فوتو: egemen.kz/ ەرلان ومار
ماكروەكونوميكالىق شولۋدا بولجام مۇناي باعاسى بويىنشا العىشارتتىڭ تومەندەۋىن ەسكەرە وتىرىپ جاسالعانى ايتىلعان. Brent ماركالى مۇنايدىڭ ورتاشا جىلدىق باعاسى باررەلىنە 74,6 دوللار بولادى دەگەن بولجام بار.
قاڭتار ايىنداعى بولجامدا مۇناي باعاسى باررەلىنە $81 بولادى دەپ بولجانعان ەدى.
«العىشارتتىڭ $6,4 تومەندەۋى گەوساياسي تاۋەكەلدەردىڭ كۇشەيۋىنە بايلانىستى. اتاپ ايتقاندا كانادا, مەكسيكا جانە قىتايدى قوسا العاندا, بىرقاتار ساۋدا سەرىكتەستەرىنە قاتىستى يمپورتتىق تاريفتەر مەن باج سالىقتارىن ەنگىزۋ تۋرالى جاريالاعان اقش پرەزيدەنتى اكىمشىلىگىنىڭ ارەكەتتەرىنە بايلانىستى», دەلىنگەن شولۋدا.
ۇلتتىق ۆاليۋتا باعامى ناۋرىزدا نىعايسا دا ساۋىردە السىرەي باستادى. ءبىرىنشى توقساندا USD/KZT جۇبى ءبىر دوللار ءۇشىن 510,17 تەڭگە دەڭگەيىندە قالىپتاستى. ساۋىردەگى تەڭگە السىرەۋى فاكتورلارىنىڭ ىشىندە - مۇناي باعاسىنىڭ قۇلدىراۋى دا بار. ءوز كەزەگىندە, ساۋىردە ۇلتتىق بانكتىڭ ۆاليۋتالىق نارىقتاعى وپەراتسيالارى بيۋدجەتكە ترانسفەرتتەردى جۇزەگە اسىرۋ شەڭبەرىندە تەڭگەگە قولداۋ كورسەتتى.
29 ساۋىردەگى مالىمەت بويىنشا ۇلتتىق ۆاليۋتانىڭ ورتاشا باعامى 512,19 قۇرادى. الماتىنىڭ ايىرباستاۋشىلارى دوللاردى ورتاشا ەسەپپەن 511,85-كە ساتىپ الىپ, 513,95-كە ساتادى. استانادا 510-نان ساتىپ الىپ, 516-دان ساتادى. Halyk Finance ساراپشىلارى ايدىڭ سوڭىندا باعامدى 505-515 تەڭگە شاماسىندا بولجاعان. ساراپشىلار ۇلتتىق ۆاليۋتاعا قىسىم ۋكرايناداعى جاعداي بويىنشا كەلىسسوزدەردىڭ ۇزاققا سوزىلۋى سالدارىنان رەسەيلىك ءرۋبلدىڭ السىرەۋىنەن بولۋى مۇمكىن ەكەنىن جەتكىزدى.
