التى باعىتتى قامتيدى
2024-2029 جىلدارعا ارنالعان جاساندى ينتەللەكتىنى دامىتۋ تۇجىرىمداماسى التى نەگىزگى باعىتتى قامتيدى: دەرەكتەر, ينفراقۇرىلىم, ادام كاپيتالى, عىلىمي زەرتتەۋلەر, قۇقىقتىق رەتتەۋ, اكسەلەراتسيالىق باعدارلامالار. قازىر بۇل تۇجىرىمدامانى ۇلتتىق ستراتەگياعا اينالدىرۋ جۇمىستارى جۇرگىزىلىپ جاتىر.
«مەملەكەت باسشىسىنىڭ تىكەلەي تاپسىرماسىمەن جاساندى ينتەللەكت ەكوجۇيەسىن قالىپتاستىرۋ – ءبىلىم بەرۋ, عىلىمي زەرتتەۋلەر, ينفراقۇرىلىم, نورماتيۆتىك-قۇقىقتىق بازا, كاسىپكەرلىك سىندى بىرنەشە ءىرى كومپونەنتتى قامتيدى. ءبىز جاساندى ينتەللەكتىنى دامىتۋدىڭ كەشەندى ءتاسىلىن ۇستانىپ وتىرمىز: مەكتەپ وقۋشىلارىنان باستاپ مەملەكەتتىك قىزمەتشىلەرگە دەيىنگى بارلىق دەڭگەيدە ادام كاپيتالىن دامىتىپ, الەمدىك دەڭگەيدەگى ينفراقۇرىلىمدى قۇرۋدامىز», دەدى ع. بايتۇرسىنوۆ.
مينيسترلىك وكىلىنىڭ بايانداۋىنشا, 2024 جىلدىڭ 27 ساۋىرىندە ۇكىمەتتىڭ №342 قاۋلىسى بويىنشا مينيسترلىك جانىنان جاساندى ينتەللەكت جانە يننوۆاتسيالاردى دامىتۋ كوميتەتى قۇرىلعان. بۇل ورگان — سالاداعى ناقتى ىستەر مەن ستراتەگيالىق شەشىمدەردى ۇيلەستىرەتىن ورتالىق قۇرىلىم.
سونداي-اق ءماجىلىس دەپۋتاتتارى «جاساندى ينتەللەكت تۋرالى» زاڭ جوباسىن دايىنداعان. قۇجات جاساندى ينتەللەكت جۇيەلەرىن ازىرلەۋ مەن ەنگىزۋدى كەشەندى تۇردە رەتتەۋگە باعىتتالعان. وندا مەملەكەتتىڭ سالالىق ساياساتىنىڭ شەكاراسى بەلگىلەنىپ, جي جۇيەلەرىنىڭ قاۋىپسىزدىگى, اشىقتىعى جانە جاۋاپكەرشىلىگى جونىندەگى ۇستانىمدار ايقىن كورسەتىلگەن. سونىمەن قاتار اتالعان تەحنولوگيالاردى قوعام ءومىرىنىڭ ءتۇرلى سالالارىنا ەتيكالىق ءارى باقىلاناتىن تۇردە ەندىرۋ جولدارى قاراستىرىلعان.
ينفراقۇرىلىم مەن تەحنولوگيالىق دامۋ
مينيسترلىك جاساندى ينتەللەكت ءۇشىن تەحنولوگيالىق ينفراقۇرىلىمدى قۇرۋ شەڭبەرىندە «NVIDIA» ەسەپتەۋ قۋاتتارىن ەل اۋماعىنا ەكسپورتتاۋعا ءوتىنىم بەرگەن. سونىمەن قاتار «NVIDIA L40s» ارنايى گرافيكالىق ۆيدەوكارتالارى ساتىپ الىنىپ, ولار «ۇلتتىق اقپاراتتىق تەحنولوگيالار» اق جۇمىس ىستەپ تۇرعان دەرەكتەردى وڭدەۋ ورتالىعىندا ورنالاستىرىلعان. بۇل رەسۋرستار «KazLLM» قازاق ۇلكەن تىلدىك مودەلىنە نەگىزدەلگەن مەملەكەتتىك ونىمدەردى ورنالاستىرۋعا پايدالانىلادى.
«KazLLM» مودەلى 148 ميلليارد توكەننەن تۇراتىن كوپتىلدى دەرەكتەر جيىنتىعىندا وقىتىلعان. مودەلدىڭ 8 جانە 70 ميلليارد پارامەترلى ەكى نۇسقاسى ازىرلەنگەن.
