كوللاجدى جاساعان – قونىسباي شەجىمباي, «EQ»
«Kazlogistics» وداعىنىڭ باس ديرەكتورى قانات الماعامبەتوۆتىڭ ايتۋىنشا, لوگيستيكالىق سەگمەنت دامۋعا بەت الدى. كەيبىر كومپانيالار سەرۆيسىن الەمدىك ستاندارتتارعا سايكەستەندىرۋگە تىرىسىپ جاتىر.
«لوگيستيكادا ىقپالداستىرۋ ۇدەرىستەرىنىڭ وزىندىك ەرەكشەلىگى بار. ۇلكەن اۋماقتى الىپ جاتقان ءارى باسقا ەلدەرمەن تىعىز بايلانىسى بار ەلىمىز ءۇشىن كولىك-لوگيستيكالىق جۇيەنى دامىتۋ مەن ەكونوميكانى ارتاراپتاندىرۋعا تەرىس اسەر ەتەتىن كولىك شىعىندارىن ازايتۋ ماڭىزدى. بۇل ورايداعى نەگىزگى ماسەلە – تاريفتىك ساياسات, ەلدەر اراسىندا كەلىسىلگەن جانە رەتتەلگەن ترانزيت مولشەرلەمەسىن ۇيىمداستىرۋ. ويتكەنى لوگيستيكالىق بيزنەس ءبىر ەلدىڭ اۋماعىنداعى لوگيستيكامەن شەكتەلمەيدى» دەيدى قانات الماعامبەتوۆ.
فورۋم بارىسىندا ساراپشىلار 2025 جىلى يندۋستريا ءوزىنىڭ تسيفرلىق ترانسفورماتسياسىن جالعاستىراتىنىن, سالانىڭ بارلىق اسپەكتىسىنە قويما وپەراتسيالارىنان باستاپ جۇك تاسىمالىنا دەيىن اسەر ەتەتىنىن ايتتى. دامۋدىڭ نەگىزگى باعىتتارى ودان ءارى اۆتوماتتاندىرۋ مەن روبوتتاندىرۋدى, ماشينالىق وقىتۋ الگوريتمدەرىن ەنگىزۋدى, جەتكىزۋ تىزبەكتەرىنىڭ اشىقتىعىن كۇشەيتۋدى, سونداي-اق ەكولوگيالىق تۇراقتىلىق پەن ازيا نارىقتارىنا باعدارلانۋدى قامتيدى.
ەۋرازيالىق تەمىرجول جۇك تاسىمالدارى قاتىسۋشىلارى وداعىنىڭ اتقارۋشى ديرەكتورى سەرگەي اۆسەيكوۆتىڭ ايتۋىنشا, رەسەيدە دە, ەلىمىزدە دە كونتەينەرلەۋ دەڭگەيىنە وتە جاقسى دەپ باعا بەرۋگە بولمايدى.
«قازىرگى نارىق قويما وپەراتسيالارىن اۆتوماتتاندىرۋ, روبوتتاندىرۋ سياقتى وزىق تەحنولوگيالارمەن عانا ەرەكشەلەنەدى. بۇل رەتتە بيزنەس-ۇدەرىستەردى جەدەلدەتىپ, ەڭبەك ونىمدىلىگىن ارتتىراتىن جانە ادام فاكتورىنىڭ اسەرىن ازايتاتىن WMS-جۇيەلەردى پايدالانۋ باسىم باعىتقا اينالىپ وتىر. روبوتتاندىرۋ تاۋارلاردى سۇرىپتاۋدى, تاسىمالداۋدى, وراۋدى اۆتوماتتاندىرۋعا مۇمكىندىك بەرەدى. قازىر بارىمىزگە كەلىسىم, ۇيلەسىمدىلىك ماڭىزدى. تاسىمالداۋ ۇدەرىسىن باسقارۋ جۇيەسىن جەتىلدىرسە بارلىق باعىتتا كولىك-لوگيستيكالىق سەرۆيستەردىڭ دەڭگەيىن ارتتىرۋعا بولادى. وعان كەدەندىك رەجىمدەردى ۇيلەستىرۋ, تاسىمالداۋ قۇجاتتارى جۇيەسىن بىرىزدەندىرۋ, سونداي-اق ەاەو اۋماعى ارقىلى وتەتىن حالىقارالىق كولىك دالىزدەرى ارقىلى جۇك تاسىمالداۋدى كەڭەيتۋ ماقساتىندا تاريفتىك ساياساتتى ۇيلەستىرۋ كەرەك. لوگيستيكانى تسيفرلاندىرۋ جەتكىزۋ تىزبەگىنىڭ بارلىق كەزەڭىندە اشىقتىق پەن باقىلاۋدى قامتاماسىز ەتەدى. بلوكچەين جانە IoT سياقتى تەحنولوگيالاردى پايدالانۋ ناقتى ۋاقىت رەجىمىندە جۇكتەردىڭ ورنالاسقان جەرى, تاۋارلاردىڭ جاي-كۇيى جانە باسقا دا نەگىزگى پارامەترلەر تۋرالى اقپارات الۋعا جاعداي جاسايدى. بۇل نارىققا قاتىسۋشىلار اراسىنداعى سەنىمدى ارتتىرادى جانە كليەنتتەرگە قىزمەت كورسەتۋ ساپاسىن جاقسارتادى», دەيدى سەرگەي اۆسەيكوۆ.
الماتى
