بىلتىر قالانىڭ تۋرزيم سالاسىنا تارتىلعان ينۆەستيتسيا كولەمى ارتىپ, 110,9 ملرد تەڭگەنى قۇراپ, سالىستىرمالى كەزەڭگە قاراعاندا 2,1 پايىزعا ارتقان. بىلتىرعى جىل قورىتىندىسىنا سايكەس تۋريزمنەن سالىق تۇسىمدەرى 1,9 ەسەگە ءوسىپ, 90,7 ملرد تەڭگەگە جەتىپ وتىر.
جەكە ينۆەستورلار تاراپىنان قوناقۇي, حوستەلدەردى قوسقاندا 35 جاڭا نىسان ىسكە قوسىلعان بولسا, 100 شاقىرىم تاۋ سوقپاعى اباتتاندىرىلدى. 450 ينفراقۇرىلىم نىسانى ورناتىلىپ, اقپاراتتىق ستەندتەر, بەلگىلەر, ورىندىقتار مەن كوپىرلەر, سونداي-اق كۇن پانەلدەرىمەن جابدىقتالعان 13 كەمپينگ ايماعى اشىلدى.
«كوكتوبە» ساياباعىندا «دەنساۋلىق جولى» جاڭا جاياۋ جۇرگىنشىلەر باعىتى اشىلىپ, وندا اشىق اسپان استىندا سەرۋەندەپ, بەلسەندى دەمالۋعا ارنالعان مارشرۋت اباتتاندىرىلعان. ۇزىندىعى 1,2 شاقىرىم جولدىڭ قۇرىلىسى جەكە ينۆەستيتسيالار ەسەبىنەن جاسالدى. باعىت بويىنا زاماناۋي جارىقتاندىرۋ, بەينەباقىلاۋ جۇيەسى, دەمالىسقا جايلى جاعدايد جاسالدى.
تۋريستەر مەن قالا تۇرعىندارى ءجيى كەلەتىن «مەدەۋ» بوگەتى – بيىك تاۋداعى اتاۋلى سپورت كەشەنىنەن جوعارى ورنالاسقان بىرەگەي گيدروتەحنيكالىق نىسان. اباتتاندىرۋ اياسىندا «مەدەۋ» مۇز ايدىنىن, تابيعات كورىنىستەرىن باقىلاۋ ءۇشىن ارنايى الاڭ جاسالىپ, بينوكلدەر قويىلعان. قاۋىپسىزدىكتى ساقتاۋ ماقساتىندا ارناي قۇرىلعىلار مەن بەينەكامەرالار ورناتىلعان.
جاڭا جاياۋ جۇرگىنشىلەر ءۇشىن «جۇمباق جولمەن» تۋريستەر گورەلنيك ۆيزيت-ورتالىعىنا بارا الادى. ونىڭ ۇزىندىعى 285 مەتردى قۇرايدى. بۇل جولمەن كۇنىنە 2 مىڭنان استام جۇرگىنشى وتەدى. ينفراقۇرىلىمى تولىقتاي اباتتاندىرىلىپ, دەمالۋعا جايلى جاعداي جاسالعان. جوبا ەكوتۋريزمدى دامىتا وتىرىپ, «مەدەۋ» مەن «شىمبۇلاق» باعىتتارىنىڭ جۇكتەمەسىن ازايتۋعا باعىتتالعان.
بيىل قالالىق تۋريزم باسقارماسى ۇزىندىعى 100 شاقىرىمنان اساتىن 10 جاڭا تاۋ سوقپاعىن اباتتاندىرۋدى جانە كۇن پانەلدەرىمەن جابدىقتالعان 3 كەمپينگ ايماعىن جاساۋدى جوسپارلاپ وتىر. مۇنىمەن قوسا ەكى بىردەي ءىرى مادەني نىساننىڭ — «تسەليننىي» زاماناۋي مادەنيەت ورتالىعى مەن Almaty Museum of Arts كوركەمونەر مۇراجايى اشىلادى.
بىلتىر وڭتۇستىك شاھارعا 2 340 314 تۋريست كەلگەن. بۇل ەلىمىزدەگى تۋريزم كورسەتكىشىنىڭ 25,6, ال شەتەلدىك تۋريستەر اراسىندا — 53 پايىزىن قۇرايدى.
قالا قوناقتارى مەن تۇرعىندارى ءۇشىن جاسالىپ جاتقان زاماناۋي جاعدايلار ەلىمىزدەگى ءتۋريزمىنىڭ ءارى الەم ساياحاتشىلارى ءۇشىن دە تارتىمدى ورتالىق ەكەنىن كورسەتەدى. قازىرگى كەزدە قالا باسشىلىعى تۋريستەرگە شاڭعى كۋرورتتارى مەن ەكستريم-تۋرلاردان باستاپ, گاسترونوميالىق فەستيۆالدەر مەن تاريحي ەكسكۋرسيالارعا دەيىن جان-جاقتى باعدارلاما ۇسىنىپ وتىر. حالىقارالىق اۋە قاتىناستارىنىڭ دامۋى دا الماتىنى ورتالىق ازياداعى ەڭ تارتىمدى تۋريستىك باعىتتاردىڭ بىرىنە اينالدىرماق.
الماتى
