فوتو: Zakon.kz
پرەزيدەنت مالىمدەمەسىندە جەڭىس كۇنىنىڭ تاعىلىمى تەك وتكەن تاريحتى ەسكە الۋ عانا ەمەس, بۇگىنگى الەمدەگى بەيبىتشىلىكتى ساقتاۋ جولىنداعى باستى ساباق ەكەنىن ايتتى.
« ۇلى جەڭىستىڭ تاعىلىمى بارشا حالىققا, اسىرەسە, ساياساتكەرلەرگە كسەنوفوبياعا, ناسىلدىك جانە ۇلتتىق ۇستەمدىككە, حالىقارالىق قۇقىق قاعيداتتارىن قۇرمەتتەمەۋگە قۇرىلعان جاۋاپكەرشىلىكتەن جۇرداي ساياسات جۇرگىزۋدىڭ سالدارى قانداي قاسىرەتكە اكەلەتىنىن ءالى كۇنگە دەيىن كورسەتىپ وتىر», دەدى قاسىم-جومارت توقاەۆ.
مەملەكەت باسشىسى جۋىردا رەسپۋبليكالىق ونوماستيكالىق كوميسسيانىڭ شەشىمىمەن ەلىمىزدەگى 500-دەن استام كوشەگە بۇعان دەيىن ەسكەرۋسىز قالعان جەرگىلىكتى مايدانگەرلەر مەن ەرلەردىڭ ەسىمدەرى بەرىلەتىنىن حابارلادى. اسىرەسە, جاڭا جانە اتاۋى قايتالاناتىن كوشەلەرگە باسىمدىق بەرىلمەك.
«بۇل شەشىم – ۇلى جەڭىستى, وعان قاتىسۋشىلاردى قانشالىقتى قادىر تۇتاتىنىمىزدى كورسەتەتىن ماڭىزدى قادام. ۇلى جەڭىس تۋرالى ۇمىتپاۋ دەگەنىمىز, بۇل – ەڭ الدىمەن, ەرجۇرەك باتىرلارىمىزدى جادىمىزدا ساقتاۋ, ولاردىڭ جانقيارلىق ەڭبەگى مەن ەرلىگىن, پارىزعا ادال جانە انتقا بەرىك بولعانىن ۇمىتپاۋ دەگەن ءسوز», دەدى پرەزيدەنت.
سونىمەن قاتار پرەزيدەنت بيىلعى مەرەيتويعا دايىندىق 2023 جىلدىڭ وزىندە باستالعانىن اتاپ ءوتىپ, « ۇلى جەڭىس: ەرلىككە تاعزىم, ۇرپاققا ۇلگى» اتتى كەشەندى جوسپار اياسىندا 2 مىڭنان استام مادەني, عىلىمي-زەرتتەۋ جانە اعارتۋشىلىق ءىس-شارالار وتكىزىلىپ جاتقانىن جەتكىزدى. بۇل باستامالار ەل ىشىندە عانا ەمەس, شەت مەملەكەتتەردەگى قازاق دياسپورالارى مەن حالىقارالىق قاۋىمداستىقتار اراسىندا دا قولداۋ تابۋدا.
مەملەكەت باسشىسى مەرەيتويدىڭ شارىقتاۋ شەگى رەتىندە اۋقىمدى اسكەري شەرۋ وتەتىنىن مالىمدەدى. بۇل شەرۋدىڭ ءمانى تەك سالتاناتتى سيپاتتا عانا ەمەس, قازىرگى كۇردەلى گەوساياسي جاعدايداعى قازاقستاننىڭ ۇلتتىق بىرلىگى مەن رۋحىنىڭ مىزعىماس مىقتىلىعىن پاش ەتۋدە جاتىر.
«تۇپتەپ كەلگەندە, بۇل اسكەري شەرۋدىڭ ءمان-ماڭىزى زور بولماق. سەبەبى مۇنى ءبىر جاعىنان مايدانگەرلەر مەن تىڭگەرلەرگە تاعزىم دەسەك, ەكىنشى جاعىنان قازىرگى كۇردەلى گەوساياسي احۋالدا ۇلتتىق رۋحىمىزدىڭ مىقتىلىعىن كورسەتەتىن سيمۆول دەۋگە بولادى», دەدى مەملەكەت باسشىسى.
جەڭىستىڭ 80 جىلدىعىنا ارنالعان ءىس-شارالار مامىر ايىنىڭ العاشقى كۇندەرىنەن باستالىپ, بۇكىل ەل اۋماعىندا كەڭ كولەمدە وتەدى.
