فوتو: عالامتوردان
ا.پاپپتىڭ سوزىنشە, 30 جىل – بۇل قازاقستاننىڭ دامۋىنا اسسامبلەيا مۇشەلەرىنىڭ قوسقان ۇلەسى مەن ەڭبەك ەرلىكتەرىنىڭ داڭقتى شەجىرەسى. وسى جىلدار ىشىندە اسسامبلەيا مۇشەلەرى زاۋىتتار سالىپ, ەگىن ەگىپ, ستانوك باسىندا ەڭبەك ەتىپ, مەتالل بالقىتتى.
«يۆان ساۋەر مەن گريگوري پرەزەنت, گەننادي زەنچەنكو مەن ۆلاديمير پيا, احمەتجان شاردينوۆ پەن ۆلاديمير روزمەتوۆ جانە قانشاما كاسىپورىن باسشىلارى – بۇلار اسسامبلەيا مۇشەلەرى. سوندىقتان جۇمىسشى ماماندىقتار جىلى مەن اسسامبلەيانىڭ 30 جىلدىعىنىڭ سايكەس كەلۋىن تەرەڭ سيمۆوليكالىق دەپ سانايمىن. مەن دە ەڭبەك ديناستياسىنىڭ وكىلىمىن. اتا-انام – ەڭبەك سىڭىرگەن ماشينا جاساۋ ماماندارى. مەن ماشينا جاساۋ زاۋىتتارىندا ءوستىم», دەدى ۆەنگر قاۋىمداستىعىنىڭ وكىلى.
ونىڭ ايتۋىنشا, كاسىپورىندا كوپۇلتتى ۇلكەن ۇجىم جۇمىس ىستەيدى – 240-تان استام ادام. جىل سايىن 5,5 ميلليارد تەڭگەنىڭ وتاندىق ءونىمىن شىعارىلادى. بۇل – گاز جانە ەلەكتر قازاندىقتارى, كونۆەكتورلار, ەلەكتر كالوريفەرلەر, سۋ قۇبىرىنا, تەحنولوگيالىق قاجەتتىلىكتەر مەن ءىرى سۋارۋعا ارنالعان ناسوس ستانتسيالارى.
«بۇل ءونىم قازاقستان ءۇشىن اسا قاجەت جانە شەتەلدەردە دە سۇرانىسقا يە! جاقسى جۇمىسشى – جاقسى تابىس تابادى. ءبىزدىڭ كاسىپورىندا بىلىكتى جۇمىسشىنىڭ ايلىعى 600 مىڭ تەڭگەدەن اسادى. ءبىز, اسسامبلەيا مۇشەلەرى, جۇمىسشى ماماندىقتار جىلى يدەياسىن ناقتى ىسپەن قولدايمىز. بۇل يدەيا – ەڭبەك ادامى قوعامدا لايىقتى باعالانۋى جانە مويىندالۋى كەرەك دەگەن سەنىمدى جەتكىزەدى. قازىرگى زامانعى بىلىكتى جانە ىسكەر جۇمىسشى – بۇل جاستار ءۇشىن لايىقتى الەۋمەتتىك پەرسپەكتيۆا», دەدى ول.
الەكساندر پاپپتىڭ ايتۋىنشا, «جۇمىسشى مارتەبەسىن» ارتتىرۋ ءۇشىن اسسامبلەيانىڭ قوعامدىق قۇرىلىمدارى زاۋىتتار مەن فابريكالارعا ءجيى بارىپ, جاستاردى ەرتىپ, جاڭا جۇمىسشى ماماندىقتارىمەن تانىسۋى قاجەت. الەۋمەتتىك جەلىلەردە جۇمىسشى ەڭبەگىن ناسيحاتتاۋدىڭ جاڭا تاسىلدەرىن قاراستىرۋ كەرەك.
«تاعى ءبىر ماسەلە – ءبىزدىڭ مادەنيەت, تەلەديدار مەن كينو كۇماندى كەيىپكەرلەردى ەمەس, الاقاندارى قاجالعان ەڭبەك ادامدارىن كورسەتۋى ءتيىس! جاستار سەنىمدى بولۋى قاجەت: جۇمىسشى ماماندىق – بۇل ابىرويلى الەۋمەتتىك ليفت! ال جۇمىسشى – بۇل ەلدەگى باستى ادام!», دەدى ا.پاپپ.
ول اسسامبلەيانىڭ قايىرىمدىلىق ىستەرىنە دە اتسالىسقانىنا توقتالىپ ءوتتى.
«30 جىل ىشىندە اسسامبلەيانىڭ قايىرىمدىلىق جاساۋشىلارى مەن ۆولونتەرلەرى كوپتەگەن يگى ىستەر اتقاردى – بۇل جەتىستىكتەر ەل اۋزىندا. اسسامبلەيانىڭ 30 جىلدىق مەرەيتويىندا «جومارت جان» ورتالىقتارى «مەيىرىمدىلىك كەرۋەنى», «جۇرەكتەن جۇرەككە», «مەكتەپكە جول» سەكىلدى قايىرىمدىلىق جوبالارىن بەلسەندى جۇزەگە اسىرىپ جاتىر. بۇل – اسسامبلەيا جۇمىسىنىڭ باستى باعىتتارىنىڭ ءبىرى بولماق», دەپ ءسوزىن اياقتادى «كەلەت» اق ديرەكتورلار كەڭەسىنىڭ توراعاسى, ۆەنگر مادەنيەت ورتالىعى توراعاسىنىڭ ورىنباسارى الەكسەندر پاپپ.
