بۇل مونوگرافيا العاش رەت وسىدان 10 جىل بۇرىن باسپادان شىققان ەدى. جەڭىستىڭ 80 جىلدىعىنا وراي تولىقتىرىلىپ, ەكىنشى رەت باسىلعان كىتاپتىڭ تۇساۋكەسەرى جۇبان مولداعاليەۆ اتىنداعى وبلىستىق ورتالىق امبەباپ عىلىمي كىتاپحانادا ءوتتى.
ءىس-شاراعا كىتاپقا ەنگەن باتىر قىزداردىڭ ۇرپاقتارى, جوعارى جانە ارناۋلى وقۋ ورىندارىنىڭ وقىتۋشىلارى مەن ستۋدەنتتەرى, قالا مەكتەپتەرىنىڭ تاريح ءپانى مۇعالىمدەرى, كىتاپحانا وقىرماندارى قاتىستى.
«باقتىلى سانسىزبايقىزىنىڭ بۇل كىتابى قايتادان وڭدەلىپ, تىڭ دەرەكتەرمەن تولىقتىرىلعان ەكەن. 1981 جىلى گۋرەۆ پەداگوگيكالىق ينستيتۋتىندا وقىپ جۇرگەن ستۋدەنت كەزىنەن باستالعان عىلىمي-زەرتتەۋشىلىك جۇمىس تابانى كۇرەكتەي 44 جىلعا سوزىلىپتى. الدىڭعى باسىلىمدا ايتىلماعان قاھارمان قىزداردىڭ ەسىمى مەن ولاردىڭ قان مايدانداعى ەرلىگىن دارىپتەۋ زەرتتەۋشىنىڭ جانكەشتى ەڭبەگىنىڭ جەمىسى. وسىعان دەيىن تاريحي ەڭبەكتەر مەن گازەت-جۋرنالداردا جاريالانعان دۇنيەلەردى ءھام ارحيۆتەردە شاڭ باسىپ جاتقان سارعايعان قۇجاتتاردى اقتارىپ قانا قويماي, عالىم تابانىن توزدىرىپ, تاريحتى حالىقتىڭ ءوز ىشىنەن دە ىزدەگەن. حالىققا قىزمەت كورسەتۋ ورتالىعى قىزمەتكەرلەرىنىڭ كومەگىمەن باتىر قىزداردىڭ ۇرپاقتارىن ىزدەگەن. ناتيجەسىندە تىنىمسىز ەڭبەك ءوز ناتيجەسىن بەردى» دەيدى عالىمنىڭ ارىپتەسى, تاريح عىلىمدارىنىڭ كانديداتى جاڭابەك جاقسىعاليەۆ.
