فوتو:اشىق دەرەككوز
ءماجىلىس دەپۋتاتى, اگرارلىق ماسەلەلەر كوميتەتىنىڭ مۇشەسى ايداربەك حودجانازاروۆتىڭ مالىمدەۋىنشە استىق ەكسپورتىنا ۇكىمەت 40 ميلليارد تەڭگە بولگەن.
«سوڭعى ەكى جىلدا لوگيستيكا شىعىندارى 30-40 پايىزعا ءوستى. ەگەر بۇل شىعىندار وتەلمەسە, وتاندىق وندىرۋشىلەردىڭ سىرتقى نارىققا ءونىم شىعارۋلارى قيىنداي تۇسەدى, باسەكەلەستىككە دە قاۋقارسىز بولارى انىق. بىراق ۇكىمەت دەر كەزىندە قولداۋ ءبىلدىرىپ, وتاندىق ءونىم ەۋروپا ودان سوڭ افريكا ەلدەرىنە تاسىمالدانىپ وتىر», دەءدى ا.حودجانازاروۆ.
قازىرگى كەزدە وتاندىق جۇمساق بيدايدىڭ العاشقى لەگى نورۆەگيا مەن ماروككوعا جونەلتىلدى. ۇلىبريتانيا مەن شوتلاندياعا جەتكىزۋ بويىنشا كەلىسىمشارتتار ەندى جاسالدى. سونىمەن قاتار بىرىككەن اراب امىرلىكتەرى, نيگەريا, سەنەگال, كوت-د’يۆۋار جانە سۋدان ەلدەرىنە دە ەكسپورت كولەمىن ۇلعايتۋ بويىنشا كەلىسسوز جۇرگىزىلىپ جاتىر.
«وتاندىق جۇمساق بيداي اتالعان ەلدەرگە 15 جىلدان استام ۋاقىت بويى ەكسپورتتالماعان. ءبىز جاڭا ەكسپورتتىق باعىتتاردى يگەرىپ جاتىرمىز. بۇل تەك لوگيستيكاداعى سەرپىلىس ەمەس, سونىمەن قاتار سىرتقى ەكونوميكالىق ستراتەگياداعى ماڭىزدى جەتىستىك», دەدى دەپۋتات.
جالپى ۇكىمەت بولگەن سۋبسيديا تەمىرجولمەن دە, تەڭىز ارقىلى دا تاسىمالداۋ تۇرلەرىن قامتيدى. قازىرگى تاڭدا 200 مىڭ توننادان استام ءونىم - سونىڭ ىشىندە بيداي, ارپا جانە باسقا دا ءداندى داقىلدار سىرتقى نارىققا شىعارىلدى. تاسىمالداۋ شىعىندارىن وتەۋگە بەرىلگەن وتىنىمدەردىڭ جالپى سوماسى 9 ميلليارد تەڭگەدەن اسقان. نەگىزى سۋبسيدياعا بولىنگەن قاراجات كوكتەمگى ەگىس جۇمىستارىن ۋاقتىلى جۇرگىزۋگە, بيىلعى ءونىمدى وڭدەپ, ساقتايتىن ورىنداردى بوساتۋعا جانە تۇتاستاي العاندا, وتاندىق استىقتىڭ حالىقارالىق نارىقتاعى باسەكەگە قابىلەتتىلىگىن ارتتىرۋعا مۇمكىندىك بەرەدى.
