بۇگىندە الەمنىڭ كوپتەگەن ەلىندە تۇراقسىزدىق, ۇلتارالىق جانە دىنارالىق قاقتىعىستار ورىن الىپ جاتىر. وسىنداي كۇردەلى كەزەڭدە ەلىمىزدەگى بىرلىك پەن كەلىسىمدى ساقتاپ, ونى ودان ءارى نىعايتىپ كەلە جاتقان اسسامبلەيا ينستيتۋتىنىڭ ماڭىزى زور. بۇل ۇيىم تەك باسقوسۋلار مەن ءىس-شارالارمەن شەكتەلىپ قالماي, ەل ىشىندەگى ءتۇرلى ەتنوستاردىڭ مادەنيەتىن ساقتاپ, دامىتۋعا, ۇرپاق بويىنا ءوزارا قۇرمەت پەن توزىمدىلىك سياقتى قۇندىلىقتاردى سىڭىرۋگە ۇلكەن ۇلەس قوسىپ وتىر.
ادامگەرشىلىككە باۋلۋ, تاتۋلىق پەن تۇسىنىستىككە تاربيەلەۋ – ۇزاق ءارى كۇردەلى ۇدەرىس. ونى جۇزەگە اسىرۋدا اسسامبلەيانىڭ اتقارىپ وتىرعان جۇمىسى وراسان. ءتۇرلى ەتنوس وكىلدەرى ءبىر شاڭىراقتىڭ استىندا تاتۋ-ءتاتتى ءومىر ءسۇرىپ, ورتاق ماقساتتارعا ۇمتىلىپ جاتقان ەلدە عانا شىنايى تۇراقتىلىق پەن وركەندەۋ بولادى. سوندىقتان اسسامبلەيا – ەلىمىزدىڭ بەرەكە-بىرلىگىنىڭ ناقتى كەپىلى.
مەن ەلىمىزدەگى افريكالىق ەتنومادەني ورتالىقتىڭ توراعاسىمىن. ءبىزدىڭ ۇيىم ەلىمىزگە قىزىعۋشىلىق تانىتىپ, وسىندا كەلىپ جاتقان شەتەلدىكتەرگە, سونداي-اق قازاق ءتىلىن ۇيرەنگىسى كەلەتىن وزگە ەل وكىلدەرىنە قولداۋ كورسەتەدى. ءبىز تەگىن كۋرستار ۇيىمداستىرىپ, قازاق ءتىلىن ۇيرەتەمىز. بۇل ساباقتار اپتاسىنا ءبىر رەت وتەدى. وعان اعىلشىن تىلدىلەر دە, ءورىستىلدى ازاماتتار دا قاتىسىپ ءجۇر. ءبىز ولارعا قازاق ءتىلىن وزدەرى جاقسى تۇسىنەتىن ءتىل ارقىلى ۇيرەتۋگە تىرىسامىز. سەبەبى ءتىلدى ۇيرەنۋ – تەك ءبىلىم الۋ ەمەس, بۇل جەرگىلىكتى حالىققا, ونىڭ ءتىلى مەن مادەنيەتىنە قۇرمەت كورسەتۋ.
ءبىزدىڭ باستامامىز – ەلىمىزدە تۇراتىن ءاربىر ازاماتتىڭ وتانعا دەگەن سۇيىسپەنشىلىگىن ارتتىرۋعا باعىتتالعان. قازاق ءتىلىن ۇيرەنۋگە قىزىعۋشىلىقتىڭ ارتۋى – بۇل ەلىمىزدەگى بەيبىت ءومىر مەن ءوزارا تۇسىنىستىكتىڭ ناقتى كورىنىسى. ال مۇنداي جاعدايدىڭ قالىپتاسۋىنا قازاقستان حالقى اسسامبلەياسى سىندى ينستيتۋتتاردىڭ ىقپالى زور ەكەنى ءسوزسىز.
جالپى ايتقاندا, قازاق مادەنيەتى مەن مەملەكەتتىك تىلگە دەگەن قۇرمەت وزگە ەتنوستاردى بىرىكتىرەدى. مەنىڭ ءتۇپ-تامىرىم نيگەريادا جاتقانىمەن, الماتىدا ءوستىم. بۇگىندە قازاق تىلىندە ەركىن سويلەيمىن. اعىلشىن ءتىلىن دە بىلەمىن, بىراق قازاق ءتىلى دە مەنىڭ انا تىلىمدەي بولىپ كەتتى. قازاقستاندى ءوزىمنىڭ تۋعان ۇيىمدەي كورەمىن. قازاق حالقىنىڭ قوناقجايلىعى تالايلاردى ءتانتى ەتىپ ءجۇر. قىسقاسى, شەتەلدىكتەر ءۇشىن ەلىمىزدە ءوزىن جايلى سەزىنۋگە بارلىق جاعداي جاسالعان. ياعني مۇنداعى ادامداردىڭ اشىق-جارقىن مىنەزى مەن مەيىرىمدىلىگى مەنى ءاردايىم قۋانتادى.
دەنيەل دجەيمس,
«افريكالىق مادەني ورتالىق» قب توراعاسى, قحا مۇشەسى
