قازاقستان پرەزيدەنتىنىڭ كەڭەسشىسى تاعايىندالدى

استانا. 5 مامىر. مەملەكەت باسشىسىنىڭ وكىمىمەن مۇحتار ابرار ۇلى قۇل-مۇحاممەد قازاقستان رەسپۋبليكاسى پرەزيدەنتىنىڭ كەڭەسشىسى قىزمەتىنە تاعايىندالدى. بۇل تۋرالى akorda.kz حابارلادى. مۇحتار قۇل-مۇحاممەد 1960 جىلى 12 جەلتوقساندا قىتايدىڭ شاۋەشەك قالاسىندا تۋعان. س.م.كيروۆ اتىنداعى قازاق مەملەكەتتىك ۋنيۆەرسيتەتىن بىتىرگەن. ەڭبەك جولىندا «قازاق ەنتسيكلوپەدياسى» باس رەداكتسياسىندا عىلىمي, اعا عىلىمي رەداكتور, فيلوسوفيا, قۇقىق جانە سوتسيولوگيا رەداكتسياسىنىڭ مەڭگەرۋشىسى, جاۋاپتى حاتشى (1982-1992 جج.), «اتامۇرا» كورپوراتسياسىنىڭ پرەزيدەنتى (1992-1999 جج.), پارلامەنت سەناتىنىڭ دەپۋتاتى (1999-2001 جج.), مادەنيەت, اقپارات جانە قوعامدىق كەلىسىم ءمينيسترى (2001-2003 جج.), قازاقستان پرەزيدەنتىنىڭ كەڭەسشىسى جانە ءباسپاسوز حاتشىسى (2003-2007 جج.), قىزىلوردا وبلىسىنىڭ اكىمى (2007-2008 جج.), مادەنيەت جانە اقپارات ءمينيسترى (2008-2010 جج., 2013-2014 جج.), مادەنيەت ءمينيسترى (2010-2012 جج.), مەملەكەتتىك حاتشى (2012-2013 جج.), پرەزيدەنت كەڭەسشىسى (2014-2015 جج.) قىزمەتتەرىن ابىرويمەن اتقاردى. سوڭعى اتقارعان قىزمەتى – 2015 جىلى 26 ساۋىردە وتكەن كەزەكتەن تىس پرەزيدەنت سايلاۋىندا نۇرسۇلتان نازارباەۆتىڭ سايلاۋ الدى شتابىنىڭ باسشىسى. مۇحتار ابرار ۇلى قازاق عىلىمىنىڭ دامۋىنا سۇبەلى ۇلەس قوستى. 100-دەن استام عىلىمي ەڭبەكتىڭ اۆتورى. تاريح عىلىمدارىنىڭ كانديداتى (1995 ج.), زاڭ عىلىمدارىنىڭ دوكتورى (1999 ج.), پروفەسسور (2000 ج.). نيۋ-يورك عىلىم اكادەمياسىنىڭ تولىق مۇشەسى (1997 ج.), قازاقستان رەسپۋبليكاسى الەۋمەتتىك عىلىمدار اكادەمياسىنىڭ اكادەميگى (2001 ج.). قازاقستان مەملەكەتتىك سىيلىعىنىڭ يەگەرى (1996 ج.). «قۇرمەت» (2004 ج.) جانە «پاراسات» (2010 ج.) وردەندەرىمەن ماراپاتتالعان. اسكەري شەنى – زاپاستاعى پولكوۆنيك. ەلامان قوڭىر. دەرەك: akorda.kz. سۋرەت: egemen.kz.