ەلىمىزدە اتاۋلى الەۋمەتتىك كومەكتى تاعايىنداۋ ءتارتىبى وزگەرەدى

مەملەكەت باسشىسىنىڭ كومەككە مۇقتاج جانداردىڭ جيىنتىق كىرىسى مەن شىعىسىن ايقىنداۋدى ەسكەرە وتىرىپ, حالىققا الەۋمەتتىك كومەك كورسەتۋ تەتىگىن جەتىلدىرۋ جونىندە شارالار قابىلداۋعا قاتىستى تاپسىرماسىن ورىنداۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى اتاۋلى الەۋمەتتىك كومەكتى تاعايىنداۋ قاعيدالارىنا وزگەرىستەر ەنگىزىپ وتىر. جاڭا بۇيرىق جوباسىنا سايكەس ااك الۋعا ءۇمىتتى ازامات مەملەكەتكە شىعىس وپەراتسيالارىن, ياعني بانك شوتى, بانك الدىنداعى قارىزى, ميكروكرەديتى (بولعان جاعدايدا), جيناق سالىمى مەن دەپوزيتتەگى قاراجاتىنىڭ قوزعالىسى تۋرالى مالىمەتتەردى ۇسىنۋى ءتيىس. 

«ماقسات – جيىنتىق كىرىسى مەن شىعىسىن ايقىنداپ, كومەككە ناقتى مۇقتاج ازاماتتارعا الەۋمەتتىك قولداۋ كورسەتۋ. اتاۋلى الەۋمەتتىك كومەك تاعايىنداۋ تەتىگىندەگى وزگەرىستەر كومەككە شىن مانىندە مۇقتاج ازاماتتاردى انىقتاۋعا جانە ولارعا مەملەكەت تاراپىنان نىسانالى قولداۋدى قامتاماسىز ەتۋگە مۇمكىندىك بەرەدى», دەلىنگەن قۇجات ماتىنىندە.

اتاۋلى الەۋمەتتىك كومەكتى جاڭا تارتىپپەن تاعايىنداۋ مەملەكەتتىك قولداۋدىڭ اشىقتىعىن كۇشەيتۋگە ىقپال ەتەدى. قۇجات جوباسى بيىل 5 مامىرعا دەيىن قوعامدىق تالقىلاۋعا ۇسىنىلعان. جاڭا ءتارتىپ قابىلدانعان جاعدايدا بيىل جەلتوقساندا ىسكە قوسىلادى.

قازىرگى ۋاقىتتا ەلىمىزدە ااك-ءتى وتباسىنىڭ ءبىر مۇشەسىنىڭ ورتاشا تابىسى كەدەيلىك شەگىنەن تومەن ادامدار الا الادى. وعان ەلىمىزدىڭ ازاماتتارى, قانداستار, بوسقىندار, ەلىمىزدە تۇراقتى تۇراتىن ازاماتتىعى جوق ادامدار ءۇمىت ارتا الادى. ءبىر ادامعا شاققانداعى ورتاشا تابىس وتباسى مۇشەلەرىنىڭ سانىنا بولىنگەن جالپى تابىسى رەتىندە ەسەپتەلەدى. بيىلدان باستاپ ەلىمىزدەگى كەدەيلىك شەگى مەملەكەتتىك اتاۋلى الەۋمەتتىك كومەككە ءوتىنىش بەرگەن توقسانداعى مەدياندى تابىستىڭ 35 پايىزىنا تەڭ, بىراق سول كەزەڭدەگى وڭىرلىك ەڭ تومەنگى كۇنكورىس دەڭگەيىنىڭ 70 پايىزىنان كەم ەمەس. قازاقستاندىقتار ااك تاعايىنداۋعا ءوتىنىشتى مانساپ ورتالىعىنا, تۇرعىلىقتى جەرى بويىنشا اكىمدىككە نەمەسە ەلەكتروندىق ۇكىمەت پورتالى ارقىلى بەرە الادى (egov.kz). ول ءۇشىن قازاقستاندا تۇراقتى تۇراتىن شەتەلدىكتىڭ جەكە كۋالىگى نە تۇرۋعا ىقتيارحاتى, ازاماتتىعى جوق ادامنىڭ كۋالىگى, بوسقىن كۋالىگى نە قانداس كۋالىگى بولۋى جەتكىلىكتى.

ەڭبەك مينيسترلىگىنىڭ مالىمەتىنشە, بىلتىر ااك تولەۋگە 39,5 ميلليارد تەڭگە جۇمسالعان. ونى 78,1 مىڭ وتباسىنان 413,7 مىڭ ادام الدى. بيىل ااك تولەۋگە 1 ميلليون ادامعا 132,9 ميلليارد تەڭگە قاراستىرىلعان.