ەل جاستارىنىڭ ەڭ كوپ بولىگى تۇراتىن الماتىدا ينكليۋزيۆتى ورتا قۇرۋعا جانە ەرەكشە قاجەتتىلىكتەرى بار جاستاردى قولداۋعا باعىتتالعان ء«اربىر ادام ماڭىزدى» جوباسىن ىسكە اسىرۋ جالعاسۋدا. مامانداردىڭ ايتۋىنشا, بۇل جوبانى مەملەكەتتىك قولداۋ شەشۋشى ءرول اتقارادى. سەبەبى ينكليۋزيۆتى باعدارلامالاردى جۇزەگە اسىرۋ – تەك الەۋمەتتىك ادىلەتتىلىك ماسەلەسى عانا ەمەس, سونىمەن قاتار الماتىنىڭ تۇراقتى دامۋىنا باعىتتالعان مەملەكەتتىك ساياساتتىڭ ماڭىزدى بولىگى.
الماز كەڭەسباي, جوبا ورنىقتى ينستيتۋتسيونالدىق جانە قارجىلىق قامتاماسىز ەتۋ نەگىزىندە ىسكە اسىرىلىپ جاتقانىن اتاپ ءوتتى.
«مەملەكەتتىك رەسۋرستار ماتەريالدىق-تەحنيكالىق بازانى نىعايتۋعا باعىتتالۋدا. ونسىز بارلىق جاستاردىڭ ءوزىن ءوزى جۇزەگە اسىرۋ مۇمكىندىكتەرىنە تەڭ قول جەتكىزۋىن قامتاماسىز ەتۋ مۇمكىن ەمەس. جوبانىڭ ماڭىزدى بولىگى – بارلىق دەڭگەيدەگى ۇيىمدارمەن ءوزارا ءىس-قيمىل ورناتۋ. بۇل جەكەمەنشىك سەكتوردان باستاپ, ءبىلىم بەرۋ مەكەمەلەرى مەن ۇكىمەتتىك ەمەس ۇيىمدارعا دەيىن جالعاسادى. جوبا ءبىر رەتتىك باستاما ەمەس, الماتىدا ينكليۋزيۆتى قوعام قۇرۋ ستراتەگياسىنىڭ ءبىر بولىگى» دەيدى ول.
جوبادا الەۋمەتتىك ينتەگراتسياعا ەرەكشە نازار اۋدارىلادى. تۇراقتى مونيتورينگ جۇرگىزىلىپ, قاجەت بولعان جاعدايدا باعدارلاماعا اعىمداعى قاجەتتىلىكتەرگە سايكەس كەلەتىندەي وزگەرىستەر ەنگىزىلمەك.
