ماماندار قازاقستاندىقتاردى ارانداتۋشىلىق ارەكەتتەرگە ەرمەۋگە جانە اقپاراتتىڭ شىنايىلىعىن مۇقيات تەكسەرۋگە شاقىرادى.
قازاقستانداعى كيبەرشابۋىلداردى تالداۋ جانە زەرتتەۋ ورتالىعى جاساندى ينتەللەكت قۇرالدارىنىڭ كومەگىمەن دايىندالعان, وبلىس اكىمدەرى مەن باسقا دا شەنەۋنىكتەردىڭ بەينەلەرى بەينەلەنگەن جالعان ۆيدەوروليكتەردىڭ انىقتالعانىن حابارلادى.
اتالعان ماتەريالدار كوپتەگەن بوتتاردىڭ كومەگىمەن الەۋمەتتىك جەلىلەردە تارالىپ, 7 جانە 9 مامىر كۇندەرى وتەتىن رۇقسات ەتىلمەگەن اكتسيالارعا («ماڭگىلىك پولك», «رەفەرەندۋم» جانە تاعى باسقا) قاتىسۋعا ۇگىتتەۋمەن قاتار جۇرۋدە. اكتسياعا قاتىسقاندارعا اقشالاي سىياقى ۇسىنىلاتىنى ايتىلعان.
وسىعان بايلانىستى ورتالىق الەۋمەتتىك جەلىلەردەگى كەز كەلگەن اقپاراتتىڭ شىنايىلىعىن مۇقيات تەكسەرۋگە كەڭەس بەرەدى. جالعان اقپاراتتىڭ قوعامدا دۇربەلەڭ تۋعىزۋعا باعىتتالعانى اتاپ ءوتىلدى.
قوسا بەرىلگەن ۆيدەودا جاساندى ينتەللەكت ارقىلى ازىرلەنگەن جالعان بەينەماتەريالدىڭ مىسالى كورسەتىلگەن.
