وبلىس ورتالىعى ورالدا مادەنيەت جانە اقپارات مينيسترلىگى مەن باتىس قازاقستان وبلىسى اكىمدىگىمەن سەرىكتەستىكتە «سامۇرىق-قازىنا» اق بىرىڭعاي قايىرىمدىلىق وپەراتورى «Samruk-Kazyna Trust» قورىنىڭ قولداۋىمەن «OzgeEpic Oral» كرەاتيۆتى حابى جۇمىسىن باستادى. ونەر, تەحنولوگيا جانە زياتكەرلىك ىزدەنىستى بىرىكتىرەتىن ورتالىقتىڭ سالتاناتتى اشىلۋىنا وبلىس اكىمى ناريمان تورەعاليەۆ, «سامۇرىق-قازىنا» قورىنىڭ باسقارۋشى ديرەكتورى عيبرات اۋعانوۆ, كرەاتيۆتى جاستار مەن شىعارماشىلىق قاۋىم وكىلدەرى قاتىستى. جوبا مەملەكەت باسشىسى قاسىم-جومارت توقاەۆتىڭ شىعارماشىلىق يندۋستريانى دامىتۋ جونىندەگى تاپسىرماسىنا سايكەس جۇزەگە اسىرىلىپ وتىر.
جوباعا «Samruk-Kazyna Trust» قورى 211 ملن تەڭگە ءبولدى. بۇل قارجى عيماراتتىڭ ديزاينىنا, كەڭىستىكتى زاماناۋي جيھازبەن جانە جوعارى تەحنولوگيالىق جابدىقتارمەن جابدىقتاۋعا جۇمسالدى. الداعى ۋاقىتتا كرەاتيۆتى يندۋستريا سالاسىندا 200 جاڭا مامان دايارلانادى. سونىڭ ىشىندە 10 مامان-انيماتوردى وقىتۋ ارقىلى وبلىستا العاشقى انيماتسيالىق ستۋديا قۇرۋ جوسپارلانىپ وتىر.
«بۇگىن دارىندى جاستار مەن شىعارماشىلىق سالانىڭ ازاماتتارى ءۇشىن ماڭىزدى كۇن. سەبەبى حالىققا قاجەتتى, سۇرانىستاعى ءتۇرلى كونتەنت دايىندايتىن ءارى كرەاتيۆتى مامانداردىڭ كاسىبي ورتاسىن قالىپتاستىراتىن ورتا پايدا بولدى. ورالداعى ورتالىق – «سامۇرىق-قازىنا» قورىنىڭ ەلىمىزدە اشقان ءۇشىنشى كرەاتيۆتى حابى. وسىعان دەيىن اقتوبە مەن پەتروپاۆلدا پايدالانۋعا بەرىلدى. جالپى, باتىس قازاقستاندا كەيىنگى ءتورت جىلدا 1,5 ملرد تەڭگە بولاتىن 16 الەۋمەتتىك جوبا جاسادىق. سولاردىڭ ءبىرى جىل سايىن 700 ەرەكشە بالا كومەك الاتىن «قامقورلىق» وڭالتۋ ورتالىقتارى. قازىرگى تاڭدا تاسقىن سالدارىنان زارداپ شەككەن ءجاڭاومىر اۋىلىندا كوپفۋنكتسيونالدى سپورت كەشەنىن سالۋ جوسپارلانعان. بۇل دا قور كومپانيالار توبىنىڭ وڭىرلەردىڭ ينفراقۇرىلىمىن دامىتۋعا, حالىقتى الەۋمەتتىك قولداۋعا جاساپ جاتقان قادامىنىڭ ءبىرى», دەدى «سامۇرىق-قازىنا» اق باسقارۋشى ديرەكتورى عيبرات اۋعانوۆ.
«OzgeEpic Oral» حابى ەكى قاباتتان تۇرادى: تومەنگى قاباتتا – تەاتر, كونتسەرتتىك الاڭ, كينوزال, كىتاپحانا مەن كافەتەري, ال جوعارعىسىندا – گالەرەيا, مۋزەي, ءدارىسحانا, كوۆوركينگ, ءاى زەرتحاناسى, مۋلتيمەديالىق كورمە جانە وندىرىستىك تسەحتار بار. مۇندا تۇرعىندار سپەكتاكلدەر مەن انيماتسيا جاساۋعا, دۋبلياجعا جانە باسقا دا شىعارماشىلىق جوبالارعا مەنتورلار جەتەكشىلىگىمەن قاتىسا الادى. حاب كرەاتيۆتى جاستاردى بىرىكتىرەتىن زاماناۋي مەدياكونتەنت ورتالىعىنا اينالماق. سونىمەن بىرگە شىعارماشىلىق پەن كاسىپكەرلىكتى ۇشتاستىرۋ مىندەتى بار.
ايتا كەتەيىك, 2020 جىلدان بەرى «Samruk-Kazyna Trust» قورى باتىس قازاقستان وبلىسىندا جالپى سوماسى 1 ملرد 494 ميلليون تەڭگەنى قۇرايتىن 16 الەۋمەتتىك جوبانى قولداعان بولاتىن.
باتىس قازاقستان وبلىسى
