كونفەرەنتسيا بارىسىندا ۋنيۆەرسيتەتتىڭ عىلىمي-زەرتتەۋ باعىتىنداعى سوڭعى جەتىستىكتەرى مەن بولاشاققا جوسپارلانعان باسىم باعىتتارى كوپشىلىككە تانىستىرىلدى. عىلىمي جۇمىس جانە حالىقارالىق بايلانىستار جونىندەگى پرورەكتور قاجىمۇرات احمەدەنوۆ ۋنيۆەرسيتەتتەگى عىلىمي-زەرتتەۋ جۇمىستارىنىڭ 2024-2025 جىلعى قورىتىندىلارى جايلى بايانداما جاساپ, زەرتتەۋ جوبالارى مەن قول جەتكىزىلگەن ناتيجەلەرگە توقتالدى. فيلولوگيا عىلىمدارىنىڭ كانديداتى, دوتسەنت زەينوللا مۇتيەۆ «ادەبي ولكەتانۋ – رۋحاني جاڭعىرۋ» تاقىرىبىندا سويلەپ, ۇلتتىق رۋحانيات پەن ادەبي مۇرانى زەردەلەۋدىڭ ماڭىزىن اتاپ ءوتتى. جاراتىلىستانۋ-گەوگرافيا فاكۋلتەتىنىڭ دەكانى احان تۇرعىمباەۆتىڭ «قازاقستاننىڭ باتىس ايماعىنداعى جايىلىمداردىڭ مال ازىقتىق رەسۋرستارىنىڭ قازىرگى جاعدايى مەن پايدالانۋىن باعالاۋ» اتتى بايانداماسى وڭىرلىك ەكوجۇيە مەن اۋىل شارۋاشىلىعىن بايلانىستىرعان عىلىمي تالداۋدى كورسەتتى.
پلەنارلىق وتىرىستان كەيىن عىلىم سالاسىندا ەڭبەك ەتىپ جۇرگەن بىرقاتار قىزمەتكەر مەن وقىتۋشى ماراپاتقا يە بولدى. «احمەت بايتۇرسىن ۇلى» توسبەلگىسىمەن التىناي جوراسوۆا ماراپاتتالدى. 30 جىلدىق تاجىريبەسى بار عىلىمي كىتاپحاناشى ماقپال يسماعۇلوۆاعا «قازاقستاننىڭ قۇرمەتتى كىتاپحاناشىسى» مەدالى تابىستالدى. ايگۇل ەرعاليەۆا مەن ايسۇلۋ جۇماعاليەۆا «عىلىمدى دامىتۋعا سىڭىرگەن ەڭبەگى ءۇشىن» توسبەلگىسىمەن ماراپاتتالدى. «عىلىم ۇزدىگى» قۇرمەت ديپلومى بيولوگيا, حيميا جانە قورشاعان ورتا ءبىلىم بەرۋ باعدارلامالارىنىڭ جەتەكشىسى گۇليا سىديقوۆاعا بەرىلدى. سونىمەن قاتار قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ قۇرمەت گراموتاسى مەن العىس حاتتارى دا ءوز يەسىن تاپتى.
كونفەرەنتسيا اياسىندا «Start-up WKU» بايقاۋىنىڭ جەڭىمپازدارى جانە «ۇزدىك عىلىمي ماقالالار اۆتورى» نوميناتسيالارىنىڭ يەگەرلەرى ماراپاتتالدى. جيىن سوڭىندا ۋنيۆەرسيتەت كاسىپوداعى اتىنان دا بىرقاتار عالىمدارعا العىس ءبىلدىرىلىپ, ماراپات تابىستالدى.
باتىس قازاقستان وبلىسى
