كەزدەسۋدى اشقان «قازاق گازەتتەرى» سەرىكتەستىگى باس ديرەكتورى ديحان قامزابەك ۇلى قوناقتارعا ىستىق ىقىلاسىن ءبىلدىرىپ, ۇجىم قىزمەتكەرلەرىن تانىستىردى.
اتالعان باسقوسۋدا استانا قالالىق ءماسليحاتىنىڭ توراعاسى تابيعات زەينۇلقابدەن باستاعان دەپۋتاتتار كەندەباي ادامبەك, باۋىرجان قاسىمبەرگەباەۆ, عابيت ءتاجىمۇراتوۆ, بەكزات جولجاقسىنوۆ, دينارا بايسەركينا ءسوز سويلەدى. دەپۋتاتتار باس باسىلىممەن بىرگە وسكەن ۇرپاق رەتىندە گازەتتە جازىلعان ماقالالاردى وقىپ وتىراتىندارىن, باسپاسوزگە ءۇن قوسۋعا قاشاندا دايىن ەكەندەرىن ايتىپ, وبلىس پەن اۋداندارداعى جاقسى ۇردىستەر, شەشىمىن تاپقان ماسەلەلەر, ءماسليحات دەپۋتاتتارىنىڭ جۇمىستارى باسىلىم بەتتەرىندە جاريالانسا دەگەن ۇسىنىستارىن جەتكىزدى.
«سىزدەرمەن جۇمىسىمىز ۇقساس. اتقارۋشى بيلىك پەن قوعامنىڭ اراسىندا التىن كوپىر بولىپ ءجۇرمىز. «Egemen Qazaqstan» گازەتىندە ارنايى ايدار اشىلىپ, اپتاسىنا ءبىر رەت بولسا دا استانا قالالىق ءماسليحات دەپۋتاتتارىنىڭ جۇمىستارىن وزدەرىڭىزدىڭ قالامدارىڭىز ارقىلى جەتكىزسەك, دەگەن ۇسىنىسىم بار, بىرلەسە جۇمىس ىستەيىك», دەدى تابيعات زەينۇلقابدەن.
دەپۋتاتتار گازەتپەن بالا كەزدەرىندە ەڭ العاش رەت قالاي تانىس بولعاندىقتارى تۋرالى ەستەلىكتەرىن ايتىپ, قازاق ءباسپاسوزىنىڭ قارا شاڭىراعىنداعى جۇزدەسۋگە ريزاشىلىقتارىن ءبىلدىردى.
باس ديرەكتوردىڭ ورىنباسارى ۆيكتور پريانيكوۆ, «Egemen Qazaqstan» گازەتىنىڭ باس رەداكتورى عابيت مۇسىرەپ, باس رەداكتوردىڭ ورىنباسارى تالعات باتىرحان جيىندا ۇستازدار مەن مەملەكەتتىك قىزمەتكەرلەردىڭ باسپاسوزگە جازىلۋ ءۇردىسى ءۇزىلىپ بارا جاتقانىن, جالپى استانا قالاسى بويىنشا جازىلىمنىڭ وتە از ەكەنىن العا تارتىپ, جاس ۇرپاقتى گازەت پەن كىتاپ وقۋعا تارتۋ باعىتىندا جۇمىستار جاسالسا دەگەن ۇسىنىستارىن ايتىپ, دەپۋتاتتاردىڭ ۇلتقا قىزمەت جولىنداعى جۇمىستارىنا تابىس تىلەدى.
جيىن سوڭىندا قالالىق ءماسليحات دەپۋتاتتارى رەداكتسيا عيماراتىن ارالاپ, گازەت ۇجىمىنىڭ وندىرىستىك جۇمىسىن تاماشالادى.
