قازاق ەلىنىڭ ازاتتىعى جولىندا جانكەشتى قىزمەت ەتكەن, ۇلتىنىڭ بولاشاعى ءۇشىن بۇكىل عۇمىرىن سارپ ەتكەن ۇلت زيالىلارىنىڭ ءبىرى عۇمار قاراشتىڭ مەرەيتويىنا بايلانىستى ءىس-شارالار باتىس قازاقستان وبلىسىندا باستالىپ كەتتى.
وسىدان بۇرىن جانىبەك اۋداندىق اكىمدىگى وبلىس ورتالىعىندا زيالى قاۋىم وكىلدەرىمەن, ولكەتانۋشىلارمەن كەزدەسۋ وتكىزىپ, مەرەيتويلىق ءىس-شارالاردىڭ بارىسىن اقىلداسقان بولاتىن. وبلىستىق دەڭگەيدە عۇمار قاراش وقۋلارى ءوتىپ, جاس ورەندەر اقىن-اعارتۋشىنىڭ شىعارماشىلىعىنا بويلادى. ايتا كەتەيىك, جانىبەك اۋدانىنىڭ بورسى اۋىلىنداعى عۇمار قاراش كەسەنەسى – ەلىمىزدىڭ جالپىۇلتتىق كيەلى نىساندارى تىزىمىنە ەنگىزىلگەن زيارات ورنى. اقىن مەرەيتويىنا جوسپارلانعان جيىنداردىڭ ءبىر پاراسى سول جەردە وتەدى.
مۋزەيدە اشىلعان شاعىن كورمەدە اقىننىڭ سۋرەتتەرى, ءوز قولىمەن تولتىرعان انكەتا پاراعى, نەمەرەسى ءناديا قاراشەۆانىڭ تۇزگەن اتا-تەك شەجىرەسى, اقىن قاپيادا قازا بولعان 1921 جىلعى 12 ساۋىردە وردادان ورىنبورعا جىبەرىلگەن قارالى جەدەلحات سەكىلدى قۇجاتتار قويىلعان ەكەن.
- بۇل قۇجاتتاردىڭ باسىم بولىگىن تىرنەكتەپ جيناعان – بەلگىلى جيداشى, تاريحشى مۇستافا ىسماعۇلوۆ اعامىز ەدى. ول كىسى ءومىر بويى بوكەيلىكتىڭ تاريحىن تۇگەندەپ ءوتتى. ارتىندا قالعان مول مۇراسىنىڭ قوماقتى بولىگى قازىر باتىس قازاقستان وبلىستىق تاريحي-ولكەتانۋ مۋزەيىنىڭ قورىندا ساقتاۋلى تۇر, - دەيدى مۋزەي ارداگەرى, قازاقستان رەسپۋبليكاسىنا ەڭبەگى سىڭگەن قايراتكەرى سارا تاناباەۆا.
ورال قالالىق كىتاپحانالار جۇيەسى مەن ح.ەسەنجانوۆ اتىنداعى وبلىستىق بالالار مەن جاسوسپىرىمدەر كىتاپحاناسىنىڭ قىزمەتكەرلەرى, باتىس قازاقستان ينجەنەرلىك-تەحنيكالىق ۋنيۆەرسيتەتى, ماحامبەت وتەمىس ۇلى اتىنداعى باتىس قازاقستان ۋنيۆەرسيتەتى, جاھانشا دوسمۇحامەدوۆ اتىنداعى جوعارى پەداگوگيكالىق كولەدجى وقىتۋشىلارى مەن ستۋدەنتتەرى, مۋزەي قىزمەتكەرلەرى قاتىسقان جيىندا ارداگەر ولكەتانۋشى تيحون الىپقاليەۆ تە تاريحي تۇلعانىڭ ءومىرى مەن ەڭبەگىن ناسيحاتتاۋ قاجەتتىگىن ايتتى.
عۇمار قاراش – ۇلت رۋحانياتىنا ەرەكشە ەڭبەگى سىڭگەن, ۇلتىمىزدىڭ ازاتتىعى مەن بولاشاعى جولىندا قالامىمەن دە, ىسىمەن دە كۇرەسكەن تۇلعا. كورمە بارىسىندا ستۋدەنتتەر اقىن ولەڭدەرىن جاتقا وقىپ, كەزدەسۋدىڭ مازمۇنىن بايىتا ءتۇستى.
باتىس قازاقستان وبلىسى
