كوللاجدى جاساعان قونىسباي شەجىمباي, «EQ»
دارەم ۋنيۆەرسيتەتىنىڭ زەرتتەۋشىسى كەللي ياكۋبوۆسكي بۇل قۇبىلىستى «ەرىكسىز مۋزىكالىق جاد» دەپ تۇسىندىرەدى. ياعني ادام ءان تىڭداماسا دا, ميى سول اۋەندى قايتالاي بەرەدى. كوبىنە مۇنداي اۋەندەر – بۇرىننان تانىس, بىرنەشە رەت تىڭدالعان, ءسوزى مەن ىرعاعى قاراپايىم, تەز جاتتالاتىن اندەر بولادى. ءاننىڭ ساناعا ورنىعىپ قالۋىنا بىرنەشە سەبەپ بار. بىرىنشىدەن, قايتالاناتىن اۋەن – تەز جاتتالادى. ەكىنشىدەن, ول ءان ءسىزدىڭ كوڭىل كۇيىڭىزبەن ۇيلەسىپ تۇرسا, مي ونى بايلانىس رەتىندە ساقتاپ قويادى. ماسەلەن, كوڭىلىڭىز كوتەرىڭكى كەزدە تىڭداعان ءاندى, جايدارىلانىپ تۇرعاندا ايتىپ وتىراسىز. تاعى ءبىر قىزىق جايت – بەلگىلى ءبىر سوزبەن, اداممەن, وقيعامەن بايلانىستى اندەر ءجيى ەسكە تۇسەدى. وسىلايشا, مي ءوزى جاقسى كورەتىن نە ۇيرەنىپ قالعان اۋەندى قايتا-قايتا ەسكە ءتۇسىرىپ وتىرادى. ماسەلەن, «ساعىندىم الماتىمدى» دەپ ەرىكسىز ىڭىلداپ وتىرساڭىز, الدەبىرەۋ ەسىڭىزگە تۇسكەن شىعار. مۇنداي ساتتەردە ءان – جاي عانا ءان ەمەس, جۇرەك ءتىلىن سويلەتكەن ەستەلىك بولۋى مۇمكىن. كاليفورنيا ۋنيۆەرسيتەتىنىڭ زەرتتەۋشىسى مەتت ەۆانس بۇل قۇبىلىس ادامنىڭ اسسوتسياتيۆتىك جادىنىڭ جۇمىسى ەكەنىن ايتادى. عالىمدار بۇل كۇيدەن ارىلعىڭىز كەلسە, جاڭا ءان تىڭداۋ كەرەك دەيدى. سەبەبى جاڭا ءان ساناداعى ەسكى اۋەندى ۇمىتتىرادى.
