ءبىز جەزكەنتتە اۋىر وندىرىستە ىستەيتىن ادال ازامات, ەڭبەك ادامدارىنىڭ وتباسى يبراەۆتىڭ ۇيىنە تۇستىك. ەرجان مەن كريستينا شىعىس ءتۇستى مەتاللۋرگيا كومپانياسىنىڭ ورلوۆ وندىرىستىك كەشەنىندەگى كەن بايىتۋ فابريكاسىندا جۇمىس ىستەيدى. كاسىپورىن مىس جانە مىرىش كونتسەنتراتى سياقتى ونىمدەردى شىعارادى.
«مەن 2013 جىلدان ورلوۆ كەن بايىتۋ فابريكاسىندا سۇزگىلەۋ جانە كەپتىرۋ ءبولىمىنىڭ شەبەرى بولىپ ىستەيمىن. جۇبايىم ورىس ۇلتىنىڭ وكىلى كريستينا يبراەۆا تەحنيكالىق باقىلاۋ بولىمىندە جۇمىس ىستەيدى. ءبىز 2018 جىلى وتاۋ كوتەردىك. سودان بەرى وندىرىستە بىرگە ىستەپ كەلەمىز», دەيدى ەرجان يبراەۆ.
ءبىر قىزىعى, كريستينانىڭ ءبولىمى ەرجاننىڭ شىعارعان ءونىمىن تەكسەرەدى ەكەن. بۇل – ولاردىڭ جۇمىسىنا دەگەن جاۋاپكەرشىلىگىن ارتتىرا تۇسسە كەرەك. ء«ونىم ساپاسىز وتسە, ۇيگە كەلگەندە دە وڭاي بولمايدى» دەيدى ەرجان ازىلدەپ. بىراق وسى ءازىلدىڭ استارىندا شىندىق جاتىر, ولاردىڭ كاسىبيلىگى مەن ءوز ىسىنە ادالدىعى ءبىرىن-ءبىرى تولىقتىرىپ-اق تۇرعانداي.
ەرجان مەن كريستينا – جەزكەنتتەگى جۇزدەگەن ءوندىرىس ادامدارىنىڭ ءبىر كورىنىسى عانا. مۇندا ءدال وسىنداي جۇپ كوپ. ءتۇرلى ۇلت وكىلدەرىنىڭ ءبىر ماقساتقا جۇمىلىپ, اۋىر ەڭبەكتىڭ قىزىعى مەن شىجىعىن بىرگە كورۋى – بۇل كەنتكە ءتان كورىنىس. ءبارىنىڭ ەڭبەككە دەگەن قۇرمەتى, تاتۋلىققا دەگەن سەنىمى مول.
ء«وندىرىس تەك تەحنيكا مەن تەمىر ەمەس. بۇل – ادامداردىڭ ەڭبەگىمەن, سەنىمىمەن جۇرەتىن ءتىرى ورگانيزم سياقتى. مۇندا شىنايىلىق پەن تاتۋلىق بولماسا, ەشتەڭە جۇرمەيدى», دەيدى كريستينا.
راسىمەن دە, جەزكەنتتىڭ وزگەشە وتباسىلارى – ەل ىشىندەگى ۇلكەن بىرلىك پەن ەڭبەك مادەنيەتىنىڭ ايناسى ىسپەتتەس. سول ارقىلى اۋىلدىڭ دا, ءوندىرىستىڭ دە كەلەشەگىن بىرگە قۇرىپ كەلەدى.
بۇل كەنت كەن عانا ەمەس, ەلگە دە كەندە ەمەس. وندا ءارتۇرلى ۇلت وكىلدەرى تاتۋ-ءتاتتى ءومىر ءسۇرىپ جاتىر. ءبارىنىڭ بالالارى ءبىر مەكتەپكە بارىپ, ءبىر كوشەدە ويناپ وسكەن. ۇلت پەن ۇلىسقا قاراماي, ءبارى دە كەن ورىندارىندا يىق تىرەستىرىپ جۇمىس ىستەيدى. ءار ۇيدە ەڭبەك – باستى قۇندىلىق. وسى ورتادا ءوسىپ-جەتىلگەن ەرجان مەن كريستينانىڭ وتباسىلىق ءومىرى دە سول ورتاق مادەنيەتتىڭ جەمىسى ىسپەتتى.
ەرجان سەرىك ۇلىنىڭ اتا-اناسى دا كەزىندە وسى كەنتتەگى كەن بايىتۋ وندىرىسىندە جۇمىس ىستەگەن, ەلگە ەڭبەگى سىڭگەن وتباسى ەكەن. جەزكەنتتە ءار ۇلت ءوز ءتىلىن, سالتىن ساقتاي وتىرىپ, ورتاق قۇندىلىق – بىرلىك پەن ەڭبەك جوعارى قويادى.
بۇگىندە ەرجان مەن كريستينا دا جاس ماماندارعا باعىت-باعدار بەرىپ, تاجىريبەلەرىمەن ءبولىسىپ ءجۇر. ولاردىڭ ايتۋىنشا, وندىرىستەگى ۇيلەسىم – تەك تەحنيكاداعى ەمەس, ادامدار اراسىنداعى سەنىم مەن سىيلاستىقتا. «قيىن جۇمىس تا جەڭىل وتەدى, ەگەر اينالاڭدا ءبىر-ءبىرىڭدى قولدايتىن ورتا بولسا», دەيدى ولار. جەزكەنت – ەل ىشىندەگى قاراپايىم عانا كەنت ەمەس, بۇل – كوپۇلتتى ەڭبەك ادامىنىڭ بىرلىكتە ءومىر سۇرە الاتىنىن دالەلدەيتىن اۋىل. ال يبراەۆتار سىندى وتباسىلار – ەلدىڭ ەرتەڭىنە ۇمىتپەن قاراۋعا نەگىز بولا الادى.
