تۇرعىنداردىڭ ايتۋىنا قاراعاندا, شاقپاق تاس توسەلىپ, تابيعي سۋاعارلاردى جاۋىپ تاستاعان.
– وسىدان ەكى جىل بۇرىن قۇرىلىسشىلار ىسكە كىرىسكەندە توبەمىز كوككە ەكى-اق ەلى جەتپەي قالدى, – دەيدى قالا تۇرعىنى جاسۇلان كارىباەۆ. – اۋەلگى جوسپار بويىنشا ورمان شوقتارىنىڭ ەتەگىن كادىمگى ساياباققا اينالدىرماق ەدى. جاياۋ جۇرگىنشىلەر جولى توسەلىپ, جايلى ورىندىقتار قويىلماق. سام جامىراعاندا اسپالى شامدار توڭىرەكتى كۇندىزگىدەي جاپ-جارىق ەتپەك. حالىق سەنگەن. سەنگەن سوڭ قۋانعان. ەرتەگىدەي ادەمى جوسپار ورىندالا قويماپتى. ورىندىق تا, شام دا جوق. ساياباق دەگەن اتاۋى عانا, سايا بولاتىن ەشتەڭە كورىنبەيدى. شاقپاق تاستار توسەلگەن جول كوكتەمگى قىزىل سۋدىڭ جولىن بوگەپ, قورىسقا اينالدى. وتكەن جىلعى كوكتەمدە ەرىگەن قار سۋى لىقىلداپ اعىپ كەلىپ, جولعا تىرەلگەن. ىلعالعا مەلتەكتەگەن قىرۋار اعاش ءشىري باستادى.
جەرگىلىكتى تۇرعىندار ساعى سىنعان ساياباقتىڭ جايىن ايتىپ جەرگىلىكتى اكىمدىككە حات جولداعان. ءتىپتى وبلىستىق ورمان شارۋاشىلىعى جانە جانۋارلار الەمى اۋماقتىق ينسپەكتسياسىنا دا ۇجىمدىق شاعىم جولداسا كەرەك. ارىز-شاعىمنان كەيىن بۇلاندى اۋداندىق تۇرعىن ءۇي-كوممۋنالدىق شارۋاشىلىعى ءبولىمى, قالالىق ءماسليحات وكىلدەرى, قالا اكىمى كەلىپ, ساياباقتى كوزدەرىمەن كورىپ, از ۋاقىتتىڭ ىشىندە ءبارىن تارتىپكە كەلتىرەمىز دەپ سەندىرگەن. ايتسە دە ەشقايسىسى جاز بويى ات ءىزىن سالماپتى. وتكەن جىلعى ۇجىمدىق شاعىمعا اۋدان باسشىلارى ارناۋلى تەحنيكانىڭ كومەگىمەن سۋ وتكىزەتىن قۇبىرلار ورناتىلدى, جينالىپ قالعان سۋ توگىلدى. بارلىق كەمشىلىك جويىلىپ, ورنىنا كەلتىرىلدى دەگەن جاۋاپ كەلگەن.
شىن مانىندە بۇل جەرگە ەشكىم دە كەلگەن جوق دەيدى قالا تۇرعىندارى. پارك ماڭىنداعى تۇرعىنداردىڭ ايتۋلارىنا قاراعاندا, بۇرىن سۋاعارلار سەپتىگىن تيگىزىپ تۇرسا كەرەك. كوكتەمگى قار سۋى جىرالار ارقىلى تومەنگە اعىپ كەتەتىن بولعان. قازىر بۇل جىرالار جابىلىپ قالعان. كەسىرى قىرۋار اعاشقا ءتيدى. جاز بويى باقا باسىپ كەتەدى. باتپاققا اينالعان جەردىڭ ماساسى مەن شىبىن-شىركەيى بۋىپ تۇرادى. ساسىق ءيىسى قولقانى قابادى. ساياباق ىشىندەگى جاياۋ جۇرگىنشىلەر جۇرەتىن جولدىڭ ءوزى ساپاسىز سالىنعان. بىرەۋى جاڭا پايدا بولعان كولشىككە كەلىپ تىرەلسە, ەكىنشىسى كۇرت ۇزىلەدى.
ساياباقتى ساقتاپ قالامىز دەگەن ىنتا بولعانىمەن, ناقتىلى جۇمىس جوقتىڭ قاسى. بۇلاندى اۋداندىق تۇرعىن ءۇي كوممۋنالدىق شارۋاشىلىعى ءبولىمىنىڭ باسشىسى اسىلبەك ەسىموۆتىڭ پىكىرىنشە, ساياباقتى جوندەۋدەن وتكىزۋدى كوزدەگەن جوبا قارجىنىڭ جەتىمسىزدىگىنەن توقتاپ قالعان. كونكۋرس ەرتە وتكىزىلگەن, مەردىگەر انىقتالعان. ايتسە دە قارجى جوق.
– قازىر ساياباقتاعى سۋدى اعىزىپ جىبەردىك, ەندى سۋ وتكىزەتىن قۇبىردى قاي جەرگە ورناتۋ تۋرالى اقىلداسۋدامىز, جەردىڭ كەبۋىن توسىپ وتىرمىز, – دەيدى ءبولىم باسشىسى. – بالكىم مامىر ايىنىڭ ەكىنشى جارتىسىندا باستالىپ قالۋى مۇمكىن. جوبانى جۇمىستى باستاعان كومپانيا اياقتاماق. ولار سۋ شايىپ كەتكەن الاڭقايلاردى دا تارتىپكە كەلتىرەدى.
قىرۋار جۇمىس كۇتىپ تۇر. قالا تۇرعىندارى ساياباقتىڭ ءسانىن كەلەتىندىگىنەن ءۇمىتتى.
اقمولا وبلىسى,
بۇلاندى اۋدانى
