ماجىلىستە مەملەكەت باسشىسىنىڭ سىبايلاس جەمقورلىقتىڭ الدىن الۋ, سەبەپتەرى مەن جاعدايلارىن جويۋعا قاتىستى تاپسىرمالارىن ورىنداۋ ماسەلەسى نەگىزگى نازارعا الىندى.
رەسمي مالىمەتكە سۇيەنسەك, ءبىرىنشى توقساندا 67 تالداۋ مەن مونيتورينگ جۇرگىزىلىپ, 500-دەن استام ۇسىنىم ازىرلەندى. تۋريزم جانە مەكتەپكە دەيىنگى ءبىلىم بەرۋ سالالارىندا انىقتالعان جۇيەلى تاۋەكەلدەر بويىنشا حالىقارالىق تاجىريبەگە سۇيەنە وتىرىپ, ناقتى شارالار ۇسىنىلدى.
بيۋدجەت قارجىسىنىڭ ءتيىمدى جۇمسالۋىنا باقىلاۋ ناتيجەسىندە جىل باسىنان بەرى 21,2 ملرد تەڭگە كولەمىندەگى ۇتىمسىز شىعىننىڭ الدىن الىندى. ونىڭ ىشىندە 6,4 ملرد تەڭگە بيۋدجەتكە قايتارىلدى. ماسەلەن, جەزقازعان قالاسىندا جولدارعا ارتىق بولىنگەن 350 ملن تەڭگە ۇنەمدەلدى, ال قوناەۆ قالاسىندا جەر ۋچاسكەلەرىنىڭ قۇنىن ارتتىرۋ فاكتىلەرى توقتاتىلدى. جامبىل وبلىسىندا ءتۋريزمدى دامىتۋعا بولىنگەن 208 ملن تەڭگە ماقساتسىز جۇمسالۋدان ساقتالدى.
الدىن الۋ ماقساتىندا اكىمشىلىك تاجىريبە دە قولدانىلدى: توقسان ىشىندە 18 ادام جاۋاپكەرشىلىككە تارتىلىپ, 5 ملن تەڭگەدەن استام ايىپپۇل سالىندى. كوبىنە مۇددەلەر قاقتىعىسى جانە بيزنەسكە زاڭسىز ارالاسۋ فاكتىلەرى تىركەلگەن.
اگەنتتىك باسشىلىعى بيزنەس قۇقىعىن قورعاۋ باعىتىنداعى جۇمىستاردى دا جالعاستىرۋدا. «بيزنەسكە جول» جوباسى اياسىندا 3 مىڭعا جۋىق كاسىپكەردىڭ قۇقىعى قورعالىپ, 24 تۇيتكىلدى ءىس شەشىمىن تاپتى. ماسەلەن, جەتىسۋ وبلىسىندا سۋ تاريفتەرى قايتا قارالىپ, كاسىپكەرلەرگە 23 ملن تەڭگە ۇنەمدەۋگە مۇمكىندىك تۋدى.
سونىمەن بىرگە, قوعامدا پاراساتتىلىق پەن زاڭدىلىق قاعيداتتارىن نىعايتۋعا باعىتتالعان اعارتۋشىلىق جۇمىستار جالعاسىپ جاتىر. ءبىرىنشى توقساندا 450 مىڭعا جۋىق ازاماتتى قامتىعان 3 مىڭنان استام ءىس-شارا وتكىزىلدى.
كەڭەس بارىسىندا وڭىرلىك دەپارتامەنتتەردىڭ جەدەل جانە تەرگەۋ قىزمەتى قورىتىندىلانىپ, سىبايلاس جەمقورلىق قىلمىستارىنان كەلگەن زالالدى وتەۋ بويىنشا اتقارىلعان جۇمىستاردىڭ تيىمدىلىگى باعالاندى.
