سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
بىرقاتار نىساندى ارالادى
پرەزيدەنت ەڭ الدىمەن شىمكەنت اۋەجايىنىڭ جاڭا تەرمينالىمەن تانىستى. مەملەكەت باسشىسىنىڭ قالانى دامىتۋ جونىندەگى تاپسىرماسى اياسىندا سالىنعان اۋە ايلاعىنىڭ قۇرىلىسىنا جەكە ينۆەستور 24 ملرد تەڭگە قاراجات جۇمساعان.
پرەزيدەنتكە قازاقستاننىڭ وڭتۇستىگىندە بىرەگەي اۆياتسيالىق حاب قالىپتاستىرۋ وڭىردەگى اۋە قاتىناسىنىڭ باعىت سانىن 17-دەن 59-عا دەيىن ۇلعايتۋعا, سونداي-اق ەۋروپا مەن ازيانىڭ بىرقاتار ەلىنە رەيستەر اشۋعا مۇمكىندىك بەرەتىنى جونىندە باياندالدى.
بۇدان كەيىن مەملەكەت باسشىسى ستراتەگيالىق ماڭىزى زور باتىس قىتاي – باتىس ەۋروپا كولىك دالىزىنە جاقىن ورنالاسقان «Almaar Logistics» ساۋدا-لوگيستيكا ورتالىعىنا باردى. اۋماعى 24 مىڭ شارشى مەتردى قۇرايتىن كوپفۋنكتسيونالدى كەشەن قۇرىلىسىنا جەكە ينۆەستور 14,8 ملرد تەڭگە قارجى قۇيعان. ورتالىق ءونىم ساقتاۋدىڭ وزىق تەحنولوگياسىمەن جابدىقتالعان. اتاپ ايتقاندا, تەز بۇزىلاتىن ازىق-ت ۇلىكتى ۇزاق ساقتاماي, بارىنشا جەدەل تاراتۋعا مۇمكىندىك بەرەتىن جۇيە ەنگىزىلگەن.
سونىمەن قاتار پرەزيدەنت اۋىل شارۋاشىلىعى ونىمدەرىنىڭ كورمەسىن ارالاپ كوردى. قالاداعى 50-گە جۋىق وڭدەۋشى كاسىپورىن بىلتىر 168,5 ملرد تەڭگەنىڭ ءونىمىن شىعارعان.
قاسىم-جومارت توقاەۆقا جىلىجاي كەشەندەرىن سالۋعا تۇركيالىق «Alarko Holding» كومپانياسى – 650 ملن دوللار, ال پولشانىڭ «Fabe Polska SP» كاسىپورنى 136 ملن دوللار كولەمىندە ينۆەستيتسيا قۇيۋعا نيەتتى ەكەنى ايتىلدى.
پرەزيدەنت شىمكەنتكە جۇمىس ساپارى اياسىندا جاڭادان اشىلعان «Coca-Cola Içecek Kazakhstan» زاۋىتىن دا ارالاپ كوردى. وزىق تەحنولوگيالارمەن جابدىقتالعان جانە اۆتوماتتاندىرۋ دەڭگەيى وتە جوعارى كاسىپورىن جىلىنا 283 ملن ليترگە دەيىن سۋسىن شىعارا الادى.
مەملەكەت باسشىسى ءوندىرىس بارىسىمەن تانىسقان سوڭ, ءوڭىردىڭ ەكونوميكالىق وسىمىنە سەرپىن بەرەتىن ءىرى ينۆەستيتسيالىق جوبالاردى قولداۋدىڭ ماڭىزىن اتاپ ءوتتى.
سودان سوڭ قاسىم-جومارت توقاەۆ «Shymkent City» شاعىن اۋدانىنا جاقىن ماڭداعى جاڭا ساياباققا باردى. اۋماعى 20 گەكتاردان اساتىن پاركتە سەيىلدەۋگە جانە مادەني-كوپشىلىك ءىس-شارالار وتكىزۋگە بارلىق جاعداي جاسالعان. سۋبۇرقاقتى جاساندى توعان, امفيتەاتر, لاندشافتى اللەيالار, ۆوركاۋت جانە سكەيت الاڭدارى بار.
پرەزيدەنت ساياباق اۋماعىندا اعاش وتىرعىزدى. قازىرگى كەزدە شىمكەنتتە ادام باسىنا شاققاندا 4 شارشى مەترگە جۋىق جاسىل جەلەكتەن كەلەدى ەكەن. ەكولوگيالىق جاعدايدى جاقسارتىپ, قالا تۇرعىندارىنا قولايلى ورتا قالىپتاستىرۋ ءۇشىن الداعى جىلدارى 1 ملن تۇپتەن اسا اعاش كوشەتى وتىرعىزىلماق. شاھارداعى 12 ساياباقتى اباتتاندىرۋ, سونداي-اق گۇلزارلاردى, قوشقار اتا وزەنىنىڭ جاعالاۋى مەن ارىقتاردى تازالاۋ جۇمىستارى جۇرگىزىلىپ جاتىر. بۇرىنعى قوقىس پوليگونىنىڭ ورنىندا ەكوپارك قۇرىلىسى قولعا الىندى.
