سۋرەت: ru.freepik.com
جوبانىڭ ماقساتى – ەكى ەل ۋنيۆەرسيتەتى اراسىندا ارىپتەستىك بايلانىس ورناتىپ, عىلىمي تاجىريبە الماسۋ. سونداي-اق اگرو ماماندىعىندا وقيتىن ستۋدەنتتەرگە ورگانيكالىق جولمەن ءونىم الۋدىڭ تىڭ ءتاسىلىن ۇيرەتۋ. ءىس-شاراعا ۋنيۆەرسيتەت ۇجىمى مەن كورەيادان كەلگەن قوناقتار جانە جەرگىلىكتى كاسىپورىنداردىڭ وكىلدەرى قاتىستى.
اسىرەسە بۇل كەزدەسۋ ءبىزدىڭ اگروونەركاسىپ كەشەنى وكىلدەرىنىڭ قىزىعۋشىلىعىن تۋعىزدى. سەبەبى تابيعي ءونىم ءوندىرۋ ارقىلى وتاندىق تاۋاردىڭ ساپاسىن ارتتىرا الامىز. سوندىقتان شىمكەنتتىك كاسىپكەرلەر «اقىلدى جاسىل فەرما» جوباسىنا ايرىقشا نازار اۋداردى. بۇل جوبا ارقىلى ستۋدەنتتەر عانا ەمەس, بيزنەس وكىلدەرى دە وسى باستاما شەڭبەرىندە تاجىريبە الماسۋعا بولادى.
م.اۋەزوۆ اتىنداعى وقزۋ باسقارما توراعاسى-رەكتور دارحان احمەد-زاكي مەملەكەت باسشىسىنىڭ قولداۋىمەن وتاندىق عىلىم جاڭاشا سەرپىن العانىن اتاپ ءوتتى.
«قازىر ءبىزدىڭ عالىمداردىڭ بەلسەندىلىگى جوعارى. ولار سەرىكتەستەرىمەن بىرلەسىپ, جاڭا عىلىمي جوبالاردى ىسكە اسىرۋعا سەپتەسىپ جاتىر. بۇدان ەكى جىل بۇرىن پروفەسسور راە كۆون چۋنگ «جاسىل ەنەرگيانى» پايداعا جاراتۋ ارقىلى اۋىل شارۋاشىلىعىن دامىتۋعا بولاتىنى تۋرالى ۇسىنىس بىلدىرگەن ەدى. ناتيجەسىندە, بيىل ينۆەستورمەن بىرگە جاڭا تەحنولوگيانى قولدانا وتىرىپ, «اقىلدى فەرمانى» ءبىزدىڭ ۋنيۆەرسيتەتتە قالىپتاستىرساق دەيمىز. «اقىلدى جاسىل فەرمانىڭ» ونىمدەرىن وسىرۋدە پەستيتسيدتەر, حيميالىق زاتتار پايدالانىلمايدى. سونداي-اق وسى جۇيە اياسىندا 90 پايىزعا دەيىن سۋدى ۇنەمدەۋگە بولادى», دەدى ول.
ءىس-شارا بارىسىندا فەرما قۇرىلىسىنىڭ ىرگەتاسىنا كاپسۋلا سالۋ ءراسىمى ءوتتى. بۇل كەشەندە جاسىل ماقتا, ۆاسابي مەن قۇلپىناي وسىرىلەدى. پروفەسسور راە كۆون چۋنگ فەرمادا وندىرىلەتىن جاسىل ماقتاعا ەرەكشە توقتالدى. ونىڭ ايتۋىنشا, بۇگىنگى تاڭدا جوعارى سورتتى ونىمگە لۋي ۆەتون سەكىلدى الەمدىك برەندتىك فيرمالار قىزىعۋشىلىق تانىتىپ وتىر ەكەن. ال وعان قاجەت قۇرال-جابدىقتى كورەيالىق كومپانيا ءوز ەسەبىنەن جەتكىزەدى.
شىمكەنت
