جۇرگىزىلگەن رەيدتەر ناتيجەسىندە ستيحيالىق ساۋدانىڭ 75-تەن استام نۇكتەسى جويىلىپ, جوسىقسىز كاسىپكەرلەر جاۋاپقا تارتىلدى.
مەگاپوليستە ستيحيالىق ساۋدا فاكتىلەرىن انىقتاۋ جانە جويۋ, سونداي-اق زاڭسىز ورناتىلعان ساۋدا وبەكتىلەرىن بولشەكتەۋ جونىندەگى اۋقىمدى شارا 15 ساۋىردە باستالعان. ۋاكىلەتتى ورگاندار پوليتسيا دەپارتامەنتىمەن بىرلەسىپ سانكتسيالانباعان ساۋدانىڭ 143 جاعدايىن (قر اقبتك 204-بابى) جانە اباتتاندىرۋ قاعيدالارىن بۇزۋدىڭ 96-بابىن (قر اقبتك 505-بابى) انىقتاعان.
ناۋقاننىڭ باستى ماقساتى – رەتسىز ساۋدانى جويۋ مەن قالانىڭ ەستەتيكالىق كەلبەتىن ساقتاۋ. قالا بيلىگى جۇمىسى توقتاعان كاسىپكەرلەرگە زاڭدى تۇردە جۇمىس ىستەۋ ءۇشىن ارنايى ورىندار ۇسىنباق. تۇرعىندار قالانىڭ ءار اۋدانىندا جۇرگىزىلىپ جاتقان بۇل جۇمىستاردى قولدايتىندارىن ايتتى.
«ستيحيالىق ساۋدا كوبىنە جاياۋ جۇرگىنشىلەر جولدارىن, ايالدامالاردى, قوعامدىق ورىنداردى باسىپ الىپ, قالا كەلبەتىنە كەرى اسەر ەتەدى. مۇنداي ساۋدا نۇكتەلەرى سانيتاريالىق تالاپتارعا ساي ەمەس, ءونىم ساپاسى تەكسەرىلمەيدى. ءبىزدىڭ تۇرعىن ءۇي اۋلاسىنا جاقىن ورنالاسقان فاستفۋد ساتاتىن دۇڭگىرشەك ماڭى ۇنەمى لاستانىپ, قوقىستان كوز اشپايتىن ەدىك. تۇرعىندار تالابى ەسكەرىلىپ, نىسان ءسۇرىلدى», دەيدى اۋەزوۆ اۋدانىنىڭ تۇرعىنى ءلاززات ءابجامالوۆا.
