ءۇندىستان, تۇركيا, ازەربايجان, بەلورۋسسيا, وزبەكستان, قىرعىزستان, رەسەيدەن جانە ەلىمىزدىڭ ءار وڭىرىنەن كەلگەن تانىمال سۋرەتشىلەر قاتىسقان سيمپوزيۋمدا 120-دان استام شىعارما ۇسىنىلدى. ءوز تۋىندىلارى ارقىلى قىلقالام شەبەرلەرى ەرەكشە مارتەبەگە يە بولعان تۇركىستاندى ۇلىقتاۋعا ۇلەس قوستى. اپتاعا جۋىق سوزىلعان ءىس-شارانىڭ قورىتىندىسى رەتىندە «كونگرەسس حولل» كەشەنىنىڭ فويەسىندە حالىقارالىق سۋرەتشىلەر سيمپوزيۋمىنىڭ شىعارمالارىنان كورمە ۇيىمداستىرىلدى. ياعني قىلقالام شەبەرلەرىنىڭ تۇركىستاننىڭ قازىرگى بەينەسى بەينەلەنگەن سۋرەتتەرى جۇرتشىلىققا ۇسىنىلدى.
كورمەنىڭ اشىلۋ راسىمىندە تۇركىستان وبلىسى اكىمىنىڭ ورىنباسارى ەرتاي التاەۆ «TURKISTAN STYLE» حالىقارالىق سيمپوزيۋمىنا قاتىسۋشى سۋرەتشىلەردى ديپلومدارمەن ماراپاتتاپ, سەرتيفيكاتتار تاپسىردى. «تۇركىستان قالاسى زاماناۋي قايتا جاڭعىرىپ, ەرەكشە مارتەبەگە يە بولعانىن بىلەسىزدەر. وسىنداي ساتتە سۋرەتشىلەردىڭ رۋحاني استانانىڭ كونە تاريحى مەن جاڭارۋىن بەينەلەگەن تۋىندىلارى, ونىڭ ەجەلگى تاريحىنا تاعى ءبىر ءۇڭىلىپ, كيەلى تۇركىستاننىڭ بۇگىنگى كۇنىن ونەر تىلىمەن ۇلىقتاۋى – قۇپتارلىق ءىس. سىزدەر سالعان ونەر تۋىندىلارى ۇرپاققا ەڭ قىمبات مۇرا, ماڭىزى زور دەرەكتى ميراس بولىپ قالاتىنى ءسوزسىز», دەدى ەرتاي التاەۆ. سونداي-اق قىرعىزستان رەسپۋبليكاسىنىڭ حالىق سۋرەتشىسى, توقتوعۇل اتىنداعى مەملەكەتتىك سىيلىقتىڭ يەگەرى اكادەميك يۋريستانبەك شىعاەۆ پەن قازاقستان رەسپۋبليكاسى كوركەم اكادەمياسىنىڭ اكادەميگى جانە ۆيتسە-پرەزيدەنتى ەرلان ايتۋاروۆ بەينەلەۋ ونەرىن دامىتۋ ماقساتىنداعى وسىنداي اۋقىمدى ءىس-شارالاردىڭ ماڭىزدىلىعىنا توقتالىپ, سۋرەتشىلەر اتىنان العىسىن ءبىلدىردى.
