ءبىر كۇننىڭ ەكى كەرەمەتى

قوستاناي وبلىسىندا ءبىر كۇندە تاڭداي قاققىزار ەكى بىردەي اۋىل شارۋاشىلىعى كاسىپورنى جۇمىسىن باستادى. وبلىستا جىلدىڭ ءبىرىنشى جارتىسىندا 6 ينۆەستيتسيالىق جوبا پايدالانۋعا بەرىلۋگە ءتيىس. ونىڭ بىرەۋى وندىرىستەن دە, قالعان بەسەۋى اۋىل شارۋاشىلىعىن دامىتۋعا باعىتتالعان. قوستاناي اۋدانىن­داعى “جاس قانات” قۇس فابريكاسى­نىڭ قىزىل لەنتاسىن وبلىس اكىمى سەرگەي كۋلاگين قيدى. – جەرگىلىكتى بازاردا ازىق-ت ۇلىك مولشىلىعىن جاساۋ, جۇمىس ورنىن اشۋ, سالىق ءتۇسىرۋ –ينۆەستيتسيالىق جوبالاردى جۇزەگە اسىرۋداعى نەگىزگى ماقسات. ال مۇنداي جوبالاردىڭ ون ءبىرى ومىرگە جولداما السا, كەلەسى جىلى بىتۋگە ءتيىس ءتورت جوبانىڭ قازىعى قاعىلدى, – دەدى سەرگەي كۋلاگين. بۇل كاسىپورىننىڭ قۇرىلىسى مەن جابدىعىنا 598 ميلليون تەڭگە قارجى جۇمسالدى. مۇندا 80 ادام قۇس ءوسىرىپ, قاناتتى قازىنادان ناپاقاسىن تاباتىن بولادى. گەرما­نيالىق جابدىق بالاپانداردى توردا ۇستاماي, ەركىندىكتە جەمدەۋگە ارنالعان. رەسپۋبليكاداعى ين­دۋستريالاندىرۋ كارتاسىنا ەنگەن بۇل قۇس فابريكاسى جىلىنا 2 مىڭ توننا قۇس ەتىن وندىرەدى. – كاسىپورىن وندىرگەن قوڭدى قۇس ەتى جەرگىلىكتى بازارعا شىعارى­لادى. ازىق-ت ۇلىك مولشىلىعىنا ۇلەس قوسىپ عانا ەمەس, ونىڭ ارزان­داۋىنا دا اتسالىسامىز. ءبىزدىڭ فابريكا وندىرگەن قۇس ەتى بازارداعى نارىقتان كەم دەگەندە 15 پايىزعا ارزان بولادى. فابريكانىڭ وبلىس ورتالىعىنىڭ ىرگەسىندە ونالاسۋى, تاسىمالعا شىعىننىڭ از جۇمسالۋى دا ءونىمنىڭ وزىندىك قۇنىنىڭ ارزان­داۋىنا مۇمكىندىك بەرىپ وتىر,–دەيدى “جاس قانات” قوڭدى قۇس فاب­ري­كاسى” جاۋاپكەرشىلىگى شەكتەۋ­لى سەرىكتەستىگىنىڭ اتقارۋشى ديرەكتورى يرينا كيسەلەۆا. سونىمەن قاتار “جاس قانات” جىلىنا قازىناعا 150 ميلليون تەڭگە سالىق سالاتىن بولادى. فەدوروۆ اۋدانىنداعى “تۇرار ” جاۋاپكەرشىلىگى شەكتەۋلى سەرىكتەس­تىگىنىڭ جاڭا ۇلگىدەگى ساۋىن فەرما­سىن سالىپ جاتقانىنا ءۇش جىلداي ۋاقىت بولعان ەدى. ساۋىن سيىرلار تۇراتىن كەشەن قۇرىلىسىنىڭ بارلىق قارجىسىن اۋىل شارۋا­شىلىعى كاسىپورنىنىڭ ءوزى كوتەردى. بۇل ينۆەستيتسيالىق جوبانىڭ ەرەكشەلىگى بولىپ سانالادى. – اۋىلدى مالسىز قالاي ەلەس­تەتە الاسىڭ؟ مال شارۋاشى­لىعىن ءبىز بۇرىنعى تاپتاۋرىن جولدان الىپ شىققىمىز كەلدى. دامىعان ەلدەردەگى سياقتى ءسۇت وندىرۋدە نەگە كومپيۋتەرلىك جاڭا تەحنولوگياعا كوشپەيمىز؟ وسى ويىمىزدى جۇزەگە اسىرۋ ءۇشىن الدىمەن قۇرىلىستى باستاۋ كەرەك بولدى,–دەيدى “تۇرار” جاۋاپكەرشىلىگى شەكتەۋلى سەرىكتەس­تىگىنىڭ ديرەكتورى قايرات وسپانوۆ. كەشەن قۇرىلىسى سەرىكتەستىككە 377 ميلليون تەڭگەگە ءتۇستى. كەڭ دە جارىق بازالاردا قارا سيىرلار بايلانباي, ەركىن جۇرەدى. ءسۇت ساۋ كەشەندى جابدىعىن “قازاگرو” ۇلتتىق باسقارۋ حولدينگى اكتسيونەر­لىك قوعامى گەرمانيادان الدىردى. مۇندا قازىر 500 سيىر ساۋىلادى. جاقىندا قۇرىلىسى بىتەتىن كەلەسى بازاعا تاعى دا 500 سيىر اكەلىنەتىن بولادى. ۇزدىك تەحنولوگيانىڭ ارتىقشىلىعى سول, الگى 500 سيىردى ءۇش ساۋىنشى عانا ساۋادى. ولار “كارۋسەلدە” اينالىپ بارا جاتقان سيىردىڭ جەلىنىن سۋلى شۇبەرەكپەن تازارتىپ, ساۋ اپپاراتىن كيگىزىپ تۇرادى. ءبىر سيىردى ساۋعا 15 مي­نۋت­تاي عانا ۋاقىت كەتەدى. ال كە­شەن­­دە ساۋىنشىلاردىڭ جۋىناتىن, دەمالاتىن بولمەسى, لابوراتوريا, ءسۇت ساقتايتىن جابدىق ورنالاسقان. جىلىنا شارۋاشىلىقتا 6 مىڭ توننا ءسۇت وندىرىلەتىن بولادى. ول قوستاناي قالاسىنداعى ءسۇت زاۋىتتارىنا جىبەرىلەدى. “تۇرار” جاۋاپكەرشىلىگى شەكتەۋ­­لى سەرىكتەستىگى وبلىستا گەرمانيالىق وزىق تەحنولوگيانى جۇزەگە اسىرىپ وتىرعان ءۇشىنشى شارۋاشىلىق. ول اۋىلداعى 20 ادامعا جۇمىس بەرىپ وتىر. وسى جەردەگى “شاڭداق” كەڭ­شارىنىڭ توز-توزى شىققان نارىق جىلدارى اۋىل ايەلدەرى ءسۇتتى كومپيۋتەرلەندىرىلگەن اپپاراتپەن ساۋامىز دەپ ويلاپ پا؟ ال قايرات وسپانوۆتىڭ شارۋاشىلىقتى كەڭەيتۋ ويىندا بار. ءنازيرا جارىمبەتوۆا. قوستاناي وبلىسى.