جەڭىستىڭ 80 جىلدىعىنا وراي استاناداعى قارۋلى كۇشتەردىڭ اسكەري-تاريحي مۋزەيىندە « ۇلى جەڭىس: ەرلىككە – تاعزىم, ۇرپاققا – ۇلگى» اتتى حالىقارالىق سۋرەت كورمەسى اشىلدى. كورمەگە قازاقستان, قىرعىزستان, رەسەي ەلدەرىنىڭ مايتالمان سۋرەتشىلەرىنىڭ 100-گە جۋىق تۋىندىسى قويىلعان.
ولاردىڭ ىشىندە سۇراپىل سۇم سوعىستى بەينەلەگەن تۋىندىلار, پورترەتتىك جۇمىستار مەن تاريحي وقيعالاردى سۋرەتتەگەن كارتينالار بار. قازاقتىڭ باتىر قىزدارى ءاليا مولداعۇلوۆا, مانشۇك مامەتوۆا, حيۋاز دوسپانوۆانىڭ پورترەتتىك پلاكاتتارى دا كورەرمەن قاۋىمعا ەرەكشە اسەر سىيلايدى. ءىس-شارانىڭ اشىلۋىنا ءماجىلىس دەپۋتاتتارى باستاعان ءبىر توپ زيالى قاۋىم وكىلدەرى قاتىستى.
– كورمەگە قويىلعان كارتينالاردى سۋرەتشىلەر وداعى مەن سۋرەت اكادەمياسى جيناقتاعان. ءبىز مۋزەي تاراپىنان 15 كارتينا قويدىق. نەگىزگى ماقسات – باتىرلار ەسىمىن ۇلىقتاۋ, ونەر ارقىلى جاستارعا اسكەري-پاتريوتتىق تاربيە بەرۋ, مۋزەي ءىسىن دامىتۋ. بۇل كورمە ءبىر ايعا جۋىق ۋاقىت تۇرادى, كەلەم دەۋشىلەرگە ەسىگىمىز اشىق, كىرۋ تەگىن, – دەدى ۇلتتىق اسكەري-پاتريوتتىق ورتالىعى اسكەري-تاريحي مۋزەيىنىڭ باسشىسى داۋلەت قادىروۆ.
سونىمەن قاتار كورمەگە قاتىسقان سۋرەتشىلەر مەن بىرقاتار ۇيىمداستىرۋشىلار ارنايى سەرتيفيكاتتارمەن ماراپاتتالدى.
– تۋىندىلارعا تەك ۇرىس دالاسىنداعى شايقاس قانا ەمەس, وعان دەيىنگى جانە ودان كەيىنگى اۋىر جىلدار, مايداننان بالاسىن كۇتكەن انا, اۋىلداعى جاعداي, تىلداعى ەڭبەك سياقتى ابستراكتىلى تاقىرىپتار ارقاۋ بولعان. بۇل سوعىستىڭ بۇگىنگى ءاربىر ازاماتقا قاتىسى بار, كوبىمىزدىڭ اتالارىمىز, تۋىستارىمىز وسى سوعىستان ورالماي قالدى, جارالى, مۇگەدەك بولىپ كەلدى. سوندىقتان جەڭىس مەرەيتويى قارساڭىندا وتكىزىلىپ جاتقان حالىقارالىق دەڭگەيدەگى كورمەنىڭ ءمان-ماعىناسى زور, – دەيدى استانا قالاسى سۋرەتشىلەر وداعى باسقارما توراعاسى, سۋرەتشى-كەسكىندەمەشى ءومىرالى يسمايلوۆ.
جيىن بارىسىندا كەلگەن قوناقتارعا ەلوردانىڭ مادەنيەت سالاسى قىزمەتكەرلەرىنىڭ اسكەري-پاتريوتتىق تاقىرىپتاعى اندەرى دە تارتۋ ەتىلدى.
جوبانى ۇيىمداستىرۋشىلاردىڭ ءبىرى, سۋرەتشىلەر وداعىنىڭ باسقارما مۇشەسى, كەسكىندەمەشى ماقسات قاڭتارباەۆ ءىس-شارانىڭ ماڭىزىنا توقتالدى.
– مەنىڭ اكەم سوعىسقا قاتىسقان. اكەم سەكىلدى بارشا مايداننان ورالماعان باتىرلارىمىزدى ەسكە الىپ, بۇگىن كورمە ۇيىمداستىرىپ وتىرمىز. استانادان باستالعان كورمەنى الماتى, باسقا دا وڭىرلەردە وتكىزۋ ويدا بار. ءبىزدى قولداعان سۋرەتشىلەر اكادەمياسىنىڭ پرەزيدەنتى اماندوس اقاناەۆقا العىس بىلدىرەمىز, – دەدى ماقسات قىرعىزباي ۇلى.
