كوللاجدى جاساعان – زاۋرەش سماعۇل ,«EQ»
وسى كىتاپتىڭ قالاي جازىلعانىن دا بىلەتىن ەدىم. ەكى, الدە ءۇش جىل بويى تىنىمسىز ەڭبەك ەتتى. تۋعان جەر تۋرالى تولعانىس, اۋىلدىڭ العاشقى قازىعىن قاققاننان بەرى ءوسىپ-وركەندەۋ جولى. ەل بايلىعىن ەسەلەگەن ەڭبەكقور ادامدار, ەكىنشى دۇنيەجۇزىلىك سوعىستا جات جەردە قالعان بوزداقتار, سوعىستان امان كەلىپ, تۋعان جەردىڭ ءتۇتىنىن ءتۇزۋ ۇشىرۋعا ۇلەس قوسقاندار. ەل ىشىندەگى بەرەكە-بىرلىككە ۇيىتقى بولعان جاقسى مەن جايساڭ, كوپبالالى انالار. كىم جوق دەيسىز ءتايىرى, وسى توپىراقتا كىندىك قانى تامعان قانشاما جۇرت. تۇگەلگە جۋىق بولار.
اپتا ارالاتىپ, اي ارالاتىپ اقساقال كابينەتىمنىڭ تابالدىرىعىنان اتتاپ كەلەر ەدى. جاڭا ءبىر دەرەك تاۋىپ اكەلىپتى, جاڭا ءبىر اڭگىمە ەستىپتى. سونى جيناعىنا قوسىپ, مازمۇنىن بايىتپاق, ماعىناسىن ۇستەمەك. قولقاسى دا بار. ايتارى «مەن جازۋشى ەمەسپىن عوي, مىنا ءبىر سويلەمدەردىڭ مۇرتىن باسىپ بەرشى». ۇلكەننىڭ ءسوزىن دالاعا تاستاۋعا بولمايدى. بىلگەنىمىزشە كومەك كورسەتتىك. مۇنداي دۇنيەلەرگە مۇقيات بولۋ كەرەك. شىنىندا سولاي-اۋ, ەرتەڭ وسى اۋىل تۋرالى ماعلۇمات ىزدەر جان بولسا, كەرەك دۇنيەسىنىڭ ءبارىن وسى جيناقتان تابارى ءسوزسىز.
«مەن دە اۋىلىم تۋرالى كىتاپ جازىپ ەدىم, – دەدى قاسىمدا وتىرعان كوپشىلىككە تانىمال كوشەلى كىسى. – ءتاپ-ءتاۋىر جيناق بولىپ شىقتى. كەيىن اۋىلداستارىما ەكى مىڭ تەڭگەدەن ساتىپ الىڭدار دەسەم, ەشقايسىسى العىسى كەلمەيدى. ىشىندە وزدەرىنىڭ اكەلەرى مەن اتالارى تۋرالى دەرەكتەر بار».
الدەن ۋاقىتتا سىرتى ادەمى بەزەندىرىلگەن, قاپ-قالىڭ جيناقتىڭ تۇساۋى كەسىلىپ, شاشۋ شاشىلدى. ادەتتەگىدەي ءسوز سويلەنگەن. باسپاحانادان جاڭا شىققان, سياسى ءالى كەپپەگەن جيناقتى وقىماسا دا, كودەدەي كوپ شەشەن قيالاي تارتقان. بىرىنەن ءبىرى اسىرىپ ماقتاپ جاتىر. ءسوز سوڭىندا ەل مۇراسىنا ءوز ۇلەسىن قوسقان اقساقال بۇگىنگى شارۋاسىنىڭ ءمانى تۋرالى قىسقاشا ايتىپ ءوتتى. ويىن تۇيىندەي كەلە, كىتاپحانانىڭ ىرگەسىندەگى ءدامحانادا داستارقاننىڭ جايۋلى تۇرعاندىعىن ايتىپ, تۇساۋكەسەرگە قاتىسقان تىلەكتەس, نيەتتەس اعايىندى سوندا شاقىردى. ءدال وسى ءسوزدى توسىپ وتىرعانداي وشارىلعان توپ دۇرك ەتىپ كوتەرىلگەن. كوپتىڭ سوڭىن الا ءبىز دە شىقتىق. شىعىپ بارا جاتىپ قاراسام, الدىڭعى ورىندىقتاردا جاڭا عانا اقساقال سىيلاعان ون شاقتى كىتاپ قالىپ بارادى ەكەن. قاپ...
كوكشەتاۋ
