اقتوبە قالاسىندا وتكەن كورمەگە قاتىسۋشىلار جەتەكشى وتاندىق ۋنيۆەرسيتەتتەر مەن شەتەلدىك جوعارى وقۋ ورىندارىنىڭ ەلىمىزدەگى فيليالدارىنىڭ وكىلدەرىمەن بەتپە-بەت تىلدەسىپ, وقۋعا ءتۇسۋ شارتتارى, ءبىلىم باعدارلامالارى, 2025 جىلعى ۇبت ەرەكشەلىكتەرى, مەملەكەتتىك گرانتتار تۋرالى جان-جاقتى اقپارات الدى. كورمە اياسىندا وقۋشىلار عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلباەۆپەن, عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحانمەن, MDSG جوباسىنىڭ باتىس ايماعىنداعى جوبا جەتەكشىسى ەركىن ەسەركەپوۆپەن كەزدەسىپ, كاسىبي باعىت-باعدار الۋعا مۇمكىندىك الدى. ماماندار وقۋشىلارعا ماماندىق تاڭداۋ مەن بولاشاق ءبىلىم جولىن جوسپارلاۋ جونىندە قۇندى كەڭەستەر بەردى.
كورمە ودان كەيىن اتىراۋ قالاسىندا جالعاستى. بۇل جولى ح.دوسمۇحامەدوۆ اتىنداعى اتىراۋ ۋنيۆەرسيتەتىندە ۇيىمداستىرىلعان ءىس-شاراعا العاشقى كۇنى مىڭنان استام وقۋشى مەن اتا-انا كەلىپ, ۋنيۆەرسيتەت وكىلدەرىمەن جۇزدەستى. «اتىراۋمەن كورشىلەس جاتقان اقتوبەدە بيىل ەكىنشى جىل قاتارىنان بريتاندىق حەريوت-ۋوتت ۋنيۆەرسيتەتى 400-گە جۋىق ستۋدەنتكە ءبىلىم بەرىپ جاتىر. وسىنداي 20-دان استام شەتەلدىك وقۋ ورنىنىڭ فيليالدارى جانە ەلىمىزدەگى ۋنيۆەرسيتەتتەردىڭ وكىلدەرى اتىراۋعا كەلىپ وتىر. باستى ماقسات – وڭىردەگى اتا-انالار مەن وقۋشىلارعا ەلىمىزدەگى مۇمكىندىكتەردى كورسەتۋ. بيىل مينيسترلىك اتىراۋعا قوسىمشا تاعى دا 500 گرانت ءبولىپ وتىر. سونداي-اق تالاپكەرلەر شەتەلدىك ۋنيۆەرسيتەتتەردىڭ فيليالدارىندا مەملەكەتتىك گرانت نەگىزىندە وقي الادى», دەدى عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلباەۆ.
كورمەنىڭ نەگىزگى ماقساتى – قازاقستان اۋماعىنان شىقپاي-اق شەتەلدىك جوعارى وقۋ ورىندارىنىڭ ءبىلىم بەرۋ باعدارلامالارىنا قول جەتكىزۋ مۇمكىندىگىن كەڭەيتۋ. قازىرگى تاڭدا ەلىمىزدىڭ ءتۇرلى وڭىرلەرىندە الەمنىڭ وزىق ۋنيۆەرسيتەتتەرىمەن بايلانىس ورناتىلىپ, قوس ديپلوم نەگىزىندە ءبىلىم الۋعا جول اشىلعان. الداعى ۋاقىتتا شەتەلدىك وقۋ ورىندارىنىڭ فيليالدارىن كوبەيتۋ كوزدەلىپ وتىر. كورمە اياسىندا شەتەلدىك ۋنيۆەرسيتەت فيليالدارىنىڭ ارتىقشىلىقتارىن تۇسىندىرەتىن شەبەرلىك ساباقتارى مەن ماماندىق تاڭداۋعا باعىت بەرەتىن ينتەراكتيۆتى كەزدەسۋلەر ۇيىمداستىرىلدى. سونىمەن قاتار ءتۇرلى ۆيكتورينالىق ويىندار ءوتىپ, وقۋشىلار بەلسەندىلىك تانىتتى. كورمەگە كەلگەن المالى ورتا مەكتەبىنىڭ وقۋشىسى اقتوتى باقتىباەۆا كوپ سۇراققا جاۋاپ العانىن ايتادى. «2025 جىلى المالى ورتا مەكتەبىن بىتىرەمىن. كورمەدە ءتۇرلى ۋنيۆەرسيتەتتەردىڭ ەرەكشەلىكتەرىن, باسقا وقۋ ورىندارىنان قانداي ايىرماشىلىقتارى بار ەكەنىن بىلدىك. سونىمەن قاتار مەملەكەتتىك ءبىلىم گرانتى نەگىزىندە وقۋعا قويىلاتىن تالاپتار تۋرالى تولىق اقپارات الدىق», دەدى.
«Study in Kazakhstan» كورمەسى الداعى ۋاقىتتا ەلىمىزدىڭ باسقا وڭىرلەرىندە دە جالعاسادى. ۇيىمداستىرۋشىلاردىڭ ايتۋىنشا, مۇنداي ءىس-شارالار جاستاردىڭ بىلىمگە دەگەن ىنتاسىن ارتتىرىپ, ولاردىڭ دۇرىس تاڭداۋ جاساۋىنا سەپتىگىن تيگىزەدى.
