پرەزيدەنت جانىنداعى شەتەلدىك ينۆەستورلار كەڭەسىنىڭ قىزمەتى اياسىندا وتكەن ءىس-شارادا دەنساۋلىق ساقتاۋ ۆيتسە-ءمينيسترى تيمۋر مۇراتوۆ, «شەتەلدىك ينۆەستورلار كەڭەسى» قاۋىمداستىعىنىڭ ديرەكتورى جاننا بايداشەۆا, «حيمفارم» اق باس ديرەكتورى ادام الەكسەيۋك, پولشا رەسپۋبليكاسىنىڭ قازاقستانداعى ۋاقىتشا سەنىمدى وكىلى ميحال لابەندا, وزگە دە ماماندار قاتىسىپ, ءدارى-دارمەكپەن قامتاماسىز ەتۋدە جۇيەلى شەشىمدەر ازىرلەۋ, جەرگىلىكتى ءوندىرىستى دامىتۋ جانە مەملەكەت پەن جەكەمەنشىك سەكتور اراسىنداعى ارىپتەستىكتى نىعايتۋ ماسەلەلەرىن تالقىلادى.
دەنساۋلىق ساقتاۋ ۆيتسە-ءمينيسترى ت.مۇراتوۆ ءوز سوزىندە حالىقتى ءدارى-دارمەكپەن قامتاماسىز ەتۋ – دەنساۋلىق ساقتاۋ سالاسىنداعى نەگىزگى مىندەتتىڭ ءبىرى ەكەنىن جەتكىزدى. ونىڭ ايتۋىنشا, قازىرگى تۇراقسىزدىق جاعدايىندا كوپ مەملەكەت, سونىڭ ىشىندە اقش پەن ەۋروپا ەلدەرى ءدارى-دارمەك قاۋىپسىزدىگىن مەملەكەتتىك ساياساتتىڭ ماڭىزدى ەلەمەنتى دەپ قاراستىرىپ وتىر.
«شەتەلدىك ينۆەستورلار كەڭەسى» قاۋىمداستىعىنىڭ ديرەكتورى ج.بايداشەۆا دەنساۋلىق ساقتاۋ سەكتورى وكىلدەرىنىڭ كۇشىن بىرىكتىرىپ, جەرگىلىكتى ءوندىرىستى دامىتۋ, وتاندىق كومپانيالارمەن ءتيىمدى ارىپتەستىك تەتىكتەردى قالىپتاستىرۋ جانە ءادىل دە تەڭگەرىمدى پاتەنتتىك ساياسات جۇرگىزۋدىڭ ماڭىزىن اتاپ ءوتتى. ء«بىز ءدارى-دارمەكتى مەملەكەت ەسەبىنەن ساتىپ العاندا ەداۋىر نەگىزدى شەشىم قابىلداۋعا مۇمكىندىك بەرەتىن مەديتسينالىق تەحنولوگيالاردى ساراپتاۋ (HTA) سەكىلدى قۇرالدارعا ەرەكشە نازار اۋدارامىز. ورتاق ماقساتىمىز – ومىرلىك ماڭىزى بار ءارى ساپالى ءدارى-دارمەك ەلدىڭ كەز كەلگەن وڭىرىنە, قاجەت ۋاقىتىندا جانە ءادىل باعامەن جەتىپ, وعان تۇرعىندار قول جەتكىزە العانىن قامتاماسىز ەتۋ. مەملەكەت, بيزنەس پەن ساراپشىلار اراسىنداعى مۇنداي ديالوگ – قازاقستان فارماتسەۆتيكا سەكتورىن ورنىقتى, يننوۆاتسيا مەن ينۆەستيتسيا تۇرعىسىنان تارتىمدى ەتۋدە تاپتىرماس قۇرال. مۇنداي پىكىر الماسۋ ەلدىڭ, ازاماتتاردىڭ جانە ستراتەگيالىق سەرىكتەستەردىڭ مۇددەسىن كوزدەيتىن ۇزاق مەرزىمدى شەشىمدەر قابىلداۋعا نەگىز بولادى دەپ سەنەمىز» دەدى ول.
دوڭگەلەك ۇستەلدە ايتىلعان تاعى ءبىر ماڭىزدى ماسەلە – ءدارىحانا جەلىلەرىنە ءدارى-دارمەك جەتكىزۋ پروبلەماسى. قاتىسۋشىلار ەۋرازيالىق ەكونوميكالىق وداق شەڭبەرىندە ءدارى-دارمەكتى تىركەۋ پروتسەدۋرالارىنا بايلانىستى تۋىنداپ جاتقان قيىندىقتاردى اتاپ ءوتتى. ماسەلەن, 2025 جىلدىڭ اياعىنا دەيىن 2 مىڭعا جۋىق ءدارى ەاەو اياسىندا تىركەۋدى كۇتىپ تۇر. وسىعان وراي قاتىسۋشىلار ۇكىمەتكە پاتسيەنتتەردى قاجەتتى ءدارى-دارمەكتەرمەن قامتۋداعى ىركىلىستەرگە جول بەرمەۋ ءۇشىن وتپەلى كەزەڭ ەنگىزۋ مۇمكىندىگىن قاراستىرۋدى ۇسىندى.
