جوعارعى سوتتىڭ ءباسپاسوز حاتشىسى ازيز ءابيدوۆتىڭ ايتۋىنشا, كاريموۆانىڭ تۇرمەدەن بوساتىلعانى تۋرالى اقپارات شىندىققا جاناسپايدى. ول قاماۋدا قالدى.
گۇلنارا كارىموۆانىڭ تاشكەنت وبلىسىنداعى كولونيادان بوساتىلعانى تۋرالى اقپارات «Uzbekistan Vision 2030» تراست قورىنىڭ جۇمىسىنا ارنالعان ءباسپاسوز ءماسليحاتى قارساڭىندا پايدا بولدى. قور مارقۇم مەملەكەت باسشىسىنىڭ قىزىنا قارسى قوزعالعان قىلمىستىق ءىس اياسىندا شۆەيتساريادا تاركىلەنگەن جانە وزبەكستانعا قايتارىلعان قاراجاتتى اشىق ءارى ءتيىمدى ءبولۋ ءۇشىن قۇرىلعان.
وزبەكستان مەن شۆەيتساريا اراسىندا وزبەكستان حالقىنىڭ مۇددەسى ءۇشىن تاركىلەنگەن اكتيۆتەردى قايتارۋ تۋرالى ءبىرىنشى كەلىسىمگە 2022 جىلدىڭ تامىزىندا قول قويىلعان. كەلىسىم وزبەكستانعا 131 ميلليون دوللاردى قايتارۋدى قاراستىرعان.
2025 جىلدىڭ اقپانىندا وزبەكستان مەن شۆەيتساريا كاريموۆانىڭ اكتيۆتەرىن قايتارۋ تۋرالى تاعى ءبىر كەلىسىمگە قول قويدى. قوسىمشا 182 ميلليون دوللاردى شۆەيتساريا وزبەكستان حالقىنا «Uzbekistan Vision 2030 Trust Fund» ارقىلى قايتارادى. قايتارىلعان قاراجاتتىڭ جالپى سوماسى 313 ميلليون دوللاردى قۇرايدى.
بۇعان قوسا, ءساۋىر ايىندا بەلگيا بيلىگى تەلەكوممۋنيكاتسيا سالاسىنداعى كەلىسىم-شارتتاردى جاساۋ كەزىندە سىبايلاس جەمقورلىق جانە اقشانى جىلىستاتۋ ءىسى بويىنشا تاركىلەنگەن 108 ميلليون دوللاردى وزبەكستانعا اۋدارۋ تۋرالى شەشىم قابىلدادى. قاراجات وزبەكستاننىڭ سوت ورگاندارىنىڭ تالابى بويىنشا تاركىلەندى.
2015 جىلى گۇلنار كاريموۆا بەس جىلعا باس بوستاندىعىنان ايىرىلىپ, كەيىن 2019 جىلى جالپى رەجيمدەگى كولونياعا اۋىستىرىلدى. 2020 جىلى ناۋرىزدا ول «مەملەكەت قاراجاتىن جىمقىرعانى جانە وزبەكستاننىڭ مۇددەسىنە قايشى مامىلەلەر جاساعانى ءۇشىن, سونداي-اق باسقا بىرەۋدىڭ مۇلكىن اسا ءىرى كولەمدە تاركىلەگەنى ءۇشىن» تاعى 13 جىل ءتورت ايعا سوتتالدى.
