فوتو: اقوردا
پرەزيدەنتتىڭ مالىمەتىنشە, تۋريزم – ايماق ەكونوميكاسىنىڭ مۇناي-گاز سالاسىنان كەيىنگى ماڭىزدى سەكتورى. بىلتىر وبلىسقا شەتەلدەن 43 مىڭ تۋريست كەلگەن. ەلىمىزدىڭ باسقا ايماقتارىنان كەلگەن قوناقتاردىڭ سانى 460 مىڭعا جۋىقتاپ, سوڭعى ءۇش جىلدا جالپى تۋريستەر سانى 1,5 ەسە ارتقان.
«جازدا قوناق ۇيلەردىڭ 90 پايىزدان استامى بوس بولمايدى. بەكەت اتا جەراستى مەشىتىنە, بوزجىرا شاتقالىنا, ايراقتىداعى «قامالدار القابىنا» جانە تورىشتاعى دومالاق تاستارعا تۋريستەر وتە كوپ بارادى. ماڭعىستاۋعا كەلەتىن ءاربىر ونىنشى ادام وسى نىساندارعا ارنايى سوعادى. تۋريستەرگە, اسىرەسە, مۇمكىندىگى شەكتەۋلى جاندارعا قولايلى جاعداي جاساۋ قاجەت. مەن مۇنى ۇنەمى ايتىپ ءجۇرمىن. وسى باعىتتاعى جۇمىستى جالعاستىرۋ قاجەت. بەكەت اتا جەراستى مەشىتىنە كوتەرىلۋ ءۇشىن اۆتوماتتى قوندىرعى ورناتۋ تۋرالى ۇسىنىستى مۇقيات قاراۋ كەرەك. جالپى, تۋريستىك نىساندارعا سونداي جۇيە ورناتۋ الەمدىك تاجىريبەدە بار. بىراق كەسەنە – حالقىمىز ءۇشىن كيەلى ورىن. سوندىقتان جۇرتشىلىقپەن, ءتۇرلى ماماندارمەن اقىلداسىپ, جان-جاقتى ويلاستىرىپ شەشىم قابىلداعان ءجون. مەن بۇل ۇسىنىستى قولدايمىن», دەدى مەملەكەت باسشىسى.
پرەززيدەنت اقتاۋدىڭ كولىك-لوگيستيكا جانە تۋريزم تۇرعىسىنان ەرەكشە الەۋەتكە يە ەكەنىن اتاپ ءوتىپ, تەڭىز تۋريزمىنە ەرەكشە نازار اۋدارۋ كەرەكتىگىن ايتتى.
«بەس ەلدىڭ تەڭىز ايلاقتارى ءبىر-بىرىنە جاقىن ورنالاسقان. رەسەي, يران جانە كاۆكاز ەلدەرىنىڭ ميلليوننان استام تۇرعىنى بار 10 قالاسىنان تۋريستەر شاقىرۋعا بولادى. ىستانبۇل, انتاليا, لوندون, ماسكەۋ, استراحان, تبيليسي, باكۋ جانە باسقا دا قالالاردان شىعاتىن ۇشاقتاردىڭ ترانزيتتىك دالىزدەرى وسى جەردە توعىسادى. مۇنىڭ ءبارى ءتۋريزمنىڭ قارقىندى دامۋىنا جول اشادى. اقتاۋ پورتىندا جاڭا تەڭىز پورتىن سالۋ قاجەتتىگى تۋىنداپ وتىر. ايلاقتاردى جولاۋشى تاسيتىن كەمەلەر توقتاۋعا بولاتىنداي ەتىپ جاڭعىرتۋ كەرەك», دەدى قاسىم-جومارت توقاەۆ.
سونىمەن قاتار, مەملەكەت باسشىسى تۋريزم سالاسىنا جەكە ينۆەستيتسيا تارتۋ ماسەلەسىنە توقتالدى. ونىڭ ايتۋىنشا, ۇكىمەت «ماڭعىستاۋ» تۋريستىك ايماعىن دامىتۋدىڭ كەشەندى جوسپارىن شۇعىل تۇردە ءبىتىرۋى كەرەك. ماۋسىم ايىندا بۇل جوسپاردى ماقۇلدانادى.
«وبلىس اكىمدىگى ۇكىمەتتىڭ قولداۋىمەن وسى سالاعا جەكە ينۆەستيتسيا تارتۋ ماسەلەسىن پىسىقتاۋى قاجەت. تاعى ءبىر ماسەلە, بۇل – ءىس-شارالار ءتۋريزمى (Event tourism). اقتاۋ تۇركى الەمىنىڭ مادەني استاناسى مارتەبەسىن الدى. جاقىندا اشىلۋ ءراسىمى جاقسى ءوتتى. بۇل ءىس-شاراعا ءوز ازاماتتارىمىزبەن قاتار, تۇركىتىلدەس ەلدەر دە زور قىزىعۋشىلىق تانىتتى. الداعى ۋاقىتتا 30-دان استام ءىس-شارا وتكىزىلەدى. وسىنىڭ ءبارى ايماققا تۋريستەر تارتۋعا جول اشۋعا ءتيىس. بۇل جۇمىستى بەلسەندى جۇرگىزۋ قاجەت. جالپى, ايماققا شەتەل ينۆەستيتسياسى تۇراقتى كەلىپ جاتىر. بىراق ونىڭ ۇشتەن ەكىسى مۇناي-گاز سەكتورىنا تيەسىلى. سوندىقتان باسقا دا سالالارعا بەلسەندى تۇردە ينۆەستور تارتۋ قاجەت», دەدى پرەزيدەنت.
