مەملەكەتتىك قىزمەتشىلەر اراسىندا قازاق, ورىس جانە اعىلشىن تىلدەرىن جەتىك مەڭگەرگەن مامانداردى انىقتاۋ جانە قولداۋ ماقساتىندا وتكەن بايقاۋعا باتىس قازاقستان وبلىسىنىڭ اۋداندارىنان جانە ورال مەن اقساي قالالارىنان كەلگەن قىزمەتكەرلەر قاتىستى.
ولار بايقاۋدىڭ ءبىرىنشى كەزەڭىندە ء«سوزتانىم» سايىسىنا ءتۇسىپ, ماتىندەگى كونەرگەن ءسوزدىڭ ماعىناسىن قازاق تىلىندە ايتىپ بەردى. ال ەكىنشى كەزەڭدە «ەلتانىم» بايقاۋىنا قاتىسىپ, قازاق جەرى جانە ونىڭ ايماقتارى, ۇلتتىق قۇندىلىقتارى جونىندەگى سۇراقتارعا ورىس تىلىندە جاۋاپ قاتتى. ءۇشىنشى «ويتانىم» كەزەڭى قاتىسۋشىلاردىڭ اعىلشىن ءتىلى دەڭگەيىن سىنادى. ولار بۇل كەزەڭدە ۇلى تۇلعالار, ۇلتتىق اسپاپتار, ۇلتتىق ويىندار جايلى سۇراقتارعا اعىلشىن تىلىندە تولىق ءارى ناقتى جاۋاپ بەرۋگە تىرىستى.
اسا تارتىستى وتكەن بايقاۋعا مەملەكەتتىك قىزمەت ىستەرى اگەنتتىگىنىڭ باتىس قازاقستان وبلىسى بويىنشا دەپارتامەنتى باسشىسىنىڭ ورىنباسارى داۋرەن قايىروۆ, ماحامبەت وتەمىس ۇلى اتىنداعى باتىس قازاقستان ۋنيۆەرسيتەتى شەت تىلدەرى مۇعالىمدەرىن دايىنداۋ ءبىلىم بەرۋ باعدارلاماسىنىڭ اعا وقىتۋشىسى ەلميرا وتەمىسوۆا, وسى ۋنيۆەرسيتەتتىڭ ءتىل مەن ادەبيەت مۇعالىمدەرىن دايىنداۋ باعدارلاماسىنىڭ اعا وقىتۋشىلارى رايحان ماقۇلوۆا مەن phD كامشات جۇماشەۆا, وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ ءبولىم باسشىسى سۆەتا عانيەۆا قازىلىق ەتتى.
قازىلار القاسىنىڭ شەشىمى بويىنشا ورال قالاسىنا قاراستى زاچاگان كەنتى اكىمدىگى اباتتاندىرۋ ءبولىمىنىڭ باس مامانى داۋلەتجان مۇحانبەتقاليەۆ بايقاۋدىڭ ءبىرىنشى ورىن جۇلدەگەرى اتاندى. ەكىنشى ورىنعا تەرەكتى اۋدانى ۇزىنكول اۋىلدىق وكرۋگى اكىمى اپپاراتىنىڭ باس مامانى ەلەونورا قارابالينا يە بولدى. ال جۇلدەلى 3-ورىن شىڭعىرلاۋ اكىمى اپپاراتىنىڭ باس مامانى دوسحان شوتپانوۆقا بۇيىردى.
بايقاۋ سوڭىندا بارشا ءتىل شەبەرلەرى ديپلوممەن, العىس xات جانە باعالى سىيلىقتارمەن ماراپاتتالدى.
باتىس قازاقستان وبلىسى
