«قازاقستان رەسپۋبليكاسى ۇلتتىق وليمپيدالىق كوميتەتى ۇجىمىنىڭ اتىنان جانە جەكە ءوز اتىمنان ورنى تولماس اۋىر قايعىعا بايلانىستى شىن جۇرەكتەن كوڭىل ايتامىن.
بۇل – بۇكىل سپورت قاۋىمداستىعى ءۇشىن عانا ەمەس, ونىڭ شاكىرتى رەتىندە مەن ءۇشىن دە اۋىر قازا. ۆيكتور كونستانتينوۆيچ تەك ۇزدىك جاتتىقتىرۋشى عانا ەمەس, ناعىز تالىمگەر, ۇستاز, ۇلگى بولاتىن جان ەدى. ونىڭ سپورتقا دەگەن ادالدىعى, كاسىبيلىگى جانە ءاربىر سپورتشىعا ەرەكشە كوزقاراسپەن قاراي ءبىلۋى ءبىزدىڭ جادىمىزدا ماڭگى ساقتالادى. ول قازاقستانداعى بوكستىڭ دامۋىنا ولشەۋسىز ۇلەس قوسىپ, تۇتاس ءبىر دارىندى سپورتشىلار بۋىنىن تاربيەلەپ شىعاردى.
ورىن تولماس اۋىر قازاعا بايلانىستى شىن جۇرەكتەن كوڭىل ايتامىن. ونىڭ جارقىن بەينەسى جۇرەگىمىزدە ماڭگى ساقتالادى», - دەيدى گەننادي گولوۆكين.
ايتا كەتەيىك, ۆيكتور دميتريەۆ 1953 جىلى 26 شىلدەدە قاراعاندىدا دۇنيەگە كەلگەن. اسكەردە قىزمەت ەتتى. ەڭبەك جولىندا الدىمەن تاۋ-كەن تەحنيكۋمىندا ماماندىق الدى, كەيىننەن كوستەنكو اتىنداعى شاحتادا جۇمىس ىستەدى, ارتىنشا پەداگوگيكالىق ينستيتۋتتىڭ «دەنە تاربيەسى» فاكۋلتەتىن ءبىتىردى. 1987 جىلدان باستاپ ونىڭ جاتتىقتىرۋشىلىق قىزمەتى باستالدى. الدىمەن «ەڭبەك رەزەرۆتەرى» قوعامىندا, سودان كەيىن قاراعاندى سپورت ۇيىمدارىندا ەڭبەك ەتتى.
جاتتىقتىرۋشىلىق ءوتىلى 40 جىلدان اسادى. ۆيكتور كونستانتينوۆيچ بوكستان وبلىستىق وليمپيادالىق رەزەرۆ مەكتەبىندە بالالاردى جاتتىقتىردى. ول قازاقستاننىڭ 10-نان استام سپورت شەبەرىن, سپورت شەبەرىنە 20 ۇمىتكەردى تاربيەلەدى. ونىڭ شاكىرتتەرى رەسپۋبليكالىق جانە حالىقارالىق جارىستاردا جەڭىسكە جەتتى. ال ەڭبەگىنىڭ ەڭ ۇلكەن جەتىستىگى گەننادي گولوۆكين بولىپ سانالادى.
