سالتاناتتى شاراعا قاتىسقان وبلىس اكىمىنىڭ ورىنباسارى اسەت ماساباەۆتىڭ ايتۋىنشا, تۇراقتى گازبەن جابدىقتاۋ – اۋىلدىڭ الەۋمەتتىك-ەكونوميكاسىنا وڭ سەرپىن بەرەدى.
«گازدىڭ پايدا بولۋى شاعىن بيزنەستى دامىتۋعا, ءوندىرىس اشۋعا, ينۆەستيتسيا تارتۋعا مۇمكىندىك تۋعىزادى. بۇل تۇراقتى ءوسۋ مەن جۇمىسپەن قامتۋعا باعىتتالعان قادام. گاز قازىبەك بەك اۋىلىنان بولەك, تاعى دا بەس اۋىلدى قامتيدى», - دەپ اتاپ ءوتتى وبلىس اكىمىنىڭ ورىنباسارى.
گاز قۇبىرلارىن جۇرگىزۋ جۇمىستارى 2023 جىلدىڭ جەلتوقسانىندا باستالىپ, بىلتىرعى جىلدىڭ سوڭىندا اياقتالدى. نەگىزىنەن كەستە بويىنشا قۇرىلىسقا 26 اي بەرىلگەن بولاتىن. جۇمىس جوسپارلانعان ۋاقىتتان دا ەرتە اياقتالدى. جوبانىڭ جالپى قۇنى – 4,2 ملرد تەڭگەنى قۇرادى.
جەرگىلىكتى تۇرعىندار جوبانىڭ جۇزەگە اساتىنىنا ۇزاق ۋاقىت سەنبەگەندەرىن جاسىرمادى. سەبەبى, اۋىلدا بۇل قۇبىرلار 2011 جىلدان بەرى جاتقان ەكەن, ال ونى ىسكە قوسۋ ۇنەمى كەيىنگە قالدىرىلىپ كەلىپتى.
«بۇدان بىلاي ءبىزدىڭ ءۇيىمىز جىلى ءارى تازا بولادى. ەندى كومىر جاعىپ, وتىن جارىپ, پەش تازالاپ جۇرمەيمىز. بۇرىنعىدان قاراعاندا قولايلى جاعداي جاسالدى», – دەيدى قۋانىشىمەن بولىسكەن كوپبالالى انا ءاليا تۇرسىنوۆا.
قازىبەك بەكتىڭ تاريحى – ءوڭىردى گازداندىرۋدىڭ اۋقىمدى باعدارلاماسىنداعى ءبىر عانا مىسال. قازىرگى ۋاقىتتا, وڭىرلىك سىزبا اياسىندا 157 ەلدى مەكەن كوگىلدىر وتىنعا قوسىلىپ, 1,2 ملن ادامدى قامتىدى. بۇل وبلىستىڭ جالپى حالقىنىڭ 77%-ىن قۇرايدى.
وتكەن جىلى 17 اۋىل گازبەن قامتىلدى. ال وسى جىلدىڭ سوڭىنا دەيىن گازداندىرۋ دەڭگەيىن 59,5%-عا (169 ەلدى مەكەن) دەيىن جەتكىزۋ جوسپارلانىپ وتىر. بيىل جاڭا جوبالاردى ىسكە اسىرۋعا 6,7 ملرد تەڭگەدەن استام قاراجات قاراستىرىلدى. تاعى 1,4 ملرد تەڭگەسى جوبالىق-سمەتالىق قۇجاتتامانى دايىنداۋعا باعىتتالدى.
جۇمىستار قوناەۆ, بالقاش, جامبىل جانە ىلە اۋداندارىندا جۇرگىزىلىپ جاتىر. بيلىك جوبانىڭ ناقتى قاجەتتىلىكتەر مەن تۇراقتى دامۋ قاعيداتتارىن ەسكەرە وتىرىپ, كەزەڭ-كەزەڭىمەن جۇزەگە اسىرىلاتىنىن اتاپ ايتتى.
ءوڭىردى گازداندىرۋ 2030 جىلعا دەيىن تولىق اياقتالادى دەپ جوسپارلانىپ وتىر. بۇل تۇرمىستىق جاعدايلاردى جاقسارتۋعا عانا ەمەس, سونىمەن قاتار ەكولوگياعا جۇكتەمەنى ازايتۋعا, ەكونوميكالىق وسۋگە جانە اۋىلدىق جەرلەرگە ينۆەستيتسيالار تارتۋعا جاعداي جاساۋعا مۇمكىندىك بەرەدى.
الماتى وبلىسى.
