ۆەتنام «ەكسپو-2017»-گە قاتىساتىنىن رەسمي راستادى
29-30 شىلدەدە «ەكسپو-2017» حالىقارالىق مامانداندىرىلعان كورمەسىنىڭ كوميسسارى, قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى ءراپىل جوشىباەۆتىڭ ۆەتنام سوتسياليستىك رەسپۋبليكاسىنا ساپارى ءوتتى.
ساپار اياسىندا ءراپىل جوشىباەۆ ۆەتنام سوتسياليستىك رەسپۋبليكاسى پرەمەر-ءمينيسترىنىڭ ورىنباسارى ۆۋ دىك داممەن, مادەنيەت, سپورت جانە تۋريزم ءمينيسترىنىڭ ورىنباسارى حيۋين ۆين ايمەن, سىرتقى ىستەر ءمينيسترىنىڭ ورىنباسارى بۋي تحان شونمەن, سونداي-اق, جەرگىلىكتى ءىرى كومپانيالار باسشىلارىمەن كەزدەستى.
ۆەتنام پرەمەر-ءمينيسترىنىڭ ورىنباسارىمەن كەزدەسۋ بارىسىندا ەكى ەلدىڭ ىنتىماقتاستىعى مەن كەلەشەگى ماسەلەلەرى تالقىلاندى. ۆۋ دىك دام ءارتۇرلى دەڭگەيدە ساپارلار الماسۋ قازاقستان مەن ۆەتنام اراسىنداعى قارىم-قاتىناستىڭ دامۋىنا مۇمكىندىك تۋعىزاتىنىن جانە ۆەتنام ۇكىمەتىنىڭ ەكسپو-2017 كورمەسىنە قاتىسۋ تۋرالى رەسمي شەشىمىن قابىلداعانىن مالىمدەدى. ءوز كەزەگىندە, ءراپىل جوشىباەۆ ۆەتنامنىڭ استاناداعى حالىقارالىق كورمەگە قاتىسۋى قازاقستان-ۆەتنام سەرىكتەستىگىنىڭ كۇشەيۋىنە جاڭا مۇمكىندىك تۋعىزاتىنىن اتاپ ءوتتى.
ۆەتنام مادەنيەت, سپورت جانە تۋريزم مينيسترلىگىندە ۆەدومستۆو باسشىسىنىڭ ورىنباسارى ۆەتنامنىڭ ەكسپو-2017 كورمەسىنە قاتىساتىنى تۋرالى ۋاعدالاستىققا قول قويۋ جانە ەلدىڭ ۇلتتىق كوميسسارىن ۇيىمداستىرۋ ماسەلەلەرىن تالقىلاۋ ءۇشىن ءوز ەلىنىڭ وكىلىن قازاقستانعا جىبەرۋگە دايىن ەكەنىن ايتتى.
سۇحباتتاستار, سونىمەن قاتار, تۋريزم سالاسىندا بىرلەسكەن جوبالاردىڭ جۇزەگە اسىرىلۋى, ەكى ەل استاناسى اراسىندا اۋە قاتىناسىن اشۋ مەن قازاقستاننىڭ ۆەتنامدا تۋريزم الەۋەتىن جاقسارتۋ مۇمكىندىگى ماسەلەلەرىن تالقىلادى. بۇل رەتتە, قازاقستاندىق تۋريستەردىڭ ۆەتنامعا قىزىعۋشىلىعى ارتىپ كەلە جاتقانى اتاپ ءوتىلدى. بۇعان قازاقستاندىق «ەير استانا» اۋە كومپانياسىنىڭ 2013 جىلدان بەرى ىسكە قوسىلعان الماتى – حوشيمين باعىتىنداعى اۋە قاتىناسى ىقپال ەتكەنى كولدەنەڭ تارتىلدى.
