اسىل تۇقىمدىلارعا تورەشىلىك ەتۋ مىندەتىن ەلىمىزدەن بولەك جاپونيا, سەربيا جانە لاتۆيادان ارنايى شاقىرىلعان حالىقارالىق ساناتتاعى قازىلار اتقاردى.
كورمەنىڭ باستى ۇيىمداستىرۋشىسى, قازاقستان كينولوگتار وداعىنىڭ پرەزيدەنتى باۋىرجان سەرىكقاليدىڭ ايتۋىنشا, مۇنداي ءىس-شارالار قوعامداعى يت باپتاۋ مادەنيەتىن ارتتىرىپ, ونى حالىقارالىق ستاندارتتارعا ساي دامىتۋعا سەرپىن بەرەدى.
«بىلتىرعى جىلدىڭ قىركۇيەگىندە حالىقارالىق كينولوگيا فەدەراتسياسى قازاقتىڭ تازى تۇقىمىنا حالىقارالىق مويىنداۋ مارتەبەسىن بەردى. راسىندا تاريحي وقيعا. بۇل عاسىرلار بويى بابالارىمىزدىڭ سەيىلدەگى سەرىگى بولعان قۇماي تازىنىڭ الەمدىك دەڭگەيدە تانىلۋى. الايدا ءالى دە ماڭىزدى جۇمىستار اتقارىلۋى ءتيىس. فەدەراتسيا ەرەجەلەرىنە سايكەس, قازاقى تازىنىڭ تولىققاندى مويىندالۋى تەك 10 جىلدان كەيىن عانا جۇزەگە اسادى. بۇل كەزەڭدە حالىقارالىق كينولوگيالىق ءىس-شارالارعا بەلسەندى قاتىسۋ, تۇقىمنىڭ تازالىعىن ساقتاۋ, دەنساۋلىعىن باقىلاۋ, اڭشىلىق قاسيەتتەرىن دامىتۋ جانە تازىنىڭ حالىقارالىق بەدەلىن نىعايتۋ باستى مىندەت بولىپ تۇر», دەيدى باۋىرجان سەرىكقالي.
ايتقانداي, مەملەكەت باسشىسى قاسىم-جومارت توقاەۆ تا تازىنى ەرەكشە جاقسى كورەدى. فرانتسيالىق ارىپتەسىنە تازىنىڭ كۇشىكتەرىن سىيعا تارتقانى جۇرت كوڭىلىنە جىلۋ سىيلادى. سونداي-اق پرەزيدەنت قازاقستاننىڭ حالىق ءارتىسى ديماش قۇدايبەرگەنگە دە ەرەكشە ىلتيپاتپەن وسى باعالى سىيدى تارتۋ ەتكەن بولاتىن. ءانشى تازىعا «عارىشكەر» دەپ ات قويىپ, بىرگە تۇسكەن سۋرەتىن الەۋمەتتىك پاراقشاسىنا جاريالاعان ەدى. ورايلى تۇستا باۋىرجان سەرىكقاليدان وسى وقيعالاردىڭ تازى برەندىنە قالاي اسەر ەتكەنىن سۇراپ كوردىك.
«البەتتە, پرەزيدەنتتىڭ تازىعا دەگەن قىزىعۋشىلىعى مەن ونى حالىقارالىق ارەنادا تانىتۋعا جاساعان قادامدارى تازىنىڭ مارتەبەسىن ودان ءارى كوتەردى. قاسىم-جومارت كەمەل ۇلىنىڭ ەممانيۋەل ماكرونعا تازى سىيلاۋى مەن ديماش قۇدايبەرگەننىڭ وسى كيەلى جانۋارعا كوڭىل ءبولۋى – ۇلتتىق برەندىمىزدى الەمگە تانىتۋداعى ايرىقشا وقيعا. تازىنى سىي رەتىندە تابىستاۋ – ونىڭ تەك جانۋار عانا ەمەس, ۇلتتىق سيمۆول ەكەنىن بىلدىرەدى. بۇل جايتتار حالىقارالىق دەڭگەيدە قازاقى تازىنىڭ تانىلۋىنا ىقپال ەتىپ, ونىڭ الەمدىك كينولوگياداعى ورنىن نىعايتۋعا زور اسەر ەتتى», دەيدى كينولوگتار وداعىنىڭ پرەزيدەنتى ب. سەرىكقالي.
كورمەگە كەلگەن تازى باپتاۋشىلار تازىنىڭ نەگىزگى قاسيەتى جۇيرىكتىگىندە ەكەنىن ايتادى. «ونى باۋلۋ – ۇزاق ۇدەرىس: توق تازىنىڭ ءىشىن ايداتىپ, قوياسىن تۇسىرەدى, ونى ابدەن جۇگىرتىپ, تىنىسىن اشادى. سودان كەيىن عانا تۇلكىنىڭ قۇيرىعىمەن اۋىزداندىرىپ, قويانعا سالىپ باپتايدى», دەيدى ولار. مىنە وسىنداي قاجىرلى قايراتتى تالاپ ەتەتىن جۇمىستى كورمەنىڭ اياسىندا عانا ەمەس, ۇلكەن ارەنادا باعالاسا – نۇر ۇستىنە نۇر دەگەن تىلەگىن جەتكىزدى.
