ساراپشىلار تازا سۋدىڭ تاعى ءبىر كوزى بار دەيدى. بۇل – اقتوبە وبلىسىنداعى كوكجيدە جەراستى سۋلارى.
«ونى يگەرۋگە قاتىستى جوبانى جان-جاقتى پىسىقتاپ, ونىڭ ەكونوميكالىق تيىمدىلىگىن زەرتتەۋ قاجەت. ساراپشىلار كوكجيدە, ايشۋاق جانە سولتۇستىك ايشۋاق جەراستى سۋلارىنان ماڭعىستاۋ جانە اتىراۋ وبلىستارىنىڭ ەلدى مەكەندەرىنە دەيىن سۋ قۇبىرىن تارتۋدى ۇسىنىپ وتىر. سۋ قۇبىرىنىڭ ۇزىندىعى شامامەن 1400 شاقىرىم بولادى, سۋ وتكىزۋ مۇمكىندىگى – كۇنىنە 170 مىڭ تەكشە مەتر. سول ارقىلى 1,2 ميلليون ادامدى تازا اۋىز سۋمەن قامتاماسىز ەتۋگە جانە ونىڭ كولەمىن ارتتىرۋعا مۇمكىندىك تۋادى. اقتاۋ قالاسىنداعى سۋ قۇبىرى جەلىسى ابدەن توزعان, توزۋ كورسەتكىشى – 77 پايىز. سونىڭ كەسىرىنەن سۋدىڭ 16 پايىزى ىسىراپ بولىپ جاتىر. جالپى, ايماقتاعى سۋ قۇبىرى مەن كارىز جەلىسىنىڭ توزۋى اسا كۇردەلى ماسەلە بولىپ تۇر», دەدى پرەزيدەنت.
ماسەلەن, سۋ قۇبىرى اقتاۋدا 77 پايىز, جاڭاوزەندە – 59 پايىز توزعان. كارىز جەلىسى اقتاۋدا شامامەن – 76 پايىز, جاڭاوزەندە – 72 پايىز توزعان.
ء«بىر سوزبەن, ناقتى شارالار قولعا الىنۋى كەرەك. ال شالعايدا تۇراتىن مالشىلاردىڭ ءوز بەتىمەن قۇدىق قازۋ تۋرالى باستاماسىنا كەلسەك, بۇل – جالپى قۇپتارلىق ءىس. بۇل جۇمىسقا 100 ميلليون تەڭگە قاجەت دەپ وتىر. كەمىندە 50 مالشى سۋعا قول جەتكىزەدى ەكەن. قولداۋعا بولادى دەپ ويلايمىن. پرەمەر-ءمينيستردىڭ ورىنباسارى قانات بوزىمباەۆ اكىممەن بىرلەسىپ بۇل ماسەلەنى پىسىقتاۋى كەرەك», دەدى مەملەكەت باسشىسى.