«دامىپ كەلە جاتقان سۋپەركومپيۋتەرلىك ينفراقۇرىلىم ۇلتتىق جاساندى ينتەللەكت پلاتفورماسىمەن بىرىكتىرىلىپ, مەملەكەتتىك تسيفرلىق ونىمدەردى ازىرلەۋ مەن ەنگىزۋدىڭ نەگىزگى ەلەمەنتى بولادى. پلاتفورما دەرەكتەر جيىنتىعىن, ەسەپتەۋ رەسۋرستارىن, جاساندى ينتەللەكت مودەلدەرىن ازىرلەۋگە, وقىتۋعا ارنالعان قۇرالداردى قامتيدى. ونىڭ نەگىزىندە مەملەكەتتىك قىزمەتتەرگە قول جەتكىزۋدى جەڭىلدەتۋگە ءارى مەملەكەتتىك ورگاندار قىزمەتىنىڭ تيىمدىلىگىن ارتتىرۋعا باعىتتالعان جاساندى ينتەللەكت اگەنتتەردىڭ 11 ءپروتوتيپى ازىرلەندى», دەدى مينيسترلىك
وكىلى.
ءبىلىم بەرۋ
«Astana Hub» تەحنوپاركىنىڭ باس ديرەكتورى دانيا احمەتوۆانىڭ ايتۋىنشا, «Industrial AI Accelerator» باعدارلاماسى اياسىندا تاۋ-كەن ءوندىرىسى, ەنەرگەتيكا, مەديتسينا, قارجى تەحنولوگيالارى جانە مەملەكەتتىك قىزمەتتەر سالالارىندا جاساندى ينتەللەكتىنى ەنگىزۋگە 27 قاناتقاقتى جوبا ىسكە قوسىلعان. باعدارلاماعا 116 كومپانيا ءوتىنىم بەرىپ, 32 كومپانيا ىرىكتەۋدەن ءوتىپ وتىر. ولاردىڭ ىشىندە 4 جوبانىڭ تيىمدىلىگى دالەلدەنىپ, قولدانۋعا ۇسىنىلىپ وتىر.
ال ادام كاپيتالىن دامىتۋ ماقساتىندا مينيسترلىك الداعى 5 جىلدا 1 ملن ادامدى جاساندى ينتەللەكتىمەن جۇمىس ىستەۋ داعدىلارىنا ۇيرەتۋدى جوسپارلاپ وتىر. بۇل باعىتتا «Alem.ai» حالىقارالىق جاساندى ينتەللەكت ورتالىعى قۇرىلىپ, وندا ءبىلىم بەرۋ, زەرتتەۋ, ستارتاپتاردى قولداۋ باعىتىنداعى جوبالار جۇزەگە اسىرىلادى.
بۇگىندە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى «Astana Hub»-پەن بىرلەسىپ, ەلىمىزدىڭ ازاماتتارىن تسيفرلىق بولاشاققا دايىنداۋعا ماڭىزدى قادامدار جاساپ جاتىر. جاساندى ينتەللەكتىنى دامىتۋ باعىتىندا ەلىمىزدە قولعا الىنعان ماڭىزدى باستامالاردىڭ ءبىرى – «Decentrathon» دەپ اتالاتىن ءىرى كولەمدى حاكاتون. بۇل – ەلىمىزدىڭ تۇكپىر-تۇكپىرىنەن كەلگەن جاس مامانداردى بىرىكتىرەتىن كوپ لوكاتسيالى تەحنولوگيالىق جارىس.
«تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى عىلىم جانە جوعارى ءبىلىم مينيسترلىگىمەن بىرلەسە وتىرىپ, جاساندى ينتەللەكتىمەن جۇمىس ىستەۋ داعدىلارىنا 1 ميلليون وتانداسىمىزدى وقىتۋدى جوسپارلاپ وتىر. 5 جىل ىشىندە 500 مىڭ مەكتەپ وقۋشىسى, 300 مىڭ ستۋدەنت, 90 مىڭ مەملەكەتتىك قىزمەتكەر, 80 مىڭ بيزنەس وكىلى مەن ءتۇرلى سالالارداعى ازاماتتار قامتىلماق. ماقسات – تەحنولوگيالاردى تەك تۇتىناتىن ەمەس, ولاردى جاساي الاتىن, قولدانا بىلەتىن ۇرپاق قالىپتاستىرۋ», دەيدى د.احمەتوۆا.
