عىلىمي ءىس-شاراعا تانىمال الاشتانۋشى عالىمدار, اتاپ ايتساق, ۇعا اكادەميگى, «قازاق گازەتتەرى» جشس باس ديرەكتورى ديحان قامزابەك ۇلى, س.سەيفۋللين مۋزەيىنىڭ ديرەكتورى, مىرجاقىپتانۋشى-پروفەسسور مارات ابسەمەت, ەۇۋ قازاق ادەبيەتى كافەدراسىنىڭ پروفەسسورلارى, فيلولوگيا عىلىمدارىنىڭ دوكتورلارى راحىمجان تۇرىسبەك پەن ساعىمباي جۇماعۇل, فيلولوگيا عىلىمدارىنىڭ كانديداتى, قاۋىمداستىرىلعان پروفەسسور, الاش قايراتكەرىنىڭ ۇرپاعى قايىربەك كەمەڭگەر قاتىسىپ, بايانداما جاسادى.
ديحان قامزابەك ۇلى الاش اۆتونومياسى مەن تۇركىستان اۆتونومياسى اراسىنداعى سىندارلى قارىم-قاتىناستا م.دۋلات ۇلىنىڭ قايراتكەرلىك ءرولىن سارالاسا, مارات ورالباي ۇلى ءبىرتۋار تۇلعانى اقتاۋ ۇدەرىسىندەگى قيىندىقتار مەن ىزدەنىستەرگە توقتالدى. گۇلنار مىرجاقىپقىزى ءوز قولىمەن تابىستاعان قايراتكەر اتا-باباسى شەجىرەسىن كورسەتتى. قوس عالىم دا 1988 جىلدان كەيىن وتاندىق عىلىمنىڭ الاشتانۋدى يگەرۋدەگى تالابىنا, باستاماشىل ىستەرگە باعا بەردى.
راحىمجان ساعىمبەك ۇلى تۇعىرلى تۇلعانىڭ ادەبي مۇراسىنىڭ جاريالانۋى مەن زەرتتەلۋىن ءسوز ەتسە, ساعىمباي بوتباي ۇلى ناقىل سوزدەرىن زەردەلەپ, زامانا جۇگىن كوتەرگەن ءمانىن اشىپ كورسەتتى. قايىربەك كەمەڭگەر قالام قايراتكەرىنىڭ ەلدىك تۇجىرىمدارى ىشىندە جاستارعا قاجەتتى باعىتتاردى كورسەتىپ, تاريحي «قايدا ەدىڭ؟» ولەڭىن دومبىرامەن ناقىشىنا كەلتىرىپ ورىنداپ بەردى.
عىلىمي سەميناردىڭ ەرەكشە تاجىريبەلىك ەرەكشەلىگى سوندا – «Alqa» ۇيىمى مۇشەلەرى PhD, اعا وقىتۋشى جانبوتا كارىپبايدىڭ ءجون سىلتەۋىمەن م.دۋلات ۇلى تۋرالى 150-دەن استام ەسسە جازعان. جيىن بارىسىندا بەكسۇلتان بەكباۋ, ەلجاس ورىنبەك, گۇلسەزىم باقىتجان, ارايلىم دانەبەك, ايگەرىم قايىر, قازىنا باقىتجانقىزى سىندى ستۋدەنتتەر جۇمىسى ۇزدىك دەپ باعالاندى. توپجارعاندار ەسسەلەرىن جينالعان جۇرتقا وقىپ تا بەردى. جاستاردىڭ مىرجاقىپ پوەزياسى مەن پروزاسىن قانشالىقتى قۇرمەت تۇتاتىنىن انار باقتىعالي, جورابەك قاسىم, تىلەكشى نۇرالى سەكىلدى ستۋدەنتتەر وقىعان تۋىندىلارىنان دا اڭعارىلدى.
1-كۋرس ستۋدەنتى بەكسۇلتان بەكەن ۇلىنىڭ مىرجاقىپ رۋحىنا ارناعان ولەڭىندەگى مىنا شۋماققا زال ريزا بولىپ, ۇزاق شاپالاق ۇردى:
«قاراڭعىدا جول سىلتەگەن جارىق شامى,
كۇللى ەل اڭساپ كۇتكەن الىپ تاڭى.
ولەڭىمەن ونەگەلى ورنەك ءورىپ,
ازات كۇنگە قىرانداي قالىقتادى».
بۇگىنگى ستۋدەنت-جاستار الاش ارىستارىنىڭ ەرلىك ىستەرى مەن جازبا مۇرالارىن تاۋەلسىزدىك ءۇشىن توگىلگەن ماڭداي تەر جانە الەمدىك دەڭگەيدەگى قايراتكەرلىك دەپ سانايدى.
ايانا قاناتقىزى,
ل.ن.گۋميلەۆ اتىنداعى ەۇۋ ستۋدەنتى
