اباي وڭىرلىك گارنيزونىنىڭ ءباسپاسوز قىزمەتىنىڭ مالىمەتىنشە, ەلىمىزدىڭ العاشقى ۇلتتىق بىتىمگەرلىك كونتينگەنتى وتكەن 2024 جىلى ناۋرىز ايىندا بۇۇ ميسسياسى اياسىندا گولان جوتالارىنا جىبەرىلگەن ەدى. وندا اسكەري قىزمەتشىلەر ءموبيلدى پاترۋلدەۋ, باقىلاۋ بەكەتتەرىن كۇشەيتۋ, ەۆاكۋاتسيا جانە ميناسىزداندىرۋ جۇمىستارىن اتقارعان. بۇگىن, مىنە, سول بىتىمگەرلىك قۇرام ساپىندا تابىستى قىزمەت اتقارىپ, حالىقارالىق قاۋىپسىزدىكتى نىعايتۋعا زور ۇلەس قوسقان وفيتسەرلەر مەن ساربازدار امان-ەسەن ەلگە ورالىپ وتىر», دەيدى.
اۋەجايعا جاقىندارىن كۇتىپ الۋعا جينالعان وتباسى مۇشەلەرىنىڭ كوڭىلىندە ەرەكشە تولقۋ بولدى. سولاردىڭ ءبىرى – 3 سىنىپتى سەرجانت قانات يبراەۆتىڭ زايىبى جانسايا حامزاەۆا.
«قازىرگى كوڭىل-كۇيىمىزدى سوزبەن ايتىپ جەتكىزۋ قيىن. جۇرەگىمىز دۇرسىلدەپ تۇر. بىتىمگەرلەر استاناعا جەتتى دەگەن حاباردى ەستىگەلى بەرى قۋانىشىمىزدا شەك جوق. جۇبايلارىمىزدىڭ حالىقارالىق بەيبىتشىلىك پەن تۇراقتىلىقتى ساقتاۋ جونىندەگى ماڭىزدى مىندەتتەردى اتقارىپ كەلگەنىن ءبىز دە ماقتانىش تۇتامىز. بارشا اسكەري قىزمەتشىلەردىڭ وتباسىلارىنا اماندىق تىلەيمىن», دەپ اعىنان جارىلدى ول.
«شىعىس» وڭىرلىك قولباسشىلىعى اسكەرلەرىنىڭ قولباسشىسى پولكوۆنيك جەڭىس مارالوۆ مىندەتتەرىن ءمىنسىز ورىنداپ كەلگەن بىتىمگەرلەردى ميسسيانىڭ ءساتتى اياقتالۋىمەن جانە تۋعان ەلگە امان-ەسەن ورالۋىمەن قۇتتىقتاپ, بۇۇ مانداتى شەڭبەرىندە تاپسىرمالاردى ورىنداۋ كەزىندە كورسەتكەن جوعارى كاسىبيلىگى مەن باتىلدىعىن باعالادى.
بىتىمگەرلىك ميسسياسى قۇرامىندا قىزمەت ەتۋ – بۇل ۇلكەن تاجىريبە, ءارى جاۋاپكەرشىلىك. العا قويىلعان مىندەتتەردى ويداعىداي ورىنداعانى ءۇشىن قازاقستاندىق بىتىمگەرلىك كونتينگەنتتىڭ جەكە قۇرامى بۇۇ ميسسياسى مەن حاتشىلىعى باسشىلىعىنىڭ جوعارى باعاسىنا يە بولدى.
اسكەري بورىشىن ۇلگىلى اتقارعانى, بۇۇ-نىڭ گولان جوتالارىنداعى بىتىمگەرشىلىك ميسسياسىن جۇزەگە اسىرۋ بارىسىندا كورسەتكەن ەرلىگى مەن جانقيارلىعى ءۇشىن ەل پرەزيدەنتى بىرقاتار اسكەري قىزمەتشىلەردى ماراپاتتادى. سولاردىڭ ءبىرى 44736 اسكەري ءبولىمى بارلاۋ-شابۋىلداۋ (ارنايى ماقساتتاعى) روتاسىنىڭ كومانديرى مايور ەسەن سابىرجانوۆ. اسكەري قىزمەتكەر جۇكتەلگەن جاۋاپتى مىندەتتى جوعارى دەڭگەيدە اتقارعانى ءۇشىن باۋىرجان مومىش ۇلى اتىنداعى II دارەجەلى «ايبىن» وردەنىمەن ماراپاتتالدى.
«العاشقى بىتىمگەرلىك كونتينگەنتىمىز گولان جوتالارىنا 600-دەن استام اسكەري تاپسىرمالاردى ورىندادى. ءبىر جىلدان استام ۋاقىتتا اسكەري قىزمەتكەرلەر وزدەرىن وتە جوعارى دەڭگەيدە كورسەتتى. اسكەري قىزمەتكەرلەر بىلىكتىلىكتەرىنىڭ ارقاسىندا قويىلعان تاپسىرمالاردى ابىرويمەن ورىنداپ شىقتى», دەدى مايور ەسەن سابىرجانوۆ.