بۇعان قوسا پرەزيدەنتكە قىتايلىق «Shaanxi Construction Engineering» كومپانياسى ۇسىنعان قوقىس ورتەۋ زاۋىتىنىڭ جوباسى تانىستىرىلدى. زاۋىت تاۋلىگىنە 1 مىڭ تونناعا دەيىنگى قاتتى تۇرمىستىق قالدىقتاردى قايتا وڭدەپ, ەلەكتر ەنەرگياسىن وندىرە الادى.
سونىمەن قاتار مەملەكەت باسشىسى «Tulip Hall» كوپفۋنكتسيونالدى كەشەنىنە باردى. كونگرەسس-حولل عيماراتى وتكەن جىلى ماۋسىم ايىندا پايدالانۋعا بەرىلگەن. پرەزيدەنت تاپسىرماسىنا سايكەس بوي كوتەرگەن بۇل كورىكتى نىسان بۇقارالىق مادەني ءىس-شارالار وتكىزۋگە ارنالعان. مۇندا سونداي-اق قولونەرشىلەردىڭ ورتالىعى مەن شەبەرحانالارى ورنالاسقان.
مەملەكەت باسشىسى شىمكەنتتە جۇزەگە اسىرىلىپ جاتقان تسيفرلىق شەشىمدەرمەن تانىستى. ولاردىڭ قاتارىندا وتاندىق «سمەۋ استانا» ازىرلەمەسىنە نەگىزدەلگەن باعدارشامداردى ينتەللەكتۋالدىق باسقارۋ جۇيەسى, «Avtobys» تسيفرلىق پلاتفورماسى بار. «Sergek Group» جانە «Freedom Telecom» كومپانيالارىمەن بىرگە «FWA 5G» تەحنولوگياسى نەگىزىندە جۇمىس ىستەيتىن, جول قوزعالىسى مەن قوعامدىق تارتىپكە ۇزدىكسىز مونيتورينگ جۇرگىزەتىن سىرتقى بەينەباقىلاۋ جانە جىلدامدىعى جوعارى ينتەرنەت جۇيەسى ەنگىزىلىپ جاتىر.
قالانىڭ بولاشاقتاعى قۇرىلىس جوسپارى
تانىستىرىلدى
مەملەكەت باسشىسىنا قالانىڭ ساۋلەتتىك كەلبەتىن جاقسارتىپ, تۇرعىن ءۇي-كوممۋنالدىق شارۋاشىلىعىن دامىتۋ باعىتىندا اتقارىلىپ جاتقان جۇمىستار جونىندە مالىمەت بەرىلدى.
قاسىم-جومارت توقاەۆ 2022 جىلى شىمكەنت جۇرتشىلىعىمەن كەزدەسۋ بارىسىندا شاھاردىڭ باس جوسپارىن قايتا قاراپ, كولىك-لوگيستيكا ينفراقۇرىلىمى مەن ينجەنەرلىك جەلىلەرىن جاڭعىرتۋ تۋرالى تاپسىرما بەرگەن ەدى.
مەملەكەت باسشىسىنا قالاداعى ورتالىق ستاديوننىڭ, پەريناتالدىق ورتالىقتىڭ, پاراليمپياداشىلارعا ارنالعان سپورت كەشەنىنىڭ, مەكتەپتەردىڭ جانە تاعى دا باسقا الەۋمەتتىك نىساندار قۇرىلىسىنىڭ بولاشاقتاعى جوبالارى كورسەتىلدى.
پرەزيدەنتكە جەكەمەنشىك تۇرعىن ءۇي كەشەندەرىنىڭ بەيبەرەكەت وسۋىنە شەكتەۋ قويىپ, 2035 جىلعا دەيىن كوپقاباتتى ۇيلەردىڭ ۇلەسىن 60 پايىزعا جەتكىزۋ جوسپارى جونىندە باياندالدى.
بيىل شامامەن 1,4 ملن شارشى مەتر باسپانانى پايدالانۋعا بەرۋ كوزدەلگەن. ونىڭ ىشىندە 320 مىڭ شارشى مەتردەن اسا پاتەر مەملەكەتتىك بيۋدجەت ەسەبىنەن سالىنادى. قالادا جاڭادان «اقجايىق», «بوزارىق» جانە «تۇران» شاعىن اۋداندارى پايدا بولدى.
مەملەكەت باسشىسى «اقجايىق» شاعىن اۋدانىنداعى تۇرعىن ءۇي كەشەنىن ارنايى بارىپ كوردى. بۇل جەردە جىل سوڭىنا دەيىن 35 تۇرعىن ءۇي كەشەنى بوي كوتەرمەك. باسپانالار الەۋمەتتىك تۇرعىدان از قامتىلعان ازاماتتارعا بەرىلەدى, سونداي-اق مەملەكەتتىك يپوتەكا باعدارلامالارى ارقىلى ساتىلادى.
