الىپ جۇلدىزداردىڭ جويىلىپ كەتكەننەن كەيىنگى قالدىعى نەيترون جۇلدىزى دەپ اتالادى. ول كىشكەنتاي بولسا دا, وتە اۋىر. ەگەر وسىنداي ەكى نەيترون جۇلدىزى ءبىر-بىرىنە جاقىنداپ, سوقتىعىساتىن بولسا, اسپاندا ناعىز جارىلىس بولادى. عالىمدار بۇل قۇبىلىستى «كيلو-نوۆا» دەپ اتايدى. سوقتىعىس كەزىندە التىن, پلاتينا, ۋران, كۇمىس سياقتى باعالى اۋىر مەتالدار تۇزىلەدى. ولاردىڭ ءبىر بولىگى جۇلدىزدىڭ ىشىندە قالىپ, قالعانى عارىشقا شاشىراپ كەتەدى. عالىمداردىڭ ەسەبىنشە, ءبىر سوقتىعىستان جەردىڭ ماسساسىنان ون ەسە كوپ التىن پايدا بولادى.
