ەل ىرىسىن ەسەلەۋگە ءازىر

بىلتىر وبلىس ديقاندارى رەكوردتىق مولشەردە استىق جيناپ, ايدى اسپانعا شىعاردى. بۇل ورايدا ولاردىڭ پىكى­رىنشە مەملەكەتتىك قولداۋدىڭ كومەگى مولىنان تيگەن. بيىل سول جوعارى قارقىندى ساقتاپ قالۋ, ودان ءارى دامىتۋ مىندەتى جۇك­تەلىپ وتىر. مەملەكەتتىك قولداۋ تۋرالى ايت­­قان­دا «كەڭ دالا-2» باعدارلاماسى ايا­سىندا جەڭىل­دەتىلگەن نەسيەنىڭ ءوڭىر ديقان­دا­رى­نا وتكەن جىلدىڭ قاراشا ايىنان باستاپ بەرىلە باس­تاعانىنا ەرەكشە توقتالعان ءجون.

– بۇل – جاعىمدى جاڭالىق, – دەيدى زەرەندى اۋدانىنداعى «قۇلان» شارۋا قوجالىعىنىڭ وكىلى قۇلان بولاتوۆ, – بۇرىن نەسيە قولىمىزعا كەش تيەتىن, قام­دانىپ ۇلگەرە المايتىن ەدىك. جاز­دىڭ قامىن قىستا جەپ, ماتەريالدىق-تەحنيكالىق بازامىزدى نىعايتۋعا مول مۇمكىندىك تۋىپ وتىر. ەگىس جۇمىستارىنا ساپالى دايىندالۋ ءۇشىن الدىمەن قولدا بار تەحنيكامىزدى جوندەپ الدىق. ساپالى تۇقىمدى دا قاراستىردىق. قاجەت بولىپ قالۋى مۇمكىن قوسالقى بولشەكتەر قورىن جاسادىق. وسىنىڭ بارلىعى – نەسيەنىڭ ەرتە بەرىلگەنىنەن.

بۇگىندە وبلىستىڭ 600 فەرمەرى 66 ملرد تەڭگەنىڭ جەڭىلدەتىلگەن نەسيەسىن الىپ ۇلگەرگەن. جالپى, وبلىس بويىنشا 94,7 ملرد تەڭگەگە ءوتىنىش تۇسكەن. قازىر قوسىمشا قاراجات قاراستىرىلىپ جاتىر. تاياۋدا وتكەن وبلىستىق اگرارلىق كەڭەستە ءسوز سويلەگەن اۋىل شارۋاشىلىعى ۆيتسە-ءمينيسترى ازات سۇلتانوۆ اگرارشىلاردى ونىمدىلىك پەن تيىمدىلىكتى ارتتىرۋ ءۇشىن بارلىق قولجەتىمدى تەتىكتى پايدالانۋعا شاقىردى.

– بىلتىر باستالعان جەڭىل­دەتىلگەن نەسيە بەرۋ كومەگى بيىل دا جالعاسىن تابادى ءارى كولە­مى ۇلعايتىلدى. سولتۇستىك وڭىر­دەگى احۋال اۋا رايىنا تىكەلەي تاۋەل­­دى. بىراق ءونىم ساپاسىنا مەي­­­­لىنشە ءمان بەرىلۋى كەرەك. اگ­رار­­­لىق نەسيە كورپوراتسياسى, ەكىن­­شى دەڭگەيلى بانكتەر, نە­سيە­لىك سەرىكتەستىكتەر, وڭىرلىك ين­ۆەس­­تي­تسيالىق ورتالىقتار مەن ميكرو­­قار­جىلىق ۇيىمدار ارقى­لى نە­سيە الۋعا ابدەن بولادى, – دەدى.

ۆيتسە-ءمينيستردىڭ مالىمەتىنە قارا­عاندا, بيىل اۋىل شارۋا­شى­لىعى سالا­سىنىڭ ەڭبەككەرلەرى ءۇشىن ايتا قالار­لىقتاي جاڭالىق بار. جەڭىلدەتىلگەن ليزينگ ارقى­لى قارجىلاندىرۋ كولەمى 200 ملرد تەڭگەگە دەيىن كوبەيگەن. ال فورۆاردتىق ساتىپ الۋ باع­دارلاماسى بويىنشا 30 ملرد تەڭگە كولەمىندە قارجى بولىنگەن. وبلىستا كوكتەمگى ەگىس ناۋقانىن ۇيىمشىلدىقپەن ۇيىمداستىرۋعا قاجەتتى رەسۋرس جەتكىلىكتى. وبلىس اكىمىنىڭ ورىنباسارى مۇرات بالپاننىڭ ايتۋىنشا, بيىل 5,4 ملن گەكتار القاپقا ءدان سىڭىرىلمەك.

ءوڭىردىڭ اگروونەركاسىپتىك كەشەنىن دامىتۋعا 200 ملرد تەڭگە ءبولىندى. ونىڭ 63,3 ملرد تەڭگەسى سۋبسيديا بولسا, 140 ملرد تەڭگەگە جۋىعى – جەڭىلدەتىلگەن نەسيە مەن فورۆاردتىق ساتىپ الۋ. ونىمدىلىكتى ارتتىرۋ ماقساتىندا ەگىس القاپتارىنا 336 مىڭ توننا مينەرالدى تىڭايتقىش ەنگىزۋ جوسپارلانعان. وتكەن جىلمەن سالىستىرعاندا تىڭايتقىش ەنگىزىلگەن القاپتار كولەمى 78 مىڭ گەكتارعا كوبەيمەك. كۇنى بۇگىنگە دەيىن 66,9 مىڭ توننا تىڭايتقىش الۋعا 226 كەلىسىم جاسالدى. ساپالى تۇقىممەن قامتاماسىز ەتۋ بويىنشا دا اۋقىمدى جۇمىس اتقارىلدى. قازىر بارلىق تەحنيكا دايىن. كوكتەمگى ەگىس جۇمىسىنا 37 مىڭ تەحنيكا قاتىستىرىلماق.

اقمولا وبلىسى