فۋتبول. قازاقستان كابو-ۆەردەمەن جولداستىق كەزدەسۋ وتكىزەدى

استانا. 5 مامىر. فۋتبولدان قازاقستان قۇراماسى 16 ماۋسىمدا كەزەكتى جولداستىق كەزدەسۋىن وتكىزەدى. اتالعان ويىنداعى قارسىلاسىمىز افريكا قۇرلىعىنىڭ وكىلى – كابو-ۆەردە قۇراماسى. بۇل تۋرالى قازاقستان فۋتبول فەدەراتسياسىنىڭ رەسمي سايتى kff.kz حابارلادى. فەدەراتسيانىڭ حالىقارالىق ءبولىمىنىڭ جەتەكشىسى تۇلپار مانسۇروۆ جولداستىق كەزدەسۋ جونىندە: «قازىرگى ۋاقىتتا الدىن الا كەلىسىم جاسالدى. ەندى رەسمي جۇمىستار قالدى. بۇل حالىقارالىق ماتچتى ۇيىمداستىرۋدىڭ شەشۋشى بولىگى بولىپ سانالادى. دەگەنمەن, قازاقستان – كابو-ۆەردە كەزدەسۋى 16 ماۋسىم كۇنى الماتىنىڭ ورتالىق ستاديونىندا وتەدى دەپ 99 پايىز سەنىممەن ايتۋعا بولادى», – دەدى. بۇگىندە كابو-ۆەردە قۇراماسى فيفا رەيتينگىندە 37-ورىندا تۇر. بۇل كوماندا 31 ناۋرىزدا الەمدەگى ازۋلى قۇرامالاردىڭ ءبىرى پورتۋگاليانى جەڭىپ كەتىپ, فۋتبول ماماندارىنىڭ نازارىنا ىلىكتى. ەكى مارتە افريكا حالىقتارىنىڭ كۋبوگىنا (2013, 2015 جج.) قاتىسقان. ەڭ ۇزدىك كورسەتكىشى – شيرەك فينال (2013 ج.). كوماندانى پورتۋگاليالىق مامان رۋي اگۋاش جاتتىقتىرادى. فۋتبولشىلارى يسپانيا, انگليا جانە پورتۋگاليانىڭ كوماندالارىندا وينايدى. ال يۋري كراسنوجان جاتتىقتىراتىن قازاقستان قۇراماسى قازىرگى تاڭدا فيفا تىزىمىندە 133-ساتىدا كەلەدى. سوڭعى ويىندى فۋتبولشىلارىمىز 31 ناۋرىزدا رەسەي قۇراماسىنا قارسى وتكىزدى. اتالعان جولداستىق كەزدەسۋدە ەسەپ اشىلماعانى ەسىمىزدە. ۇلتتىق قۇرامامىزدىڭ كابو-ۆەردەمەن بولاتىن ويىنعا دەيىن ەكى كەزدەسۋى جوسپارلانعان. الدىمەن 12 مامىردا تاعى ءبىر افريكالىق قۇراما بۋركينا-فاسومەن جولداستىق كەزدەسۋ وتكىزەدى. ال ارادا ءبىر اي وتكەندە, ياعني, 12 ماۋسىمدا 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا تۇركيامەن كۇش سىناسادى. اتالعان ەكى ويىن دا الماتىدا وتەدى. ەلامان قوڭىر. دەرەك, سۋرەت: kff.kz.