ۆەتنام سوتسياليستىك رەسپۋبليكاسىنىڭ سىرتقى ساياسات ۆەدومستۆوسى باسشىسىنىڭ ورىنباسارىمەن كەزدەسۋدە ر. جوشىباەۆ ۆەتنامنىڭ قايتا قۇرۋ جولىنداعى جەتىستىكتەرىن, الەۋمەتتىك-ەكونوميكالىق رەفورمالاردىڭ جۇرگىزىلىپ جاتقانىن جانە نارىقتىق ەكونوميكالى مەملەكەت قۇرۋ جولىنداعى ءىس-قيمىلداردى قازاقستاننىڭ جوعارى باعالايتىنىن اتاپ ءوتتى. بۋي تحان شون ۆەتنام مەن ەاەو ەلدەرى اراسىنداعى قول قويىلعان ەركىن ساۋدا ايماعى تۋرالى كەلىسىم اياسىندا ۆەتنام ۇكىمەتى جاقىن ارادا قازاقستان ازاماتتارىنا بىرجاقتى ۆيزاسىز ءتارتىپ ەنگىزۋ ماسەلەسىن قاراستىرىپ جاتقانىن حابارلادى.
2015 جىلى 30 شىلدەدە «ەكسپو-2017» كوميسسارى 70-كە جۋىق ۆەتنامدىق كومپانيالار قاتىسقان «Doing Business in Kazakhstan» اتتى بيزنەس-فورۋمدا ءسوز سويلەدى. ر. جوشىباەۆ قازاقستاننىڭ ينۆەستيتسيالىق احۋالى, ۆەتنامدىق بيزنەس ءۇشىن ساۋدا, ينۆەستيتسيا جانە تۋريزم مۇمكىندىكتەرى مەن قازاقستاننىڭ «ەكسپو» كورمەسىنە دايىندىعى تۋرالى حاباردار ەتىپ, ۆەتنام ىسكەر توپتارىن كورمەگە قاتىسۋ شارتتارىمەن تانىستىردى.
فورۋم شەڭبەرىندە «ەكسپو-2017» اتتى تاقىرىپتىق تۇساۋكەسەر مەن قازاقستاننىڭ حالىقارالىق كورمەگە دايىندىعى جايلى بەينەروليك كورسەتىلدى.
فورۋم قورىتىندىسى بويىنشا «استانا ەكسپو-2017» ۇك» اق پەن ۆەتنامنىڭ «Saigontourist» جەتەكشى تۋريستىك كومپانياسى اراسىندا ىنتىماقتاستىق تۋرالى مەموراندۋمعا قول قويىلدى.
ر.جوشىباەۆ, سونىمەن قاتار, ۆەتنامدىق «VTV1» جانە «VTV4» ءىرى مەملەكەتتىك تەلەارنالارىنا سۇحبات بەردى.
وسى ارادا اتاپ كورسەتەتىن جايت, ۆەتنام حالىقارالىق كورمە بيۋروسىنىڭ (حكب) مۇشەسى بولىپ تابىلادى. ەلدىڭ حكب اياسىندا ۇيىمداستىرىلعان «ەكسپو» كورمەلەرىندە جيناقتاعان تاجىريبەسى مول. ۆەتنام پاۆيلوندارى سوڭعى 4 كورمەدە مىنا قالالاردا: ساراگوسا (يسپانيا), شانحاي (قحر), يوسۋ (وڭتۇستىك كورەيا) جانە ميلان (يتاليا) ۇسىنىلعان بولاتىن.
قازاقستان مەن ۆەتنام اراسىنداعى تاۋار اينالىمى 2015 جىلدىڭ قاڭتار-ءساۋىر ايلارىنداعى كورسەتكىش بويىنشا 73,7 ملن. دوللاردى قۇرادى (قازاقستاننان ەكسپورت 495,3 مىڭ دوللار, قازاقستانعا يمپورت 73,3 ملن. دوللار), 2014 جىلى 271,9 ملن. دوللار (ەكسپورت – 1,7 ملن., يمپورت – 270,2 ملن.), 2013 جىلى 233,3 ملن. دوللار, ال 2012 جىلى 121,9 ملن. دوللار.
ساۋلەبەك ءبىرجان.
