جەڭىمپاز سپورتشى جانە ءبىرىنشى Nomad Wrestling گران-پري جەڭىمپازى ازامات باقىتوۆ بۇل جولى دجيۋ-دجيتسۋدان الەم چەمپيونى رۋسلان يسرايلوۆپەن شىقتى. تارتىستى جەكپە-جەكتە قارسىلاسىن ەكى ۇپاي ارتىق كورسەتكىشپەن تىزە بۇكتىرگەن ازامات باقىتوۆ سپورت سۇيەر قاۋىمدى توسىن تاسىلدەرىمەن ءتانتى ەتتى.
ازامات – ارالاس جەكپە-جەكتە جۇلدىزى جارقىراعان سپورتشى. ول 2015 جىلى قازاقستان چەمپيونى, 2017 جىلى قازاقستان كۋبوگىنىڭ جەڭىمپازى, 2016 جىلى ازيا جۇلدەگەرى, گرەپپلينگتەن 5 دۇركىن قازاقستان چەمپيونى جانە 2 دۇركىن ازيا چەمپيونى, 2018-2019 جىلعى الەم چەمپيوناتىنىڭ ءفيناليسى, ءبىرىنشى Nomad Wrestling كوشپەندىلەر ويىندارىنىڭ چەمپيوندىق بەلدىگىنىڭ يەگەرى. سونداي-اق Alash Pride, M-1 Global, NFC, حاردكور-دە ليگالارىندا رەكورد ورناتقان كاسىبي سپورتشى.
پوليتسيا قىزمەتكەرلەرىنىڭ اراسىندا قىزمەتتە ۇلگى كورسەتۋمەن قاتار, سپورت سالاسىندا دا جەڭىستى بيىكتى باعىندىرىپ جۇرگەن سپورتشىلارىمىز از ەمەس. سولاردىڭ ىشىندە ازامات باقىتوۆتىڭ الىپ جۇرگەن اسۋى كوپ.
