كاتاردا نەمىس جۋرناليستەرىنىڭ تۇتقىندالۋى جيىلەپ كەتتى

استانا. 5 مامىر. كاتار استاناسى – دوحادا فۋتبولدان 2022 جىلعى الەم چەمپيوناتىنا دايىندىق تۋرالى دەرەكتى فيلم ءتۇسىرىپ جۇرگەن ءبىر توپ نەمىس جۋرناليستەرىن جەرگىلىكتى قۇقىق قورعاۋ ورگاندارى تۇتقىنعا الدى. بۇل تۋرالى ntv.ru حابارلادى. گەرمانيانىڭ ARD تەلەارناسىنىڭ كوررەسپوندەنتى فلوريان باۋەردىڭ ايتۋىنشا, ولاردىڭ بۇگىنگە دەيىن تۇسىرگەن جازبالارىن كاتار پوليتسەيلەرى ءوشىرىپ تاستاعان. «ءبىزدى تۇتقىنداپ, جەرگىلىكتى پوليتسەيلەر مەن تەرگەۋ قىزمەتىنىڭ وكىلدەرى سۇراقتىڭ استىنا الدى. الداعى بىرنەشە كۇننىڭ ىشىندە بىزگە كاتاردان شىعۋعا تىيىم سالدى. سونداي-اق, بارلىق جازبامىزدى ءوشىرىپ, جابدىقتارىمىزدى بۇزىپ تاستادى», – دەيدى نەمىس ءجۋرناليسى. بۇعان دەيىن دوحادا گەرمانيانىڭ WDR تەلەارناسىنىڭ قىزمەتكەرلەرى تۇتقىندالعان بولاتىن. ولار دا 2022 جىلعى مۋنديال تۋرالى دەرەكتى فيلم ءتۇسىرۋ ءۇشىن كاتارعا كەلگەن. تۇتقىندالعان جۋرناليستەردەن مەملەكەتتىك قاۋىپسىزدىك قىزمەتىنىڭ وكىلدەرى جاۋاپ الىپ, 14 ساعاتتان كەيىن بوساتقان. الايدا, جۋرناليستەردىڭ ءتۇسىرۋ قۇرىلعىلارى, نوۋتبۋكتەرى جانە ۇيالى تەلەفوندارى تاركىلەنگەن. اتالعان تەحنيكالار بارلىق جازبالارى وشىرىلگەن جانە ايتارلىقتاي اقاۋ كەلگەن كۇيدە ءتورت اپتادان كەيىن قايتارىلدى. سوڭعى كەزدەرى كاتاردا فۋتبولدان الەمدىك دوداعا دايىندىق بارىسى تۋرالى فيلم تۇسىرۋگە كەلگەن گەرمانيا جۋرناليستەرى ءجيى تۇتقىندالۋدا. جوعارىدا ايتىلعان ەكى جايتتان بولەك, گەرمانيانىڭ تاعى ءبىر توپ باق وكىلدەرى قاماۋعا الىنعان. ولار الەم چەمپيوناتىنا دايىندىق بارىسىندا ەڭبەك شارتىنىڭ بۇزىلۋى جايىندا ارنايى ماتەريال دايىنداعانى ءۇشىن نازارعا ىلىنگەن. ايتا كەتەيىك, فۋتبولدان 2022 جىلعى الەم چەمپيوناتى كاتاردا 21 قاراشا مەن 18 جەلتوقسان ارالىعىندا وتەدى. جاز كەزىندە كاتاردا اۋا رايى وتە ىستىق بولۋىنا بايلانىستى فيفا دودانى قىسقى مەزگىلگە اۋىستىردى. ەلامان قوڭىر. دەرەك, سۋرەت: ntv.ru.