فوتو: freepik.com
دينارا زاكيەۆانىڭ حابارلاۋىنشا, ساۋالناما مەملەكەت باسشىسىنىڭ تاپسىرماسى اياسىندا بالا قۇقىقتارىن قورعاۋ كوميتەتىمەن جانە وزگە دە مەملەكەتتىك ورگاندارمەن بىرلەسىپ, قاراساي, بالقاش, تالعار, ىلە, ەڭبەكشىقازاق جانە جامبىل اۋداندارىنداعى مەكتەپتەردە وتكىزىلگەن.
«وكىنىشكە قاراي, الماتى وبلىسى ىلە اۋدانىندا وقۋشىنىڭ باسقا بالالارعا قاتىستى جاساعان زورلىق-زومبىلىعى – بۇل وبلىس مەكتەپتەرىندەگى ۇلكەن جۇيەلى پروبلەمانىڭ ءبىر كورىنىسى. وبلىس وقۋشىلارىنىڭ اراسىندا ءانونيمدى ساۋالناما جۇرگىزدىك, سونداي-اق ولاردىڭ انكەتالارىن زەرتتەدىك. ناتيجەلەرى ءبىزدى سەلت ەتكىزدى», دەدى ول.
ساۋالناما قورىتىندىسى بويىنشا كەلەسىدەي زاڭبۇزۋشىلىقتار انىقتالعان:
- اقشا بوپسالاۋ, تاماق تارتىپ الۋ جانە مۇعالىمدەر تاراپىنان كۇش قولدانۋ;
- دەنە شىنىقتىرۋ جانە الگەبرا ءپانى مۇعالىمدەرىنىڭ وقۋشىلارعا ءتيىسۋى;
- ەڭبەكشىقازاق اۋدانىندا مۇعالىمدەر تاراپىنان بولعان زورلىقتان كەيىن ەكى وقۋشىنىڭ اۋرۋحاناعا ءتۇسۋى;
- جامبىل اۋدانىندا 5-سىنىپ وقۋشىسىن توپ بولىپ ۇرۋ;
- 50 بالا قاتىسقان جاپپاي توبەلەس, جانە ۇلكەن سىنىپ وقۋشىلارىنىڭ كىشىلەردەن اقشا بوپسالاۋى;
ومبۋدسمەننىڭ ايتۋىنشا, مەكتەپ اكىمشىلىكتەرى قۇقىقبۇزۋشىلىقتاردى جاسىرىپ وتىر نەمەسە مۇلدە نازار اۋدارمايدى. مەكتەپتەردە جۇرگىزىلگەن ساۋالنامادا بالالار بۋللينگ پەن بوپسالاۋ بار ەكەنىن كورسەتكەنىمەن, رەسمي ەسەپتەردە بۇل كورسەتكىشتەر 0% دەپ كورسەتىلگەن.
«بۇل الماتى وبلىسىنداعى تاربيە جۇمىسىنىڭ جانە قۇقىقتىق نورمالاردىڭ ورىندالۋى وتە تومەن دەڭگەيدە ەكەنىن كورسەتەدى. اتالمىش فاكتىلەردىڭ ءبارىن ءبىز وبلىس باسشىلىعى, پوليتسيا جانە وزگە باسقارمالارمەن وتكەن قورىتىندى جينالىستا جاريا ەتتىك. سونداي-اق ءبىز وبلىسقا جانە ۋاكىلەتتى مەملەكەتتىك ورگاندارعا جولداناتىن انىقتاما دايىندادىق», دەدى دينارا زاكيەۆا.
