فوتو: ۇلتتىق تەستىلەۋ ورتالىعى
216 مىڭعا جۋىق تالاپكەر تەستىلەۋگە قاتىسۋعا ەكى مۇمكىندىكتى ەسەپكە العاندا 399 مىڭعا جۋىق ءوتىنىش بەرگەن (2024 جىلى – 186 مىڭعا جۋىق تالاپكەر تەستىلەۋگە قاتىسۋعا ەكى مۇمكىندىكتى ەسەپكە العاندا 342 مىڭ ءوتىنىش).
ۇبت-عا ءوتىنىش بەرۋشىلەردىڭ باسىم بولىگى, 16,5%-ى «ماتەماتيكا-فيزيكا», 15,6%-ى «بيولوگيا-حيميا» پاندەر كومبيناتسياسىن تاڭداعان. 9,7%-ى «ماتەماتيكا-ينفورماتيكا» كومبيناتسياسىن تاڭداعان. ەڭ از تاڭدالعان كومبيناتسيا – «حيميا-فيزيكا», ونى 285 ادام تاپسىرۋدى جوسپارلاپ وتىر.
ۇبت-عا قاتىسۋ ءۇشىن تالاپكەرلەر ۇلتتىق تەستىلەۋ ورتالىعىنىڭ http://app.testcenter.kz سايتى نەمەسە UTO.kz قوسىمشاسى ارقىلى ءوتىنىش بەرگەن. تالاپكەرلەر تەستىلەۋ كۇنىن, ۋاقىتىن جانە پۋنكتىن وزدەرى تاڭدادى. بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناتسياسىن بەلگىلەدى.
ۇبت-داعى پاندەردىڭ سانى وزگەرىسسىز قالادى, ياعني ۇشەۋى مىندەتتى جانە ەكەۋى تاڭداۋ بويىنشا. ۇبت تاپسىرمالار سانى – 120. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بالل – 140.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالادى.
تالاپكەرلەر مازمۇنى بويىنشا اپەللياتسياعا ءوتىنىشتى تەستىلەۋ اياقتالعاننان كەيىن 30 مينۋت ىشىندە بەرۋگە, ال تەحنيكالىق اپەللياتسيا بويىنشا ءوتىنىشتى تەستىلەۋ بارىسىندا بەرۋگە بولادى. سەرتيفيكات اپەللياتسيا قارالعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
