استانا. 5 مامىر. ەندى بىرەر ساعاتتان كەيىن فۋتبولدان ۋەفا چەمپيوندار ليگاسىنىڭ جارتىلاي فينالدىق باسەكەسى باستالادى. بۇگىن يتاليانىڭ تۋرين قالاسىندا جەرگىلىكتى «يۋۆەنتۋس» پەن ءمادريدتىڭ «رەالى» العاشقى ويىندارىن وتكىزەدى. ال ەرتەڭ «بارسەلونا» ءوز الاڭىندا ميۋنحەننىڭ «باۆارياسىن» قابىلدايدى. بۇل تۋرالى egemen.kz حابارلادى.
وسى رەتتە ءبىز ادەتتەگىدەي, بۇگىنگى ماتچقا قاتىستى كەيبىر قىزىقتى دەرەكتەرگە توقتالۋدى ءجون كوردىك. سونىمەن «يۋۆەنتۋس» پەن «رەال» اراسىنداعى بىرقاتار مالىمەتتەرگە نازار اۋدارايىق.
- بۇگىنگى ويىن تۋرالى ايتقان كەزدە ەڭ الدىمەن چەمپيوندار ليگاسىنىڭ 1997-1998 جىلعى ماۋسىمىنداعى فينال ەسكە تۇسەدى. سەبەبى, سول سىندا «يۋۆەنتۋس» پەن «رەال» چەمپيوندىق اتاقتى ساراپقا سالعان بولاتىن. ناتيجەسىندە يسپاندار 1:0 ەسەبىمەن جەڭىسكە جەتىپ, تاريحىندا جەتىنشى رەت تۋرنير جەڭىمپازى اتاندى. اتالعان ماتچتاعى جالعىز گولدى داڭقتى فۋتبولشى پرەدراگ مياتوۆيچ سوقتى.
- «يۋۆەنتۋس» تۋرنير اياسىندا «رەالعا» قارسى ءوز الاڭىندا وتكىزگەن ويىنداردا ءبىر-اق رەت جەڭىلگەن. ونىڭ ءوزى وسىدان جارتى عاسىر بۇرىن, ياعني, 1961-1962 جىلعى ماۋسىمدا تىركەلگەن.
- بۇگىنگە دەيىن قوس كوماندا 16 رەت كۇش سىناسىپ, ونىڭ 7-ۋىندە تۋريندىكتەر باسىم تۇسكەن. ال 8 مارتە «رەالدىڭ» مەرەيى ۇستەم بولدى. ءبىر ويىندا قارسىلاستار تەڭ تارقاستى.
- «يۋۆەنتۋس» 2002-2003 جىلعى ماۋسىمنان بەرى چەمپيوندار ليگاسىنىڭ جارتىلاي فينالىنا العاش رەت شىعىپ وتىر.
- ال مادريدتىكتەر بەسىنشى رەت قاتارىنان ءتۋرنيردىڭ جارتىلاي فينالىندا باق سىناماق.
كوماندالار مىنا قۇرامدا الاڭعا شىعۋى مۇمكىن.
