جاڭا وقۋ ورنى جاستاردى قاناتتاندىرادى

كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتەن تىس ءماجىلىسى بولىپ ءوتتى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. “بۇگىن استانادا قازاقستان رەسپۋبليكاسىنىڭ تۇڭ­عىش پرەزيدەنتى نۇرسۇلتان ءابىش ۇلى نازارباەۆ اتىنداعى حالىقارالىق ۋنيۆەرسيتەتىنىڭ – نازارباەۆ ۋنيۆەرسيتەتىنىڭ رەسمي اشىلۋى بولدى. الەمدەگى ۇزدىك ۋنيۆەرسيتەتتەردىڭ باعدارلامالارى بويىنشا جۇمىس ىستەيتىن جانە ەلىمىزگە قاجەتتى ءارى زاماناۋي مامان­داردى دايارلايتىن ەلوردامىزدا وسىنداي جوعارى وقۋ ورنىنىڭ اشىلۋى – ەلباسىنىڭ ەلىمىزدەگى وقۋ جۇيە­سىنىڭ ساپاسىن كوتەرۋ, سونداي-اق جاس مەملەكەتىمىزدىڭ بولاشاعىنا ناقتى قامقورلىعىنىڭ  ايعاعى. جاڭا ۋنيۆەرسيتەت جاس قازاقستاندىقتارعا جوعارى ءبىلىم بەرىپ, سونىمەن قاتار ونىڭ ديپلومىنىڭ حالىقارالىق ءبىلىم جۇيەسىندە تانىلۋى مەن كەڭ قولدانىسىن قامتاماسىز ەتەدى. جاڭا ۋنيۆەرسيتەت استانانى تانىلعان حالىق­ارالىق ءبىلىم جانە عىلىم ورتالىعىنا اينالدىرىپ, قازاقستاننىڭ باسەكەگە قابىلەتتىلىگىن كوتەرەتىنىنە مەن كامىل سەنەمىن”, – دەدى قانات ساۋداباەۆ. نازارباەۆ ۋنيۆەرسيتەتىندە بولاتىن ماماندىقتاردىڭ كەڭ اۋقىمىن ەسكەرە وتىرىپ جانە قارجىنى ەلىمىزدىڭ وقۋ جۇيەسىنە جولداۋ ماقساتىندا, ءبىز “بولاشاق” پرەزيدەنتتىك باعدارلاماسىندا قازىرگى ۋاقىتتا بەلگىلەنگەن ۇقساس ماماندىقتاردى قىسقارتۋ جونىندەگى ماسەلەنى قاراۋعا ءتيىسپىز. ەندى اتالعان ماماندىقتار بويىنشا ۇمىتكەرلەر نازارباەۆ ۋنيۆەرسيتەتىنە وقۋعا جىبەرىلەدى”, – دەپ اتاپ ءوتتى مەملەكەتتىك حاتشى – سىرتقى ىستەر ءمينيسترى. كوميسسيا وتىرىسىنىڭ قورىتىندىسى بويىنشا 2010 جىلعى “بولاشاق” حالىقارالىق ستيپەندياسىنىڭ باسىم ماماندىقتار تىزبەسىنە ءتيىستى وزگەرتۋلەر ەنگىزىلدى.