تالدىقورعان قالاسىنىڭ پوليتسياسىنا تۇرعىن ۇيلەردىڭ ءبىرىنىڭ جانىندا كۇدىكتى ادامداردىڭ جۇرگەنى تۋرالى حابارلاما تۇسكەن. ازاماتتار قۇقىق قورعاۋ ورگاندارىنان تەكسەرۋدى سۇراعان.
وقيعا ورنىنا جەدەل تۇردە پاترۋلدىك پوليتسيا جاساعى بارىپ, ەسكەلدى اۋدانىنان كەلگەن 17 جانە 18 جاستاعى ەكى ءجاسوسپىرىمدى ۇستاعان. تەكسەرۋ بارىسىندا ولاردىڭ تالدىقورعان اۋماعىندا ەسىرتكى تاراتۋمەن اينالىسقانى انىقتالدى.
جەكە ءتىنتۋ كەزىندە كۇدىكتىلەردىڭ بىرىنەن اق ءتۇستى ۇنتاق تارىزدەس زاتى بار ەكى زيپ-پاكەت تابىلىپ, تاركىلەندى. ونىڭ ايتۋىنشا, بۇل – «مەفەدرون» ەسىرتكىسى. ال ەكىنشى كۇدىكتىدەن وسىنداي زات سالىنعان 95 زيپ-پاكەت تاركىلەندى.
تەرگەۋ بارىسىندا جاسوسپىرىمدەر تىيىم سالىنعان زاتتاردى جاسىرعان ورىندارىن كورسەتتى. پوليتسەيلەر قوسىمشا 21 زيپ-پاكەت تاۋىپ, تاركىلەگەن. جالپى, 116 ورام ەسىرتكى زاتتارى تاركىلەندى.
«قازىرگى تاڭدا تەرگەۋ امالدارى جالعاسۋدا. ەكى كۇدىكتى قاماۋعا الىندى. پوليتسيا زاڭسىز ەسىرتكى اينالىمى, سونىڭ ىشىندە ەسىرتكىنى «جاسىرىن» قويىپ كەتۋ ءادىسى اۋىر قىلمىس ساناتىنا جاتاتىنىن جانە وعان مۇلكىن تاركىلەي وتىرىپ, 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكە سالادى», - دەلىنگەن وبلىستىق پد حابارلاماسىندا.