سونىمەن قاتار قاسىم-جومارت توقاەۆقا ەسكى ۇيلەردى بۇزۋ جۇمىستارى جونىندە باياندالدى. رەنوۆاتسيا باعدارلاماسى اياسىندا بۇگىنگە دەيىن 248 وتباسى اپات الدىنداعى ۇيلەردەن جاڭا باسپانالارعا كوشىرىلگەن. 2029 جىلعا قاراي بۇل كورسەتكىشتى 604-كە دەيىن جەتكىزۋ كوزدەلىپ وتىر.
يگىلىگى مول يندۋستريالىق ايماق
سودان سوڭ پرەزيدەنت «تاسساي» يندۋستريالىق ايماعىن ارالاپ كوردى. قاسىم-جومارت توقاەۆقا يندۋستريالىق ايماقتا جالپى ينۆەستيتسيا سوماسى 44,5 ملرد تەڭگە بولاتىن 33 كاسىپورىن اشىلعانى جونىندە باياندالدى. سونىمەن قاتار مۇندا قوسىمشا 800-گە جۋىق جۇمىس ورنىن قامتاماسىز ەتەتىن 9 ينۆەستيتسيالىق جوبا ىسكە اسىرىلا باستادى.
مەملەكەت باسشىسى جەڭىل ونەركاسىپ, ماشينا جاساۋ, قۇرىلىس جانە جيھاز ءوندىرىسىنىڭ ونىمدەرى قويىلعان كورمەمەن تانىستى.
سونداي-اق پرەزيدەنتكە «Aksa Enerji Üretim A.Ş» كومپانياسىنىڭ ينۆەستيتسيالىق قۇنى 350 ملرد تەڭگە بولاتىن بۋ-گاز ەلەكتر ستانساسىنىڭ قۇرىلىسى تۋرالى مالىمەت بەرىلدى.
بۇدان كەيىن قاسىم-جومارت توقاەۆ تمد نارىعىنا اۆتوترانسفورماتورلار, مايمەن ىستەيتىن كۇشتىك ترانسفورماتورلار مەن رەاكتورلار شىعاراتىن «Asia Trafo» زاۋىتىنىڭ وندىرىستىك جەلىسىن ارالاپ كوردى.
مەملەكەت باسشىسىنا «Marai E7 Group» ءوندىرىس الاڭىنىڭ قىزمەتى تانىستىرىلدى. كاسىپورىن تراۆماتولوگيا حيرۋرگياسىندا جانە وستەوسينتەزگە كەڭىنەن قولدانىلاتىن داكە مەن تيتان يمپلانتتارىن شىعارۋعا ماماندانعان.
سونداي-اق پرەزيدەنتكە شىمكەنتتە شىعاتىن ءدارى-دارمەكتەر مەن مەديتسينالىق بۇيىمداردىڭ تۇرلەرى كورسەتىلدى. بۇگىندە شىرايلى شاھار وتاندىق فارماتسەۆتيكا سالاسىنىڭ دامۋىندا ەلەۋلى ءرول اتقارادى. مۇندا 19 كاسىپورىن جۇمىس ىستەيدى. ونىڭ ىشىندەگى ەڭ ءىرىسى – «حيمفارم» زاۋىتى.
جۇمىس ساپارىنىڭ سوڭىن الا مەملەكەت باسشىسى شىمكەنتكە ساپارى بارىسىندا №2 وقۋشىلار سارايىمەن تانىستى. زاماناۋي قوسىمشا ءبىلىم ورتالىعىندا مۋلتيمەديالىق سىنىپتار, زەرتحانالار, شىعارماشىلىق ستۋديالارى, كوۆوركينگ اۋماقتارى قاراستىرىلعان. مۇندا ەرەكشە قاجەتتىلىگى بار بالالار دا ەمىن-ەركىن ءبىلىم الادى. نىسان پرەزيدەنتتىڭ 2022 جىلى قالاعا كەلگەن كەزىندە بەرگەن تاپسىرماسىنا سايكەس سالىنىپ, پايدالانۋعا بەرىلگەن.
بۇگىندە وقۋشىلار سارايىندا 5 مىڭعا جۋىق بالا التى باعىت بويىنشا 65 ۇيىرمەگە قاتىسادى. ءبىلىم باعدارلاماسى جان-جاقتى دامىعان, جاڭاشا ويلايتىن ءارى شىعارماشىلىق قابىلەتى زور تۇلعا قالىپتاستىرۋعا باعىتتالعان.
مەملەكەت باسشىسى ورتالىقپەن تانىسىپ شىققان سوڭ, وقۋشىلارمەن اڭگىمەلەستى.
